រដ្ឋាភិបាលក្នុងអាណត្តិថ្មី នីតិកាលទី៧ នឹងបន្តដាក់ឱ្យមាន ឧត្តមក្រុមប្រឹក្សាពិគ្រោះនិងផ្ដល់យោបល់ ដើម្បីជាធាតុចូលពីគ្រប់ភាគីពាក់ព័ន្ធសម្រាប់អភិវឌ្ឍសង្គម និងជាស្មារតីបង្រួបបង្រួមជាតិទាំងបច្ចុប្បន្ន និងអនាគត។
ការប្រកាសដាក់ឱ្យបន្តអាណត្តិឧត្តមក្រុមប្រឹក្សានេះ ធ្វើឡើងបន្ទាប់ពីលោកនាយករដ្ឋមន្ត្រី ហ៊ុន សែន ប្រកាសពីបេក្ខភាពនាយករដ្ឋមន្ត្រីថ្មី គឺលោក ហ៊ុន ម៉ាណែត ដែលនឹងតែងតាំងជំនួសលោកនៅចុងខែសីហាខាងមុខ។
តាមរយៈសារសំឡេងកាលពីម្សិលមិញ បានឱ្យដឹងថា រដ្ឋាភិបាល នីតិកាលទី៧ នឹងកើតមានឡើងក្នុងពេលឆាប់ៗខាងមុខ ប៉ុន្តែរក្សាឱ្យមានឧត្តមក្រុមប្រឹក្សានេះដដែល ដើម្បីជាធាតុចូលសម្រាប់ផ្ដល់យោបល់ក្នុងការអភិវឌ្ឍសង្គមជាតិ។
លោក ហ៊ុន សែន បញ្ជាក់ថា៖ «បន្ទាប់ពីបានពិភាក្សាក្រោយថ្ងៃបោះឆ្នោត យើងពិតជាមានតម្រូវការ ដើម្បីប្រមូលនូវធាតុចូលទាំងអស់ នៃបណ្តាបក្សនយោបាយ បើទោះបីបក្សនយោបាយមានសន្លឹកឆ្នោត មានអាសនៈក្នុងសភា ឬគណបក្សនយោបាយគ្មានអាសនៈនៅក្នុងសភា ដើម្បីចូលរួមកសាងប្រទេសជាតិ។
យោងតាមព្រះរាជក្រឹត្យអាណត្តិរបស់ឧត្តមក្រុមប្រឹក្សាពិគ្រោះនិងផ្តល់យោបល់ ក៏នឹងចប់នៅពេលដែលរដ្ឋាភិបាលថ្មីចូលកាន់តំណែង។
លោកបន្តថា ការរៀបចំឱ្យមាន ឧត្តមក្រុមប្រឹក្សាដដែល សម្រាប់នីតិកាលទី៧ គឺធ្វើឡើងដូចទៅនឹងរដ្ឋាភិបាលនីតិកាលទី៦ ដោយដាក់ឱ្យមានប្រធានប្រតិភូ អនុប្រធានប្រតិភូ និងមានលេខាធិការ ដែលគណបក្សនយោបាយមួយ ត្រូវមានឥស្សរជនចំនួន ៣រូប ចូលរួម។
លោក ហ៊ុន សែន បញ្ជាក់ថា រដ្ឋាភិបាលអាណត្តិថ្មី នឹងស្នើសុំព្រះមហាក្សត្រ ដើម្បីចេញព្រះរាជក្រឹត្យបង្កើតឱ្យមាន ឧត្តមក្រុមប្រឹក្សាពិគ្រោះ និងផ្ដល់យោបល់។
លោកថ្លែងថា ចំពោះគណបក្សនយោបាយ ដែលមិនបានចូលរួមបោះឆ្នោត ប៉ុន្តែបានចុះឈ្មោះស្របតាមច្បាប់នៅក្រសួងមហាផ្ទៃ អាចនឹងមានលទ្ធភាពចូលរួមបានដែរ ប៉ុន្តែរឿងនេះនាយករដ្ឋមន្ត្រីថ្មី និងរដ្ឋាភិបាលថ្មី គឺជាអ្នកសម្រេច។
លោកបន្ថែមថា៖ «[,,,] យើងចង់ប្រមូលផ្តុំធនធានមនុស្ស ធនធានខួរក្បាល ដើម្បីបន្តការអភិវឌ្ឍប្រទេស បន្ថែមលើសពីនេះ ក៏ជាស្មារតីបង្រួបបង្រួមជាតិមួយ ឆ្ពោះទៅរកអនាគតដ៏រុងរឿង»។
