ក្នុងគោលបំណងដើម្បីពង្រឹងទំនាក់ទំនងពាណិជ្ជកម្មទ្វេភាគី ឥណ្ឌូនេស៊ីនឹងបញ្ជូនគណៈប្រតិភូដើម្បីស្វែងយល់ពីលទ្ឋភាពនាំចូលអង្ករពីកម្ពុជា។
លោកនាយករដ្ឋមន្រ្តី ហ៊ុន សែន នាយករដ្ឋមន្ត្រី បានទទួលជួបពិភាក្សាការងារជាមួយលោក ចូកូ វីដូដូ (Joko Widodo) ប្រធានាធិបតីនៃប្រទេសឥណ្ឌូនេស៊ី ដែលជំនួបនេះ ធ្វើឡើងតាមប្រព័ន្ធវីដេអូកាលពីថ្ងៃទី១១ ខែសីហា ។
លោក Joko Widodo មានប្រសាសន៍ថា ៖ « គណៈប្រតិភូឥណ្ឌូនេស៊ីនឹងមកកម្ពុជាដើម្បីពិភាក្សាពីការនាំចូលអង្ករពីកម្ពុជា»។
រដ្ឋាភិបាលកម្ពុជា និងឥណ្ឌូនេស៊ីបានចុះហត្ថលេខាលើកិច្ចព្រមព្រៀងលើការទិញអង្ករក្នុងឆ្នាំ ២០១២។ ទោះជាយ៉ាងណាក៏ដោយ ពួកគេមិនបានបញ្ចប់កិច្ចព្រមព្រៀងពីបរិមាណនាំចេញព្រមទាំងប្រភេទអង្ករទេនៅឡើយទេ។
លោកនាយករដ្ឋមន្ត្រី ហ៊ុន សែន បានសាទរចំពោះចំណាត់ការនេះ ដោយអំពាវនាវឲ្យឥណ្ឌូនេស៊ីវិនិយោគលើវិស័យស្រូវអង្ករ។
លោកបានមានប្រសាសន៍ថាកម្ពុជា នឹងស្វាគមន៍ចំពោះប្រតិភូឥណ្ឌូនេស៊ីដែលនឹងមកកម្ពុជានៅពេលខាងមុខ ក្នុងការពិភាក្សាលើការនាំអង្ករចេញពីកម្ពុជា។ លោកមានប្រសាសន៍លើកឡើងអំពីលទ្ធភាពដែលអ្នកវិនិយោគឥណ្ឌូនេស៊ីអាច ដាក់ទុន 100% នៅកម្ពុជាលើការបង្កើតជារោងម៉ាស៊ីនកិនស្រូវ ឃ្លាំងស្តុក និងបណ្ដាញទិញ ស្រូវពីប្រជាកសិករ ដើម្បីធានាស្ថិរភាពសម្រាប់ការនាំចេញនាពេលខាងមុខ។
អង្កររបស់កម្ពុជាបានចូលទីផ្សារថ្មីក្នុងប្រទេសហ្វីលីពីនក្នុងខែមិថុនាឆ្នាំនេះ ដែលធ្វើឲ្យអង្កររបស់ប្រទេសនេះត្រូវបាននាំចេញទៅកាន់ប្រទេសអាស៊ាន រួមមានម៉ាឡេស៊ី ប្រ៊ុយណេ និងហ្វីលីពីន ហើយស្រូវទៅប្រទេសថៃ និងវៀតណាមផងដែរ។
អ្នកនាំពាក្យក្រសួងកសិកម្ម កញ្ញា អុឹម រចនា មានប្រសាសន៍ថា ក្រសួងកសិកម្មកំពុងជំរុញផលិតកម្មអង្ករក្នុងស្រុកដើម្បីជំរុញផលប្រយោជន៍លើការកើនឡើងតម្លៃអង្ករនៅទីផ្សារអន្តរជាតិ។
កញ្ញាមានប្រសាសន៍ថា៖ « កម្ពុជាកំពុងបង្កើតយុទ្ធសាស្រ្តដើម្បីទទួលបានអត្ថប្រយោជន៍ពីការហាមឃាត់ការនាំចេញអង្កររបស់ប្រទេសឥណ្ឌា តាមរយៈការពង្រឹងសមត្ថភាពរបស់រោងម៉ាស៊ីនកិនស្រូវក្នុងស្រុកក្នុងការប្រមូលស្រូវសម្រាប់ការស្តុកទុក បង្កើនការកែច្នៃ និងការនាំចេញដោយផ្ទាល់ទៅកាន់ទីផ្សារអន្តរជាតិ»។
យោងតាមរបាយការណ៍របស់សហព័ន្ធស្រូវអង្ករកម្ពុជាបានឲ្យដឹងថា រយៈពេល ៦ខែ នៃឆ្នាំ២០២៣ កម្ពុជា សម្រេចបានការនាំចេញអង្ករជិត ៣៣ម៉ឺនតោន ស្មើនឹង ២២៩,២៣ លានដុល្លារ។
កម្ពុជា បាននាំចេញអង្ករមានដូចជា អង្ករក្រអូបគ្រប់ប្រភេទ អង្ករសគ្រាប់វែង អង្ករសគ្រាប់ខ្លី អង្ករចំហ៊ុយ និងអង្ករសរីរាង្គ។
ក្នុងអំឡុងខែមករា ដល់ខែមិថុនា កម្ពុជាក៏មានស្រូវជួញដូរតាមព្រំដែនជាមួយប្រទេសជិតខាងចំនួន ២,២លានតោន ពោលគឺបង្កើតចំណូលបានប្រមាណ ៥៧៨លានដុល្លារ។
កម្ពុជាមានសមត្ថភាពពេញលេញក្នុងការផលិតនិងនាំចេញអង្កររហូតដល់ ២លានតោនក្នុងមួយឆ្នាំ។ នេះបើយោងតាមសហព័ន្ធស្រូវអង្ករកម្ពុជាដេលបានដាក់គោលដៅក្នុងការចេញមួយលានតោនត្រឹមឆ្នាម ២០២៥។
លោក យ៉ង សាំងកុមារ រដ្ឋលេខាធិការ ក្រសួងកសិកម្ម រុក្ខាប្រមាញ់បានមានប្រសាសន៍ឱ្យដឹងដែរថា កម្ពុជាកំពុងក្លាយជាផ្នែកមួយដ៏សំខាន់ក្នុងការធ្វើឱ្យប្រសើរឡើងនូវសន្តិសុខស្បៀងជាតិ និងពិភពលោក បន្ទាប់ពីក្រុមហ៊ុននាំចេញអង្ករធំៗមួយចំនួនរបស់ពិភពលោកបិទការនាំចេញរបស់ពួកគេ។ លោកមានប្រសាសន៍កាលពីដើមខែសីហាថា៖ « កម្ពុជាមានសក្តានុពលដ៏អស្ចារ្យក្នុងការបង្កើនផលិតកម្មអង្ករនៅលើដីដែលមានស្រាប់ និង ពង្រីកបន្ថែមលើទីផ្សារអង្ករទៅបរទេសតាមរយៈគោលនយោបាយពង្រាយមន្រ្តីកសិកម្មឃុំ និងកសាងសហគមន៍កសិកម្ម រឺ សមាគមកសិករភ្ជាប់ទៅនឹងកិច្ចសន្យាកសិកម្ម»៕ ប្រែសម្រួលដោយ៖ សុ ជាតា