ក្រសួងអប់រំ យុវជន និងកីឡា បានអះអាងថា សិស្សប្រឡងជាប់សញ្ញាបត្រមធ្យមសិក្សាទុតិយភូមិ ឬបាក់ឌុប ដែល ពិន្ទុខ្ពស់កម្រិតនិទ្ទេស A B C មានអាទិភាពទទួលបានការងារជាគ្រូបង្រៀនដោយស្វ័យប្រវត្តិ ខណៈអ្នកជំនាញខាងវិស័យអប់រំលើកឡើងថា គួរពង្រីកគ្រឹះស្ថានបណ្ដុះបណ្ដាលគ្រូបង្រៀនមានប្រសិទ្ធភាពនិងគុណភាពជាងការផ្ដល់ឱ្យសិស្សធ្វើជាគ្រូបង្រៀនដោយស្វ័យប្រវត្តិ។
ក្រសួងអប់រំ យុវជន និងកីឡា បានសម្រេចធ្វើកំណែទម្រង់ដោយការកំណត់កូតាសិស្សប្រឡងជាប់សញ្ញាបត្រមធ្យមសិក្សាទុតិយភូមិទទួលបានពិន្ទុខ្ពស់
កម្រិតនិទ្ទេស A B C នឹងក្លាយជាគ្រូបង្រៀនដោយស្វ័យ
ប្រវត្តិសម្រាប់ឆ្នាំ២០២៣-២០២៨។
នេះជាចំណុចមួយកំណែទម្រង់មួយដែលស្ថិតនៅក្នុងការអភិវឌ្ឍគ្រូបង្រៀនតាមរយៈកំណែទម្រង់គ្រឹះស្ថានបណ្ដុះបណ្ដាលគ្រូបង្រៀន។ វាជាកំណែទម្រង់ថ្មីមួយទៀត បន្ទាប់ពីលោក ហង់ជួន ណារ៉ុន កាន់ជារដ្ឋមន្ត្រីដឹកនាំក្រសួងអប់រំ យុវជន និងកីឡា ចាប់តាំងពីឆ្នាំ២០១៣មក។
ឯកសារផែនការសម្រួចអាទិភាពយុទ្ធសាស្ត្រកំណែទម្រង់វិស័យអប់រំ យុវជន និងកីឡា ឆ្នាំ២០២៣-២០២៨ ដើម្បីចូលរួមកំណែទម្រង់អាទិភាពរដ្ឋាភិបាលនីតិកាលទី៧នៃរដ្ឋសភា ដែលខ្មែរថាមស៍បានទទួលពីម្សិលមិញ បញ្ជាក់ថា៖ «ការកំណត់កូតាសម្រាប់សិស្សនិទ្ទេស A B C ដើម្បីជ្រើសរើសចូលធ្វើគ្រូបង្រៀន គឺត្រូវឆ្លងកាត់ការវាយតម្លៃតាមលក្ខណៈវិនិច្ច័យដែលនឹងបានកំណត់ (អាចជ្រើសរើសផ្អែកតាមលំដាប់ពិន្ទុពេលប្រឡង)»។
ឯកសារផែនការសម្រួចអាទិភាពយុទ្ធសាស្ត្រកំណែទម្រង់នេះបន្តថា៖ «ដោយឡែកកូតាគ្រូបង្រៀនដែលនៅសល់សម្រាប់បេក្ខជនផ្សេងទៀតត្រូវឆ្លងកាត់ការប្រឡងជ្រើសរើសដូចធម្មតា ដែលនឹងដឹកនាំដោយក្រុមការងារថ្នាក់ជាតិ និងមានការចូលរួមពីសំណាក់តំណាងទីស្តីការគណៈរដ្ឋមន្ត្រី»។
ឯកសារនេះមិនបញ្ជាក់ចំពោះបេក្ខជនដែលក្លាយជាគ្រូបង្រៀនដោយស្វ័យប្រវត្តិត្រូវបង្រៀនកម្រិតថ្នាក់ណានៅឡើយទេ ប៉ុន្តែកន្លងមកនៅពេលពួកគេប្រឡងជាប់សញ្ញាបត្រមធ្យមសិក្សាទុតិយភូមិរួច គឺត្រូវស្នើសុំប្រឡងចូលក្របខណ្ឌគ្រូបង្រៀនកម្រិតថ្នាក់បឋមសិក្សាឬថ្នាក់អនុវិទ្យាល័យ។