អគ្គលេខាធិការរងគណបក្សខ្មែររួបរួមជាតិ លោក ទិប ទាវ ប្រាប់កាសែតខ្មែរថាមស៍ កាលពីម្សិលមិញថា នៅពេលនេះ ការសម្រេចចិត្តចូល ឬមិនចូលជាសមាជិក ឧត្តមក្រុមប្រឹក្សាពិគ្រោះនិងផ្ដល់យោបល់ គណបក្សលោកមិនទាន់សម្រេចជាផ្លូវការនៅឡើយ ព្រោះរង់ចាំការសម្រេចចិត្តរួមរបស់ថ្នាក់ដឹកនាំគណបក្សជាមុនសិន។
លោកបន្ថែមថា កាលរដ្ឋាភិបាល អាណត្តិទី៦ គណបក្សខ្មែររួបរួមជាតិ បានសម្រេចចូលរួមជាសមាជិក ដើម្បីរួមចំណែកអភិវឌ្ឍសង្គម និងប្រទេសជាតិ តែសម្រាប់អាណត្តិទី៧ រង់ចាំលទ្ធផលប្រជុំរួមរបស់បក្ស និងការរៀបចំរដ្ឋាភិបាលថ្មីផ្លូវការជាមុនសិន។
លោកបញ្ជាក់ថា ការដាក់ឱ្យមាន ឧត្តមក្រុមប្រឹក្សា ពិតជាមានសារៈសំខាន់ បើរដ្ឋាភិបាលឱ្យតម្លៃទៅលើអ្នកផ្ដល់យោបល់ ប៉ុន្តែនឹងគ្មានន័យ បើរដ្ឋាភិបាលមិនយកចិត្តទុកដាក់ និងមិនស្ដាប់មតិយោបល់របស់ បក្សដ៏ទៃ។
លោក ពេជ្រ ស្រស់ ប្រធានគណបក្សយុវជនកម្ពុជា លើកឡើងថា គណបក្សលោកមិនទាន់សម្រេចយ៉ាងណានោះទេ ព្រោះគ្រាន់តែជាសាររបស់លោកនាយករដ្ឋមន្ត្រី ប៉ុន្តែមិនទាន់ទទួលបានការជូនដំណឹងដល់គណបក្សនយោបាយនៅឡើយ។
លោកបន្ថែមថា៖ «បើសិនជូនដំណឹងដល់គណបក្សនយោបាយជាផ្លូវការ យើងនឹងប្រជុំគណអចិន្ត្រៃយ៍ថា តើគួរចូល ឬយ៉ាងណា? គឺផ្អែកលើគណអចិន្ត្រៃយ៍គណបក្ស។ យើងមិនទាន់សម្រេចយ៉ាងណាទេ? រង់ចាំភាពច្បាស់លាស់ជាមុនសិន ហើយក្បាលម៉ាស៊ីនប្រទេស ក៏មិនទាន់បានរៀបចំជាផ្លូវការនៅឡើយដែរ»។
លោកបន្ថែមថា ឆ្លងកាត់បទពិសោធកាលពីអាណត្តិទី៦ លោកមើលឃើញថា ការដាក់ឱ្យមាន ឧត្តមក្រុមប្រឹក្សាពិគ្រោះនិងផ្ដល់យោបល់ នៅអាណត្តិទី៧ ពិតជាមានសារៈសំខាន់ដល់សង្គមជាតិ និងប្រជាពលរដ្ឋ ដើម្បីប្រជាពលរដ្ឋងាយស្រួលស្វែងរកអ្នកជួយសង្គ្រោះដល់ពួកគេបាន។
គួររម្លឹកថា ឧត្តមក្រុមប្រឹក្សាពិគ្រោះនិងផ្តល់យោបល់ បង្កើតឡើងក្រោយការបោះឆ្នោតជាតិ នីតិកាលទី៦ កាលពីឆ្នាំ២០១៨។ ក្នុងនីតិកាលទី៦ មានតែគណបក្សប្រជាជនកម្ពុជាប៉ុណ្ណោះ ដែលទទួលបានអាសនៈក្នុងរដ្ឋសភា៕