ក្រសួងអប់រំ យុវជន និងកីឡា លោក ហង់ជួន ណារ៉ុន បានអះអាងថា ការងារអាទិភាពចំនួនបួនចំណុចដែលបានដាក់ចេញដោយរដ្ឋាភិបាល និងបួនចំណុចដែលដាក់ចេញដោយក្រសួងអប់រំនឹងក្លាយជាចលករជួយជំរុញកំណែទម្រង់វិស័យអប់រំក្នុងអាណត្តិទី៧នេះកាន់តែប្រសើរឡើង។
លោករដ្ឋមន្ត្រីអប់រំបានថ្លែងក្នុងបាឋកថាស្ដីពីការសម្រួចអាទិភាពកំណែទម្រង់វិស័យអប់រំ យុវជន និងកីឡាសម្រាប់អាណត្តិទី៧ កាលពីថ្ងៃសៅរ៍ថា អាទិភាពកំណែទម្រង់វិស័យអប់រំដែលដាក់ចេញដោយរដ្ឋាភិបាលនៅក្នុងយុទ្ធសាស្ត្របញ្ចកោណដំណាក់កាលទី១ គឺចាត់ទុកការអភិវឌ្ឍធនធានមនុស្សជាអាទិភាពដំបូងគេបំផុត និងការសម្រួចអាទិភាពកំណែទម្រង់វិស័យអប់រំឆ្នាំ២០២៣-ឆ្នាំ២០២៥ ។
លោកបានបញ្ជាក់ឱ្យដឹងថា រដ្ឋាភិបាលបានកំណត់អាទិភាពស្នូលចំនួនបួនចំណុច ដើម្បីធ្វើឱ្យកំណែទម្រង់វិស័យអប់រំកាន់តែមានភាពល្អប្រសើរ ហើយក្រសួងអប់រំក៏បានដាក់ចេញអាទិភាពចំនួនបួនចំណុចបន្ថែម ដើម្បីឆ្លើយតបនឹងការអភិវឌ្ឍកំណែទម្រង់វិស័យអប់រំ។
លោកបានពន្យល់ថា អាទិភាពស្នូលចំនួនបួនចំណុចដែលកំណត់ដាក់ចេញដោយរដ្ឋាភិបាល រួមមានការពង្រឹងអភិបាលកិច្ចសាលារៀន គឺជាអាទិភាពស្នូលទី១ ។ អាទិភាពស្នូលទី២ គឺកិច្ចការពិនិត្យ ការកែសម្រួល និងការរៀបចំកម្មវិធីសិក្សានិងសកម្មភាពក្រៅម៉ោងសិក្សាស្របតាមតម្រូវការពង្រឹងចំណេះដឹង វិន័យ សីលធម៌ និងឥរិយាបថរបស់សិស្ស។
លោកបន្តថា អាទិភាពស្នូលទី៣ គឺការលើកកម្ពស់សុខភាពសិក្សាដោយយកចិត្តទុកដាក់លើសុខភាពរបស់សិស្សតាមរយៈកម្មវិធីអាហារូបត្ថម្ភដល់កុមារនិងការត្រួតពិនិត្យគុណភាពចំណីអាហារនៅតាមសាលារៀន។ ចំណែកអាទិភាពស្នូលទី៤ គឺការជំរុញលើកទឹកចិត្តការចូលរួមរបស់អាណាព្យាបាល និងសហគមន៍ក្នុងការអប់រំស្របតាមពាក្យស្លោកភាពជាដៃគូ រដ្ឋ និងសហគមន៍ ដើម្បីការអប់រំ។
លោក ហង់ជួន ណារ៉ុន បានលើកឡើងថា ក្រសួងអប់រំបានបន្ថែមកិច្ចការងារបួនចំណុចទៀត គឺការអប់រំឌីជីថល ការបង្កើតមជ្ឈមណ្ឌលឧត្ដមភាពនៅគ្រឹះស្ថានឧត្ដមសិក្សា ការកសាងប្រព័ន្ធនិងការអភិវឌ្ឍសមត្ថភាព និងការអភិវឌ្ឍការអប់រំកាយនិងកីឡា។
