អភិបាលរាជធានីភ្នំពេញ និងជាប្រធានគណៈបញ្ជាការឯកភាពរាជធានីភ្នំពេញ លោក ឃួង ស្រេង បានជំរុញកងកម្លាំង និងអាជ្ញាធរខណ្ឌទាំង១៤ ដើម្បីត្រៀមពង្រឹងការពារសន្តិសុខសណ្ដាប់ធ្នាប់ អនាម័យបរិស្ថាន ក្នុងព្រឹត្តិការណ៍ប្រជុំសភា និងស្បថចូលកាន់តំណែងរដ្ឋាភិបាល នីតិកាលទី៧។
ការប្រជុំសភា និងស្បថចូលកាន់តំណែងរដ្ឋាភិបាលសម្រាប់អាណត្តិថ្មី ដែលនឹងធ្វើឡើងនៅក្នុងបរិវេណរដ្ឋសភា និងព្រះបរមរាជវាំង នាថ្ងៃទី២១ និងថ្ងៃទី២២ ខែសីហា ឆ្នាំ២០២៣ ខាងមុខ។
ក្នុងកិច្ចប្រជុំគណៈបញ្ជាការឯកភាពរាជធានីភ្នំពេញ ដែលមានការចូលរួមពីកងកម្លាំងចំណុះរដ្ឋបាលរាជធានី និងអភិបាលខណ្ឌទាំង១៤ នៅសាលារាជធានីភ្នំពេញ កាលពីថ្ងៃចន្ទ លោក ឃួង ស្រេង បានអរគុណដល់កងកម្លាំង និងអាជ្ញាធរទាំង១៤ខណ្ឌ ដែលបានការពារសន្តិសុខ សណ្ដាប់ធ្នាប់ ក្នុងព្រឹត្តិការណ៍បោះឆ្នោតបានយ៉ាងល្អ និងទទួលបានជោគជ័យ។
លោកបានបន្តជំរុញកងកម្លាំង និងអាជ្ញាធរទូទាំងខណ្ឌ ក្នុងភូមិសាស្ត្ររាជធានីភ្នំពេញ ត្រូវយកចិត្តទុកដាក់ការពារសន្តិសុខ សុវត្ថិភាព ដល់ភាគីពាក់ព័ន្ធបន្ថែមទៀត។
លោក ឃួង ស្រេង បញ្ជាក់ថា៖ «នៅថ្ងៃទី២១ និងថ្ងៃទី២២សីហា យើងនឹងមានព្រឹត្តិការណ៍ធំៗចំនួនពីរ គឺប្រជុំសភា និងស្បថចូលកាន់តំណែងសម្រាប់រាជរដ្ឋាភិបាល អាណត្តិថ្មី ខ្ញុំសូមស្នើសមត្ថកិច្ចរៀបចំផែនការ ការពារសន្តិសុខ សណ្ដាប់ធ្នាប់ ឱ្យបានល្អប្រសើរបំផុត»។
លោកបន្ថែមថា ក្នុងនាមជាកងកម្លាំង និងអាជ្ញាធរ ត្រូវជំរុញកិច្ចការពារសន្តិសុខ សណ្តាប់ធ្នាប់ ជាមួយនឹងការរឹតបន្តឹង និងចុះពិនិត្យជាតិអាកុលនៅក្នុងមូលដ្ឋានឱ្យបានជាប់ជាប្រចាំ ជាពិសេសត្រៀមបង្ការគ្រោះអគ្គីភ័យ នៅក្នុងភូមិសាស្ត្រ និងទីតាំងសំខាន់ៗមួយចំនួនផងដែរ។
លោក ឃួង ស្រេង បញ្ជាក់ថា ចំពោះអាជ្ញាធរខណ្ឌដែលស្ថិតក្នុងដែនសមត្ថកិច្ចនៃភូមិសាស្ត្ររដ្ឋសភា និងព្រះបរមរាជវាំង ត្រូវរៀបចំសណ្ដាប់ធ្នាប់ អនាម័យបរិស្ថានឱ្យបានល្អ ជាពិសេសរក្សាឱ្យបាននូវសន្តិសុខសុវត្ថិភាពខ្ពស់បំផុតសម្រាប់ថ្ងៃទី២១ និងថ្ងៃទី២២សីហា។
អភិបាលរងរាជធានីភ្នំពេញ លោក កើត ឆែ ប្រាប់កាសែតខ្មែរថាមស៍ កាលពីម្សិលមិញថា ចំពោះចំនួនកងកម្លាំង និងអាជ្ញាធរ ដែលត្រូវចុះការពារក្នុងថ្ងៃប្រជុំសភា និងស្បថចូលកាន់តំណែងរដ្ឋាភិបាលថ្មី គឺមិនអាចបញ្ជាក់ចំនួនជាសាធារណៈបានឡើយ ព្រោះជាកិច្ចការសម្ងាត់របស់អាជ្ញាធរ។
