រដ្ឋមន្ត្រីថ្មីរបស់ក្រសួងមុខងារសាធារណៈ លោក ហ៊ុន ម៉ានី បានប្ដេជ្ញាកែទម្រង់និងពង្រឹងរដ្ឋបាលសាធារណៈប្រកបដោយប្រសិទ្ធភាពនិងប្រសិទ្ធផល ព្រមទាំងការលើកស្ទួយនិងការធ្វើទំនើបកម្មស្ថាប័នសាធារណៈស្របតាមយុទ្ធសាស្ត្របញ្ចកោណរបស់រដ្ឋាភិបាលអាណត្តិទី៧។
ការកំណត់បេសកកម្មសម្រាប់ការដឹកនាំក្រសួងរបស់រដ្ឋមន្ត្រីថ្មីនេះធ្វើនៅក្នុងឡើងនៅក្នុងពិធីសំណេះសំណាលជាមួយថ្នាក់ដឹកនាំនិងមន្ត្រីនៃក្រសួងមុខងារសាធារណៈប្រមាណមួយពាន់នាក់កាលពីថ្ងៃចន្ទ។
លោក ហ៊ុន ម៉ានី បានលើកឡើងថា ថ្នាក់ដឹកនាំនិងមន្ត្រីក្រសួងមុខងារសាធារណៈក្នុងអាណត្តិកន្លងមកបានបំពេញភារកិច្ចរបស់ខ្លួន ហើយសម្រេចបានសមិទ្ធផលជាច្រើនសម្រាប់វិស័យមុខងារសាធារណៈ។ ចំណែកការជួបជុំគ្នារវាងមន្ត្រីក្រសួងមុខងារសាធារណៈនិងថ្នាក់ដឹកនាំក្នុងអាណត្តិថ្មីនេះ ដើម្បីសាមគ្គីភាពឆ្ពោះទៅកាន់ការបន្តបេសកកម្មការងារកាន់តែស្វាហាប់។
លោកបន្តថា ដោយសារកត្តាដំណើរវិវត្តរបស់សង្គម និងបម្រែបម្រួលស្ថានភាពពិភពលោក ដែលនឹងជះឥទ្ធិពល ដល់សេដ្ឋកិច្ច សង្គម និងនយោបាយបានទាមទារឱ្យមន្ត្រីគ្រប់ស្ថាប័ន ជាពិសេសក្នុង
វិស័យមុខងារសាធារណៈត្រូវបន្តពង្រឹងសមត្ថភាព ហើយតម្រូវការកែទម្រង់ជាបន្តបន្ទាប់ និងជាចាំបាច់ដែលមិនអាចព្រងើយកន្តើយបាន ដើម្បីបន្តនិរន្តរភាពជាតិ។
លោកបាននិយាយថា៖ «វាជាការចាប់ផ្តើមបើកទំព័រថ្មីនៃកិច្ចការងារដែលយើងត្រូវបន្តធ្វើក្នុងជវភាពនៃប្រព័ន្ធតួអង្គតែមួយនិងរបៀបរបបការងារ ទម្លាប់ការងារដែលមានសង្គតភាពរួមគ្នា ដើម្បីបន្ថែមប្រសិទ្ធភាពនិងប្រសិទ្ធផលការងារជូនប្រទេសជាតិនិងមាតុភូមិឱ្យកាន់តែរីកចម្រើន»។
ក្រសួងមុខងារសាធារណៈបង្កើតឡើងដោយរដ្ឋាភិបាលនៅក្នុងនីតិកាលទី៥នៃរដ្ឋសភា តាមរយៈការធ្វើសមាហរណកម្មស្ថាប័នរដ្ឋចំនួនបីបញ្ចូលគ្នា គឺរដ្ឋលេខាធិការដ្ឋានមុខងារសាធារណៈ អគ្គលេខាធិការដ្ឋាននៃក្រុមប្រឹក្សាកំណែទម្រង់រដ្ឋបាល និងសាលាភូមិន្ទរដ្ឋបាល។
ស្ថាប័ននេះបង្កើតឡើង ដើម្បីសម្រេចនូវបេសកកម្មរបស់ខ្លួនសម្រាប់ការដឹកនាំ គ្រប់គ្រង និងអភិវឌ្ឍវិស័យមុខងារសាធារណៈ ដែលមានដើរតួនាទីចូលរួមអភិវឌ្ឍគោលនយោបាយជាតិនានារបស់រដ្ឋាភិបាល ជាពិសេសការងារកំណែទម្រង់រដ្ឋបាលសាធារណៈ។
នាយករដ្ឋមន្ត្រី ហ៊ុន ម៉ាណែត បានថ្លែងក្នុងជំនួបជាមួយកម្មករពីម្សិលមិញថា ការកែទម្រង់លើវិស័យមុខងារសាធារណៈ ក៏ជាវិស័យអាទិភាពទី១ សម្រាប់រដ្ឋាភិបាលអាណត្តិទី៧។ ការជ្រើសរើសមន្រ្ដីរាជការថ្មីតាមរយៈការប្រកួតប្រជែងដោយតម្លាភាពនិងយុត្តិធម៌ ហើយត្រូវជ្រើសរើសត្រូវជំនាញច្បាស់លាស់។
លោកនិយាយថា៖ «ខ្ញុំសុំឱ្យធ្វើការជ្រើសរើសឱ្យបានច្បាស់។ កុំជ្រើសរើសមន្ត្រីកសិកម្មបានមកជាវិស្វករសំណង់ […] ដូច្នេះកំណែទម្រង់មុខងារសាធារណៈ គឺជាអាទិភាពចាំបាច់ដែលយើងត្រូវធ្វើ»។
លោក ឡាំ សុជាតិ នាយកប្រតិបត្តិវិទ្យាស្ថានតស៊ូមតិនិងគោលនយោបាយ (API) បានលើកឡើងថា នេះជាផែនការមួយដ៏ល្អរបស់រដ្ឋមន្ត្រីថ្មីរបស់ក្រសួងមុខងារសាធារណៈ ដើម្បីពង្រឹងការងាររបស់មន្ត្រីរាជការនៅតាមក្រសួងស្ថាប័ននានា។
លោកកត់សម្គាល់ឃើញថា មន្ត្រីរាជការមានចំនួនច្រើន ហើយបច្ចុប្បន្នពួកគេក៏មានប្រាក់បៀវត្សរ៍សមល្មមដែរ។ ដូច្នេះពួកគេគួរមកធ្វើការងារស្របតាមតួនាទីភារកិច្ចរបស់ខ្លួន ដើម្បីរួមគ្នាដោះស្រាយបញ្ហាជូនប្រជាពលរដ្ឋដែលកើតមាននៅតាមមូលដ្ឋាន។
លោកនិយាយថា៖ «ដូចយើងដឹងហើយ ទាំងមន្ត្រីថ្នាក់ដឹកនាំ ថ្នាក់បច្ចេកទេស គឺសុទ្ធតែមានតួនាទីនិងមុខងារត្រូវបំពេញ គឺគួរតែរួមគ្នាបម្រើប្រជាពលរដ្ឋឱ្យបានពេញលេញ។ កុំស៊ីប្រាក់ខែរាស្ត្រហើយអត់ទៅធ្វើការ»៕
Related Posts
- January 20, 2023
- January 10, 2023
- December 19, 2022
- December 13, 2022
