សិស្សកម្ពុជាជាង៤០ម៉ឺននាក់ ទទួលប្រយោជន៍ពីការកែលម្អដំណើរការសាលារៀន អគារសិក្សា គ្រឿងបរិក្ខារ និងការបង្កើនសមត្ថភាពគ្រូ តាមរយៈគម្រោង កែលម្អគុណភាពអប់រំមធ្យមសិក្សា របស់ធនាគារពិភពលោក។
របាយការណ៍របស់ធនាគារពិភពលោក ចេញផ្សាយកាលពីថ្ងៃពុធ បានឱ្យដឹងថា សិស្សចំនួន ៤៥៣ ៨៣៨ នាក់ ដែលមានក្មេងស្រី ៥២ភាគរយ ទទួលប្រយោជន៍ពីការកែលម្អដំណើរការរបស់សាលារៀន អគារសិក្សា គ្រឿងបរិក្ខារ និងការបង្កើនសមត្ថភាពគ្រូបង្រៀន ព្រមទាំងគណៈគ្រប់គ្រងសាលា ដើម្បីគុណភាពអប់រំកាន់តែប្រសើរឡើង។
របាយការណ៍បន្តថា គម្រោងរបស់ធនាគារខាងនេះ បានក្លាយជាខ្នងបង្អែកមួយសម្រាប់កម្មវិធីបង្រៀន និងរៀនពីចម្ងាយ ឬកិច្ចខិតខំប្រឹងប្រែងនានារបស់កម្ពុជា ក្នុងអំឡុងពេលដែលសាលារៀនទូទាំងប្រទេសត្រូវបានបិទទ្វារដោយសារជំងឺរាតត្បាត។
របាយការណ៍បន្តថា កុមារកម្ពុជាជាង ៦០ភាគរយដែលមានអាយុចូលរៀនកម្រិតមធ្យមសិក្សាចំណេះទូទៅ (អាយុ១២-១៤ ឆ្នាំ) តែមិនបានចូលរៀនក្នុងឆ្នាំ២០១៥ ហើយចំនួន ២១ភាគរយបានបោះបង់ការសិក្សាចោលទាំងស្រុង។
ប្រហែល ៧០ភាគរយនៃសាលារៀន គឺមិនមានថ្នាក់រៀនគ្រប់គ្រាន់។ កង្វះគ្រូបង្រៀន ក៏ជាបញ្ហាធ្ងន់ធ្ងរ ហើយគ្រូបង្រៀនភាគច្រើន មានគុណវុឌ្ឍិទាប ដែលនាំឱ្យលទ្ធផលសិក្សារបស់សិស្សក៏មានកម្រិតទាបដែរ។
របាយការណ៍បន្ថែមថា មានតែ ៨ភាគរយ នៃសិស្សដែលមានអាយុ ១៥ឆ្នាំ អាចអានក្នុងកម្រិតអប្បរមា ដែលស្របតាមការកំណត់នៃគោលដៅអភិវឌ្ឍន៍ប្រកបដោយចីរភាព (SDG) ហើយមានតែ ១០ភាគរយប៉ុណ្ណោះចេះមុខវិជ្ជាគណិតវិទ្យា ក្នុងកម្រិតអប្បបរមា។
ធនាគារពិភពលោកបញ្ជាក់ថា គម្រោងបានបង្កើតឱ្យមានតម្រូវការខ្ពស់លើការអប់រំប្រកបដោយគុណភាពពីមាតាបិតា សហគមន៍ លោកគ្រូ អ្នកគ្រូ ថ្នាក់ដឹកនាំសាលា និងអ្នកតំណាងសហគមន៍ ក៏ទទួលបានការបណ្តុះបណ្តាល និងការណែនាំគ្រប់ជ្រុងជ្រោយ ដើម្បីអនុវត្តតួនាទីរបស់ខ្លួនឱ្យកាន់តែមានប្រសិទ្ធភាព។
ជាពិសេសការទូទាត់ផ្តល់ថវិកាផ្អែកលើសមិទ្ធផលការងារ បានផ្តល់នូវភាពបត់បែន និងប្រសិទ្ធភាពនៃការចំណាយ ដូចជាការផ្តល់ហិរញ្ញប្បទាននៃការចំណាយ លើវិធានការឆ្លើយតបនឹងជំងឺរាតត្បាត។
ក្នុងនោះមានដូចជា ការផ្តល់កុំព្យូទ័រយួរដៃដល់គ្រូបង្រៀន ដើម្បីអនុវត្តការបង្រៀនពីចម្ងាយ ផលិតវីដេអូបង្រៀន ការផ្តល់សាច់ប្រាក់សម្រាប់សេវាអុីនធិណិត ការបណ្តុះបណ្តាលលើជំនាញបច្ចេកវិទ្យាព័ត៌មាន និងសារគមនាគមន៍ (ICT) ជាដើម។
