កាលពីរសៀលថ្ងៃព្រហស្បតិ៍ លោកនាយករដ្ឋមន្ត្រី ហ៊ុន សែន បានបង្ហាញសមាសភាពសមាជិករដ្ឋាភិបាលថ្មីដែលនឹងត្រូវបានដឹកនាំដោយកូនប្រុសច្បងរបស់លោក គឺលោកបណ្ឌិត ហ៊ុន ម៉ាណែត។
បន្ទាប់ពីជួបសំណេះសំណាលជាមួយសមាជិករដ្ឋាភិបាលនៅទីស្នាក់ការគណបក្សប្រជាជនកម្ពុជា ក្នុងរាជធានីភ្នំពេញ លោកនាយករដ្ឋមន្រ្តី ហ៊ុន សែន ដែលជាប្រធានគណបក្សប្រជាជនកម្ពុជា បានបញ្ចេញរូបថតនៅលើបណ្ដាញសង្គម ដែលបង្ហាញលោកបណ្ឌិត ហ៊ុន ម៉ាណែត នាយករដ្ឋមន្ត្រីតែងតាំង ថតរូបក្រុមជាមួយសមាជិកគណៈរដ្ឋមន្ត្រីថ្មីរបស់លោក។
យោងតាមសេចក្តីព្រាងបញ្ជីរាយនាមសមាជិកគណៈរដ្ឋមន្ត្រីថ្មីដែលមានអាណត្តិរយៈពេល៥ឆ្នាំ មាននាយករដ្ឋមន្ត្រី១រូប ឧបនាយករដ្ឋមន្ត្រីចំនួន១០រូប ទេសរដ្ឋមន្ត្រីចំនួន១១រូប និងរដ្ឋមន្ត្រីចំនួន៣០រូប។
លោកបណ្ឌិត ហ៊ុន ម៉ាណែត រួមជាមួយនឹងសមាជិកគណៈរដ្ឋមន្ត្រីថ្មីរបសលោកនឹងត្រូវសុំសេចក្តីអនុម័តទុកចិត្តពីរដ្ឋសភា ដែលគ្រោងធ្វើនៅថ្ងៃទី២២ ខែសីហា ដើម្បីក្លាយជានាយករដ្ឋមន្ត្រីថ្មីជាផ្លូវការ ហើយសមាជិកគណៈរដ្ឋមន្រ្តីថ្មីរបស់លោកត្រូវបានរំពឹងថានឹងស្បថចូលកាន់តំណែងនៅថ្ងៃដដែល។
គណបក្សប្រជាជនកម្ពុជាបានទទួលជ័យជម្នះភ្លូកទឹកភ្លូកដីក្នុងការបោះឆ្នោតសកលកាលពីថ្ងៃទី ២៣ ខែកក្កដា ដោយទទួលបានអាសនៈចំនួន ១២០ ក្នុងចំណោម ១២៥ អាសនៈក្នុងរដ្ឋសភា៕ Xinhua