ការអភិវឌ្ឍគ្រូបង្រៀនតាមរយៈកំណែទម្រង់គ្រឹះស្ថានបណ្ដុះបណ្ដាលគ្រូបង្រៀនបានសម្រេចដាក់ឱ្យអនុវត្តវិធានការម៉ឺងម៉ាត់ក្នុងការគ្រប់គ្រង់គ្រូបង្រៀននិងបុគ្គលិកអប់រំ រៀបចំរង្វាន់លើកទឹកចិត្តគ្រូល្អនិងនាយកល្អ រៀបចំការយន្តការដោះស្រាយបញ្ហាលើសខ្វះគ្រូ និងពិនិត្យឡើងវិញនៅតំបន់ជួបការលំបាកនិងតំបន់ដាច់ស្រយាលដើម្បីផ្ដល់ការឧបត្ថម្ភថវិកា។
លោក ហែម ស៊ីណារ៉េត ប្រធានមន្ទីរអប់រំ យុវជន និងកីឡា រាជធានីភ្នំពេញ បានលើកឡើងថា ការផ្ដល់
អទិភាពដល់សិស្សប្រឡងជាប់សញ្ញាបត្រមធ្យមសិក្សាទុតិយភូមិក្នុងពិន្ទុខ្ពស់កម្រិតនិទ្ទេស A B C ដើម្បីស្វែងរកអ្នកមានសមត្ថភាពចូលបម្រើការក្នុងក្របខណ្ឌជាគ្រូបង្រៀន។
លោកបានបញ្ជាក់ថា៖ «ក្នុងករណីបេក្ខជនប្រឡងជាប់បាក់ឌុបបាននិទ្ទេស A B C ដូចគ្នាក្នុងចំនួនច្រើនលើសពីកូតាកំណត់ នោះគណៈកម្មការរបស់ក្រសួងអប់រំនឹងពិនិត្យជ្រើសរើសតាមលំដាប់ពិន្ទុនៃការប្រឡងរបស់ពួកគេ»។
លោកបានបន្តថា៖ «នៅពេលពួកគេទទួលបាន
ការងារជាគ្រូបង្រៀនដោយស្វ័យប្រវត្តិហើយ គឺត្រូវឆ្លងកាត់ការបណ្ដុះបណ្ដាលគរុកោសល្យសិនមុននឹងចេញបង្រៀនសិស្ស»។
លោកវេជ្ជបណ្ឌិត គួច ម៉េងលី អ្នកជំនាញផ្នែកអប់រំដ៏ល្បីបានមើលឃើញថា គោលនយោបាយនេះល្អសម្រាប់ផ្ដល់ការងារសម្រាប់សិស្សទទួលបានការងារជាគ្រូបង្រៀននៅតាមបណ្ដាខេត្តនានា ជាពិសេសនៅតាមតំបន់ដាច់ស្រយាល ប៉ុន្តែការធ្វើបែបនេះមិនអាចជួយអ្វីច្រើនដល់ធនធានមនុស្សក្នុងវិស័យអប់រំទេ។
លោកបានបន្តថា ក្រសួងអប់រំ យុវជន និងកីឡា គួរបង្កើតគោលនយោបាយពង្រឹងនិងពង្រីកសក្តានុពលគ្រឹះស្ថានបណ្ដុះបណ្ដាគរុកោសល្យប្រសើរជាងការផ្ដល់ការងារជាគ្រូបង្រៀនដល់សិស្សដែលប្រឡងជាប់សញ្ញាបត្រមធ្យមសិក្សាទុតិយភូមិដែលមិនមានចំណេះដឹងគ្រប់គ្រាន់។
លោកបានបន្តថា ការពង្រឹងនិងពង្រីកសក្តានុពលគ្រឹះស្ថានបណ្ដុះបណ្ដាគរុកោសល្យច្រើន ដើម្បីបង្កើនធនធានគ្រូបង្រៀននៅគ្រប់កម្រិតថ្នាក់។
លោកបាននិយាយថា៖ «វាមិនពិបាកសោះក្នុងការពង្រីកសាលាគរុកោសល្យបន្ថែម ពេលនោះមានយើងគ្រូគ្រប់គ្រាន់សម្រាប់ការបង្រៀនសិស្ស។ ម្យ៉ាងការធ្វើបែបនេះបានផ្ដល់ឱកាសដល់សិស្សដែលរៀបចប់បាក់ឌុបទៅបន្តការសិក្សានៅថ្នាក់ឧត្តមសិក្សា ហើយបន្ទាប់មកបន្តចូលសិក្សានៅគរុកោសល្យបន្តទៀត»៕
Related Posts
-
January 10, 2023
-
January 20, 2023
-
December 19, 2022
-
January 3, 2023