លោកបន្ថែមថា សម្រាប់ព្រឹត្តិការណ៍សំខាន់ៗទាំងពីរខាងលើនេះ កម្លាំងសមត្ថកិច្ចជំនាញ ដែលស្ថិតនៅទូទាំងខណ្ឌក្នុងរដ្ឋបាលរាជធានីភ្នំពេញ គឺមានសារៈសំខាន់បំផុត ដើម្បីការពារសុខសុវត្ថិភាព ដល់ភាគីពាក់ព័ន្ធ ជាពិសេសធានាឱ្យដំណើរការប្រជុំ និងស្បថចូលកាន់តំណែងរដ្ឋាភិបាលថ្មី ប្រព្រឹត្តទៅដោយរលូន និងមានរបៀបរៀបរយល្អ។
លោក កើត ឆែ បញ្ជាក់ថា៖ «កម្លាំងសមត្ថកិច្ចយើងមានសារៈសំខាន់បំផុតក្នុងការការពារសន្តិសុខ សុវត្ថិភាពជូនថ្នាក់ដឹកនាំគ្រប់ជាន់ថ្នាក់ ជាពិសេសក្នុង
ព្រឹត្តិការណ៍សំខាន់ៗដែលកើតឡើងកាលពីកន្លងមក ហើយតែងអនុវត្តទទួលបានជោគជ័យខ្ពស់»។
អ្នកនាំពាក្យ និងជាអគ្គលេខាធិការដ្ឋាននៃរដ្ឋសភា លោក ឡេង ប៉េងឡុង បានឱ្យដឹងថា នៅថ្ងៃទី២១ ខែសីហា ឆ្នាំ២០២៣ ចាប់ពីម៉ោង៨:០០ព្រឹក រដ្ឋសភានីតិកាលទី៧ នឹងបើកសម័យប្រជុំដំបូងក្រោមព្រះរាជអធិបតីភាពព្រះករុណាព្រះបាទសម្ដេចព្រះបរមនាថ នរោត្តម សីហមុនី ព្រះមហាក្សត្រ។
លោកបន្ថែមថា ក្នុងកិច្ចប្រជុំខាងលើនេះ នឹងមានវត្តមានឥស្សរជនជាន់ខ្ពស់ អង្គទូតប្រចាំកម្ពុជា និងតំណាងអង្គការក្រៅរដ្ឋាភិបាលមួយចំនួន ក៏ត្រូវបានអញ្ជើញចូលរួមជាកិត្តិយសផងដែរ។
លោកបន្តថា ក្នុងសម័យប្រជុំរដ្ឋសភាលើកទី១ នីតិកាលទី៧ នឹងសម្រេចអំពីសុពលភាពនៃអាណត្តិរបស់សមាជិកនីមួយៗ ព្រមទាំងមានការអនុម័តបទបញ្ជាផ្ទៃក្នុងនៃរដ្ឋសភា នីតិកាលទី៧ ក្នុងសម័យប្រជុំដំបូងនេះផងដែរ។
លោក ឡេង ប៉េងឡុង បញ្ជាក់ថា៖ «ចំពោះថ្ងៃទី២២ ខែសីហា ឆ្នាំ២០២៣ ចាប់ពីម៉ោង៨:០០ព្រឹក សម័យប្រជុំរដ្ឋសភាលើកទី១ នីតិកាលទី៧ នឹងបន្តដើម្បីបោះឆ្នោតជ្រើសតាំង ប្រធាន អនុប្រធាន នៃរដ្ឋសភា ហើយប្រធាន និងអនុប្រធានគណៈកម្មការជំនាញទាំងអស់នៃរដ្ឋសភា និងផ្តល់សេចក្តីទុកចិត្តចំពោះរាជរដ្ឋាភិបាលថ្មី»។
កាលពីដើមខែសីហា ព្រះករុណាព្រះបាទសម្តេចព្រះបរមនាថ នរោត្តម សីហមុនី ទ្រង់ផ្ញើព្រះរាជសារកោះហៅបេក្ខជនជាប់ឆ្នោតទាំង១២៥រូប ដើម្បីចូលរួមប្រជុំរដ្ឋសភា លើកដំបូងសម្រាប់នីតិកាលទី៧ នៅថ្ងៃទី២១ ខែសីហា ឆ្នាំ២០២៣ ខាងមុខ៕