ក្រសួងអប់រំ យុវជន និងកីឡា បានអះអាងថា នៅក្នុងឆ្នាំ២០២២ ការបណ្ដុះបណ្ដាលជំនាញមុខរបរផ្សេងៗដល់អ្នកសិក្សាក្រៅប្រព័ន្ធមានចំនួន ១០ ៤៧៩នាក់។ ចំនួននេះកើនឡើង ២ ២០៩នាក់ បើធៀបនឹងឆ្នាំ២០២១ មានចំនួន ៨ ២៧០នាក់។
របាយការណ៍របស់ក្រសួងអប់រំ បានបញ្ជាក់ថា ក្នុងចំនួនអ្នកសិក្សាក្រៅប្រព័ន្ធទាំង ១០ ៤៧៩នាក់ គឺមាន ១០ ១៦៨នាក់គ្រប់គ្រងដោយក្រសួងអប់រំ និង៣២១នាក់គ្រប់គ្រងដោយដៃគូអភិវឌ្ឍ។
របាយការណ៍បន្តថា អ្នកសិក្សាក្រៅប្រព័ន្ធចំនួន ២ ៣៨៣នាក់ បានបង្កើតមុខរបរផ្ទាល់ខ្លួន បន្ទាប់ពីពួកគេបញ្ចប់សិក្សាលើជំនាញកុំព្យូទ័រ កាត់ដេរ សំអាងកាយ ភ្លេងប្រពៃណី កែសម្ផស្ស ភ្លេងពិណពាទ្យ ចិញ្ចឹមមាន់ទា កសិកម្មចម្រុះ និងជំនាញផ្សេងៗទៀត។
លោកស្រី ឃួន វិច្ឆិកា អ្នកនាំពាក្យក្រសួងអប់រំ យុវជន និងកីឡា បានប្រាប់ខ្មែរថាមស៍ថា ការសិក្សាក្រៅប្រព័ន្ធមាន
ចែងនៅក្នុងកម្មវិធីសិក្សាជាផ្លូវការរបស់ក្រសួងអប់រំ យុវជន និងកីឡា ហើយមានគោលដៅជាពិសេសសម្រាប់ផ្តល់ចំណេះដឹងឱ្យប្រជាពលរដ្ឋគ្រប់ប្រភេទក្លាយទៅជាអ្នកចេះអក្សរ លេខនព្វន្ត និងមានជំនាញមុខរបរមួយច្បាស់លាស់។
លោកស្រីបន្តថា គោលនយោបាយជាតិស្តីពីការសិក្សាពេញមួយជីវិតមានចក្ខុវិស័យអភិវឌ្ឍប្រជាជនកម្ពុជាគ្រប់រូប ជាពិសេសសម្រាប់ក្រុមដែលបាត់បង់ឱកាសឱ្យមានវិជ្ជាសម្បទា បំណិនសម្បទា កាយសម្បទា និងគុណសម្បទា ដើម្បីរួមចំណែកបង្កើតសេដ្ឋកិច្ចនិងលើកកម្ពស់សុខដុមនីយកម្មជីវិតបុគ្គល គ្រួសារ និងសង្គមតាមរយៈការផ្ដល់ឱកាសសិក្សាពេញមួយជីវិត។
លោកស្រីមានប្រសាសន៍ថា៖ «មជ្ឈមណ្ឌលសិក្សាសហគមន៍ត្រូវបានចាត់ទុកជាសាលារៀនសម្រាប់អ្នកសិក្សាក្រៅប្រព័ន្ធ។ បច្ចុប្បន្ននេះ មជ្ឈមណ្ឌលសិក្សាសហគមន៍មានចំនួន៣៤៨កន្លែងនៅទូទាំងប្រទេស។ តាមផែនការរបស់ក្រសួងអប់រំសម្រាប់អនុវត្តក្នុងឆ្នាំខាងមុខ គឺកៀគរធនធានសម្រាប់ជំរុញដំណើរការការប្រែក្លាយមជ្ឈមណ្ឌលសិក្សាសហគមន៍ទៅជាមជ្ឈមណ្ឌលសិក្សាពេញមួយជីវិត ដើម្បីផ្ដល់ជំនាញសម្បូរបែបដល់សហគមន៍»។
លោកស្រីបន្ថែមថា៖ «ក្នុងឆ្នាំ២០២៣នេះ ក្រសួងអប់រំបានប្រែក្លាយមជ្ឈមណ្ឌលសិក្សាចំនួនបីកន្លែងនៅខេត្តបន្ទាយមានជ័យនិងខេត្តកំពតឱ្យទៅជាមណ្ឌលសិក្សាពេញមួយជីវិត។ មជ្ឈមណ្ឌលសិក្សាពេញមួយជីវិតចំនួនប្រាំមួយទៀតនៅកំពង់ស្ពឺនិងប៉ៃលិនបានសាងសង់រួចរាល់ និងកំពុងសាងសង់ថ្មីចំនួនពីរកន្លែងថែមទៀតនៅខេត្តបន្ទាយមានជ័យ»។
លោក គួច ម៉េងលី អ្នកជំនាញអប់រំដ៏ល្បី បានយល់ឃើញថា ការបណ្ដុះបណ្ដាលជំនាញមុខរបរផ្សេងៗដល់អ្នកសិក្សាក្រៅប្រព័ន្ធមានការកើនឡើង គឺបង្ហាញពីចំណុចវិជ្ជមានចំពោះប្រជាជនខ្មែរ ជាពិសេសផ្ដល់ឱកាសដល់ក្រុមបាត់បង់ឱកាស។
លោកបន្តថា នៅពេលប្រជាជនមានកំណើន នោះតម្រូវការរបស់ពួកគេក៏កាន់តែខ្ពស់ ហើយការបើកមជ្ឈមណ្ឌលសហគមន៍ ក៏ដូចជាមជ្ឈមណ្ឌលសិក្សាពេញមួយជីវិតក៏កាន់តែមានតម្រូវការកាន់ច្រើន ជាពិសេសត្រូវការថវិកាច្រើនដើម្បីបង្កើតមជ្ឈមណ្ឌលសិក្សាក្រៅប្រព័ន្ធទាំងនោះ។
លោកបន្ថែមថា បញ្ហានេះទាមទារការចូលរួមពីខាងសហគមន៍និងពីខាងដៃគូវិស័យអប់រំឯកជនជាមួយនឹងវិស័យអប់រំសាធារណៈ ព្រោះនាពេលបច្ចុប្បន្ននេះ ក្រសួងអប់រំ យុវជន និងកីឡា បានពង្រឹងកិច្ចសហប្រតិបត្តិលើការងារនេះនៅមិនទាន់បានទូលំនៅឡើយទេ។
លោកមានប្រសាសន៍ថា៖ «ប្រសិនបើក្រសួងអប់រំពង្រីកកិច្ចសហប្រតិបត្តិការនេះជាមួយវិស័យឯកជនបន្ថែមទៀត ដើម្បីជួយពន្លឿនក្នុងការបំពេញតម្រូវការកាន់តែច្រើនជាងមុន»។
លោកថា៖ «យើងអាចជួយបានច្រើននៅពេលដែលយើងមានសាលាសិក្សាក្រៅប្រព័ន្ធកាន់តែច្រើន ដើម្បីបំពេញនូវចំណុចខ្វះខាតក្នុងវិស័យសាធារណៈ ដែលអាចឱ្យពលរដ្ឋយើងបន្ថែមចំណេះដឹងជំនាញវិជ្ជាជីវៈផ្សេងៗសម្រាប់ពួកគាត់អាចប្រកបការងារនៅក្នុងសហគមន៍»៕