ក្នុងឆមាសទី១ ពាក់កណ្ដាលឆ្នាំ២០២៣ ស្ត្រីមានផ្ទៃពោះ ទៅទទួលសេវាពិនិត្យតាមដានផ្ទៃពោះ និងសម្រាលកូន នៅមន្ទីរពេទ្យគន្ធបុប្ផាទី៣ ខេត្តសៀមរាប កើនឡើង ៣៥ភាគរយ បើប្រៀបរយៈពេលដូចគ្នាកាលពីឆ្នាំ២០២២។
សាស្ត្រាចារ្យ គី សន់ទី ប្រធានមន្ទីរពេទ្យគន្ធបុប្ផា បានឱ្យដឹងថា សម្រាប់ផ្នែកសម្ភព នៃមន្ទីរពេទ្យគន្ធបុប្ផាទី៣ (ពេទ្យជ័យវរ្ម័នទី៧) ស្រ្តីមានផ្ទៃពោះមានចំនួន ៥១ ៦២៩ករណី បានមកពិនិត្យតាមដានផ្ទៃពោះ និងព្យាបាល នៅផ្នែកពិគ្រោះជំងឺក្រៅ នៃមន្ទីរសម្ភព។
វេជ្ជបណ្ឌិតបន្ថែមថា ចំពោះស្ត្រីសម្រាលកូននៅមន្ទីរពេទ្យគន្ធបុប្ឆាទី៣ គឺមានចំនួន ១០ ០៦២នាក់ កើនឡើងចំនួន ៣៥ភាគរយ ប៉ុន្តែអត្រាមរណភាពកុមារក្នុងមន្ទីរពេទ្យនេះមានចំនួន ០,៤ភាគរយប៉ុណ្ណោះ។
ប្រធានមន្ទីរពេទ្យគន្ធបុប្ផា បញ្ជាក់ថា៖ «ការកើនឡើងចំនួនស្ត្រីមានផ្ទៃពោះ មកពិនិត្យ និងសម្រាល នៅមន្ទីរពេទ្យគន្ធបុប្ផាទី៣ គឺដោយសារការស្បើយ នៃការរីករាលដាលជំងឺកូវីដ-១៩ ទើបនាំឱ្យស្រ្តីមានផ្ទៃពោះអាចមកពិនិត្យសុខភាព និងសម្រាល នៅមន្ទីរពេទ្យ ដែលនាំឱ្យមានកំណើនដូចកាលមិនទាន់មានកូវីដ-១៩»។
វេជ្ជបណ្ឌិត គី សន់ទី បន្ថែមថា សម្រាប់ក្នុងខែមិថុនា ឆ្នាំ២០២៣ នៅផ្នែកសម្ភព នៃមន្ទីរពេទ្យគន្ធបុប្ផា
ទី៣ មានស្រ្តីមានផ្ទៃពោះចំនួន ៩ ៥៣៤នាក់ បានមកពិនិត្យតាមដានផ្ទៃពោះ និងព្យាបាល ហើយនៅក្នុងផ្នែកពិគ្រោះជំងឺក្រៅ នៃមន្ទីរសម្ភព គឺចំនួនស្ត្រីសម្រាលកូនមាន ១ ៧៤៣នាក់។
លោក រស់ សីលវ៉ា នាយកប្រតិបត្តិមូលនិធិគន្ធបុប្ផាកម្ពុជា ធ្លាប់ឱ្យដឹងថា រាល់ការលើកកម្ពស់សុខុមាលភាពកុមារ គឺមានសារៈសំខាន់ក្នុងការកសាងធនធានមនុស្សនៅកម្ពុជា ដើម្បីជាទំពាំងស្នងឫស្សីសម្រាប់ប្រទេសជាតិទាំងបច្ចុប្បន្ន និងអនាគត។
លោកបន្ថែមថា បច្ចុប្បន្ន បញ្ហាប្រឈមរបស់មន្ទីរពេទ្យគន្ធបុប្ផា គឺស្ត្រីសម្រាលកូននៅពុំទាន់មានគ្រែសម្រាកគ្រប់គ្រាន់ ហើយអត្រាមរណភាពទារកទើបកើតនៅមន្ទីរពេទ្យគន្ធបុប្ផាភ្នំពេញ នៅមានកម្រិតមួយដែលត្រូវយកចិត្តទុកដាក់បន្ថែម។
លោកថា៖ «បច្ចុប្បន្ន មន្ទីរពេទ្យក៏កំពុងសាងសង់អគារសម្ភពថ្មីមួយ ដែលមានគ្រែសម្រាកចំនួន
១២០គ្រែ នៅមន្ទីរពេទ្យជ័យវរ័្មនទី៧ ខេត្តសៀមរាប និងបានពង្រីកបន្ថែមលើការព្យាបាលជំងឺមហារីកផ្សេងៗលើកុមារ តាមវិធីព្យាបាលដោយថ្មាំគីមីផងដែរ»។
របាយការណ៍របស់មន្ទីរពេទ្យគន្ធបុប្ឆា កាលពីឆ្នាំ២០២២ កុមារមានជំងឺចំនួន ៦៥៩ ៦០៨ករណី ត្រូវបានពិនិត្យព្យាបាលនៅក្នុងផ្នែកពិគ្រោះជំងឺក្រៅ និងកុមារមានជំងឺធ្ងន់ធ្ងរចំនួន ១១៩ ៩៥៨នាក់ បានដាក់ឱ្យសម្រាកព្យាបាលនៅក្នុងមន្ទីរពេទ្យ។
កុមារមានជំងឺគ្រុនឈាមធ្ងន់ធ្ងរចំនួន ៤ ៦៨២នាក់ បានសម្រាកព្យាបាលនៅក្នុងមន្ទីរពេទ្យ និងកុមារចំនួន ២៦ ៦១៣នាក់ ត្រូវបានទទួលការវះកាត់ព្យាបាលនៅក្នុងមន្ទីរពេទ្យ។
របាយការណ៍បន្ថែមថា ចំពោះកុមារចំនួន ១ ០៥៥នាក់ ត្រូវបានទទួលការវះកាត់បេះដូង និងភ្លិតប្រហោង
បេះដូងតាមការឆ្លុះសរសៃឈាម។
ស្ត្រីមានផ្ទៃពោះចំនួន ៩១ ០១៥ករណី បានពិនិត្យតាមដានផ្ទៃពោះ និងព្យាបាល នៅក្នុងផ្នែកពិគ្រោះជំងឺក្រៅក្នុងមន្ទីរសម្ភពនៃមន្ទីរពេទ្យជ័យវរ្ម័នទី៧ និងស្ត្រីសម្រាលកូនមានចំនួន ២២ ៣០១នាក់។
គួររម្លឹកថា មន្ទីរពេទ្យគន្ធបុប្ផាទាំងនៅរាជធានីភ្នំពេញ និងខេត្តសៀមរាប ត្រូវការថវិកាប្រមាណ ៨៤ម៉ឺនដុល្លារ ក្នុងមួយសប្តាហ៍ ឬត្រូវចំណាយប្រមាណ ៤០លានដុល្លារ ក្នុងមួយឆ្នាំ ដើម្បីប្រតិបត្តិការមនុស្សធម៌សង្រ្គោះជីវិតកុមារនៅកម្ពុជា ដោយឥតគិតថ្លៃ៕