លោកបានមានប្រសាសន៍ថា៖ «ក្នុងការឆ្លើយតបនឹងការអភិវឌ្ឍកំណែទម្រង់វិស័យអប់រំ ការបង្កើតកម្មវិធីលើកកម្ពស់គុណវឌ្ឍិគ្រូបង្រៀន និងគណៈគ្រប់គ្រងសាលារៀន ជាកត្តាចាំបាច់បំផុត ដែលអនុញ្ញាតជូនគ្រូបង្រៀនអាចបង្កើតគំនិតថ្មីៗពាក់ព័ន្ធនឹងការសិក្សារបស់សិស្ស»។
លោកបន្តថា គណៈកម្មការជាតិមួយនឹងត្រូវបង្កើតទ្បើង ដែលដឹកនាំដោយនាយករដ្ឋមន្ត្រី ហ៊ុន ម៉ាណែត ដើម្បីអនុវត្តកំណែទម្រង់វិស័យអប់រំក្នុងគោលដៅធានាប្រសិទ្ធភាព។
លោក គួច ម៉េងលី អ្នកជំនាញអប់រំដ៏ល្បីបានលើកឡើងថា ការធ្វើកំណែទម្រង់ទាំងប្រាំបីចំណុចនេះ ដើម្បីធានាការពង្រឹងគុណភាពអប់រំនៃធនធានមនុស្សទាំងក្នុងវិស័យសាធារណៈនិងវិស័យឯកជន ដែលប្រទេសកំពុងតែតម្រូវការក្នុងការជំរុញសេដ្ឋកិច្ចជាតិ។
លោកយល់ឃើញថា ការធ្វើកំណែទម្រង់ គឺជាការល្អហើយ ប៉ុន្តែក្នុងការងារអទិភាពស្នូលទាំងប្រាំបីចំណុចរបស់រដ្ឋាភិបាលនិងក្រសួងអប់រំ ប្រសិនបើគ្មានការពង្រឹងគុណភាពគ្រូបង្រៀននិងមិនគិតគូរពីប្រាក់បៀវត្សរ៍សមរម្យសម្រាប់គ្រូបង្រៀនស្របតាមអតិផរណាទេ នោះការធ្វើកំណែទម្រង់ប្រាកដជាជួបការបញ្ហារាំងស្ទះដោយអន្លើជាពុំខាន។
លោកបានបញ្ជាក់ថា ការពង្រឹងគ្រូបង្រៀន គឺគួរពង្រីកគ្រឹះស្ថានគរុកោសល្យសម្រាប់បណ្ដុះបណ្ដាលអាជីពគ្រូបង្រៀន និងបង្កើនសិស្សចូលសិក្សាគរុកោសល្យឱ្យបានកាន់តែច្រើន ដើម្បីធានាថាមិនមានការខ្វះខាតគ្រូបង្រៀននៅតាមគ្រឹះស្ថានសិក្សាសាធារណៈនិងគ្រឹះស្ថានសិក្សានៅក្នុងវិស័យឯកជននៅទូទាំងប្រទេស។
លោកបន្តថា៖ «នៅក្នុងប្រទេសកម្ពុជាមានបញ្ហាមួយដែលគេមិនអាចបដិសេធបាន គឺបញ្ហាខ្វះខាតគ្រូដែលមានគរុកោសល្យ»។
លោកបញ្ជាក់ថា ទន្ទឹមនឹងការកែទម្រង់ គឺត្រូវគិតគូរពីប្រាក់បៀវត្សរ៍សមរម្យសម្រាប់គ្រូបង្រៀនដែលសមស្របនឹងអតិផរណារបស់សង្គមនាពេលបច្ចុប្បន្ន។ ប្រសិនបើមិនដំឡើងប្រាក់បៀវត្សរ៍គ្រូ ហើយហាមគ្រូទៅបង្រៀននៅគ្រឹះស្ថានសិក្សាឯកជនទេ គឺពួកគាត់មិនអាចចិញ្ចឹមគ្រួសាររបស់ពួកគាត់បានឡើយ។
លោកបាននិយាយថា៖ «ការកែទម្រង់ទាំងអស់នេះ គឺសុទ្ធតែជាចំណុចល្អដែលខ្ញុំសង្ឃឹមថា រដ្ឋាភិបាលនិងក្រសួងអប់រំផ្ដោតសំខាន់លើការពង្រឹងគុណភាពគ្រូ ដែលជារឿងសំខាន់និងចាំបាច់បំផុត»៕