លោកនាយករដ្ឋមន្ត្រី ហ៊ុន សែន បានសម្តែងការកោតសរសើរចំពោះគោលនយោបាយឈ្នះ-ឈ្នះរបស់លោក ដែលបានធ្វើអោយប្រទេសជាតិមានវឌ្ឍនភាព និងរីកចម្រើនយ៉ាងឆាប់រហ័ស។
កាលពីព្រឹកម្សិលមិញ លោកនាយករដ្ឋមន្រ្តី ហ៊ុន សែន បានលើកឡើងដូច្នេះ ខណៈដែលឯកអគ្គរដ្ឋទូតចិនប្រចាំកម្ពុជា លោក Wang Wentian បានអញ្ជើញចូលរួមជាអធិបតីក្នុងពិធីសម្ពោធផ្លូវក្រវ៉ាត់ក្រុងទី៣ ប្រវែងប្រមាណ ៥៣គីឡូម៉ែត្រ ទទឹង ២២ម៉ែត្រ តភ្ជាប់រង្វង់មូលមហាវិថីឈ្នះ-ឈ្នះ ក្នុងសង្កាត់ចោមចៅ៣ ខណ្ឌពោធិ៍សែនជ័យ រាជធានីភ្នំពេញ ដល់ផ្លូវជាតិលេខ១ ក្នុងឃុំដីឥដ្ឋ ស្រុកកៀនស្វាយ ខេត្តកណ្តាល ។
លោកបានឆ្លៀតឱកាសថ្លែងអំណរគុណដល់រដ្ឋាភិបាល និងប្រជាជនចិន ដែលបានរួមចំណែកយ៉ាងសំខាន់ក្នុងការអភិវឌ្ឍន៍ប្រទេសកម្ពុជាកន្លងមក ជាពិសេសក្នុងការកសាង និងកែលម្អហេដ្ឋារចនាសម្ព័ន្ធរូបវន្តនៅទូទាំងប្រទេស រួមទាំងផ្លូវក្រវ៉ាត់ក្រុងទី៣ផងដែរ។
គម្រោងសាងសង់ផ្លូវក្រវ៉ាត់ក្រុងទី៣ មានតម្លៃ ២៧៣ លានដុល្លារ បានចាប់ផ្តើមសាងសង់នៅថ្ងៃទី ១៤ ខែមករា ឆ្នាំ ២០១៩ និងបានបញ្ចប់ទាំងស្រុងក្នុងខែមិថុនា ឆ្នាំ ២០២៣ និងត្រូវបានផ្តល់ហិរញ្ញប្បទានសម្បទានពីរដ្ឋាភិបាលចិន រួមជាមួយនឹងថវិការបស់រាជរដ្ឋាភិបាលកម្ពុជា។
ផ្លូវក្រវ៉ាត់ក្រុងទី៣ នឹងរួមចំណែកយ៉ាងសំខាន់ក្នុងការសម្រួលការដឹកជញ្ជូនឆ្លងកាត់ព្រំដែន ជំរុញពាណិជ្ជកម្មអន្តរជាតិ និងប្រែក្លាយតំបន់ជុំវិញទៅជាតំបន់អភិវឌ្ឍន៍។ AKP-L Vy