អ្នកនាំពាក្យក្រសួងអប់រំ យុវជន និងកីឡា លោក រស់ សុវាចារ បានឱ្យដឹងថា ចំពោះឥទ្ធិពលនៃគម្រោងខាងលើនេះ បានជំរុញកំណើនប្រជាជនដែលទទួលបានការអប់រំ និងមានជំនាញកាន់តែប្រសើរនៅគ្រប់ មជ្ឈដ្ឋានទាំងអស់ នៃប្រជាជនកម្ពុជា ជាពិសេសសិស្សនារី និងសិស្សមកពីតំបន់ដាច់ស្រយាល និងតំបន់ជួបការលំបាក។
លោកបន្ថែមថា គម្រោងខាងលើនេះ បានរួមចំណែកយ៉ាងសំខាន់ក្នុងការលើកស្ទួយគុណភាព និងសមធម៌នៃការអប់រំនៅកម្ពុជា ជាមួយការអប់រំនៅមធ្យមសិក្សាកាន់តែមានប្រសិទ្ធភាព និងប្រព័ន្ធគ្រប់គ្រងការអប់រំកាន់តែរឹងមាំឡើង។
យុវតី ភាព ស៊ីណាត និស្សិតផ្នែកគ្រប់គ្រង និងរដ្ឋបាលដីធ្លី នៅសាកលវិទ្យាល័យភូមិន្ទកសិកម្ម បានឱ្យដឹងថា បើគ្មានគម្រោង កែលម្អគុណភាពអប់រំមធ្យមសិក្សា របស់ធនាគារពិភពលោក ស៊ីណាត ក៏មិនអាចមានលទ្ធភាពបន្តសិក្សារហូតបច្ចុប្បន្ននេះដែរ។
និស្សិតរូបនេះនិយាយថា៖ «ខ្ញុំពិតជាមិននឹកស្មានថា ខ្ញុំសម្រេចបានជោគជ័យ និងមានថ្ងៃនេះនៅក្នុងជីវិតរបស់ខ្ញុំទេ បើគ្មានការជួយជ្រោមជ្រែងពីលោកគ្រូ អ្នកគ្រូ នាយកសាលា និងគណៈកម្មាធិការគ្រប់គ្រងសាលារបស់ខ្ញុំ»។
និស្សិត ភាព ស៊ីណាត ជាសិស្សក្រីក្រមកពីសាលាមួយក្នុងគម្រោងខាងលើនេះ នាងក៏ធ្លាប់បោះបង់ការសិក្សាម្តងមកហើយ។ តាមរយៈជំនួយរបស់គម្រោង មិនត្រឹមតែនាំនាងឱ្យត្រឡប់មករៀនវិញ តែបានជួយនាងប្រឹងប្រែងរៀនរហូតបាននិទ្ទេសល្អទៀតផង។
របាយការណ៍ធនាគារពិភពលោក បញ្ជាក់ថា សាលារៀនចំនួន ៩៤ ក្នុងចំណោម ១០០ សម្រេចបានស្តង់ដារអប្បបរមានៃស្តង់ដារសាលារៀនដែលមានប្រសិទ្ធភាព ដោយមានការចូលរួមគាំទ្រយ៉ាងសកម្មពីសំណាក់មាតាបិតា និងសហគមន៍ក្នុងការរៀបចំផែនការកែលម្អសាលារៀន ដើម្បីត្រួតពិនិត្យការអនុវត្តការងាររបស់សាលា និងទាក់ទាញធនធានហិរញ្ញវត្ថុពីខាងក្រៅ ។
គម្រោងនេះបានជួយបង្កើតអនុវិទ្យាល័យថ្មីចំនួន ៣០ ដែលបានទទួលសិស្សចូលរៀនប្រមាណ ៦ ១៧៥នាក់។ គម្រោងក៏បានសាងសង់អគារសិក្សាថ្មីចំនួន ៧៦ ដែលមាន ៣៩៥បន្ទប់ ជួសជុលថ្នាក់រៀនបាន ៤៣៧បន្ទប់ រៀបចំបន្ទប់ពិសោធន៍ចំនួន ២៧៦ និងសាងសង់ផ្ទះចំនួន ៣០ខ្នង សម្រាប់គ្រូបង្រៀននៅតាមសាលាក្នុងតំបន់ដាច់ស្រយាល។
គម្រោងនេះបាន បង្កើនគុណវុឌ្ឍិរបស់ថ្នាក់ដឹកនាំសាលាចំនួន ៦៣៦នាក់ និងគ្រូបង្រៀនចំនួន ២,៣៤៨នាក់ បណ្តុះបណ្តាលសមាជិកគណៈកម្មាធិការគ្រប់គ្រងសាលារៀន និងអ្នកតំណាងសហគមន៍សរុបបាន ៤៣៥នាក់ និងបានផ្តល់ការបង្វឹកនៅនឹងកន្លែងដល់សាលារៀនទាំងអស់ក្នុងគម្រោង។
លើសពីនេះ សម្រាប់គម្រោងខាងលើបានសាយភាពទៅដល់អនុវិទ្យាល័យចំនួន ១០២ និងសាលាបឋមសិក្សាចំនួន ១៦៦ ដែលយកគំរូតាមសាលាគោលដៅរបស់គម្រោង៕