កម្ពុជាបានណែនាំដល់អ្នកនេសាទនិងពលរដ្ឋផ្អាកធ្វើដំណើរតាមសមុទ្រចាប់ពីថ្ងៃទី១៦ ដល់ថ្ងៃទី២០ ខែកក្កដា ដោយសារប្រទេសកម្ពុជាកំពុងរងឥទ្ធិពលនៃខ្យល់ព្យុះទីហ្វុង។
តាមការព្យាកររបស់ក្រសួងធនធានទឹកនិងឧតុនិយមកាលពីថ្ងៃទី១៤ ខែកក្កដា បានឱ្យដឹងថា ពេលនេះប្រទេសកម្ពុជាកំពុងទទួលរងប៉ះពាល់ដោយព្យុះទីហ្វុងនៅប្រទេសហ្វីលីពីន ដែលនឹងបោកបក់លើសមុទ្រចិនខាងត្បូង ហើយបន្តឆ្ពោះទៅភាគខាងជើងប្រទេសវៀតណាមកំលុងថ្ងៃទី១៩ ខែកក្កដា។
ក្រសួងធនធានទឹកបានបន្តថា ស្ថានភាពបែបនេះនឹងធ្វើឱ្យមានភ្លៀងធ្លាក់ពីតិចទៅមធ្យមនៅតំបន់ទំនាប និងពីមធ្យមទៅបង្គួរនៅតំបន់ខ្ពង់រាបក្នុងប្រទេសកម្ពុជា។
ក្រសួងធនធានទឹកបានបន្ថែមថា ចំពោះខេត្តជាប់មាត់សមុទ្រ ផ្ទៃមេឃអាប់អួរនឹងមានភ្លៀងធ្លាក់ក្នុងកម្រិតពីមធ្យមទៅច្រើនចាប់ពីថ្ងៃទី១៦ ដល់ថ្ងៃទី២០ ខែកក្កដា។
ក្រសួងធនធានទឹកនិងឧតុនិយមបានបញ្ជាក់ថា៖ «នៅសមុទ្រនឹងមានភ្លៀង ខ្យល់បក់បោក និងរលកខ្ពស់ៗ»។
ក្រសួងបានអំពាវនាវដល់ប្រជាជនមានការប្រុងប្រយ័ត្នខ្ពស់ដើម្បីចៀសផុតពីគ្រោះថ្នាក់ផ្សេងៗដែលបង្កឡើងដោយបាតុភូតធម្មជាតិ។
ផ្អែកតាមការព្យាករនេះ លោក គួច ចំរើន អភិបាលខេត្តព្រះសីហនុកាលថ្ងៃសុក្រ បានណែនាំដល់ប្រតិបត្តិករ
ទូកទេសចរណ៍ ទូកតាក់ស៊ី និងអ្នកនេសាទផ្អាកការធ្វើដំណើរទៅសមុទ្រក្នុងរយៈពេលនេះ ដើម្បីជៀសវាងជួបគ្រោះថ្នាក់យថាហេតុណាមួយដោយសារបញ្ហាអាកាសធាតុ។
ក្នុងឃ្លីបវីដេអូរយៈពេលជិតពីរនាទី ដែលបង្ហោះលើទំព័រហ្វេសប៊ុកផ្លូវការរបស់រដ្ឋបាលខេត្ត លោក គួច
ចំរើន បាននិយាយថា ក្នុងកំលុងពេលនេះ គឺរលកសមុទ្រមានកម្ពស់ខ្ពស់ ខ្យល់បក់បោកខ្លាំង ដែលអាចបង្កហានីភ័យដល់អ្នកធ្វើដំណើរតាមផ្លូវទឹកសមុទ្រ។
លោកបានបញ្ជាទៅអាជ្ញាធរទាំងអស់ដែលពាក់ព័ន្ធនឹងករណីនេះត្រូវចាត់វិធានការទប់ស្កាត់កុំឱ្យមានការធ្វើដំណើរចេញទៅសមុទ្រ។
លោកបញ្ជាក់ថា៖ «សម្រាប់អ្នកដែលបានជាជ្រុលធ្វើដំណើរចេញទៅ [សមុទ្រ] ត្រូវស្វែងរកទំនាក់ទំនងតាមសហគមន៍ ដើម្បីពួកគាត់បានវិលត្រឡប់មកកាន់ដីគោកវិញ។ ដើម្បីរក្សាសុវត្ថិភាព សូមមានការយកចិត្តទុកដាក់ទាំងនៅលើដីគោកនិងដីកោះមានការប្រុងប្រយ័ត្នខ្ពស់ដើម្បីបញ្ចៀសកុំឱ្យមានគ្រោះថ្នាក់»។
លោក ឡុង ឌីម៉ង់ អភិបាលរងខេត្តព្រះសីហនុ បានបញ្ជាក់បន្ថែមពីម្សិលមិញថា នៅពេលនេះនៅក្នុងខេត្តព្រះសីហនុទាំងមូល ជាពិសេសនៅលើផ្ទៃសមុទ្រកំពុងមានខ្យល់បក់បោកខ្លាំងនិងរលកខ្ពស់ៗ។
លោកថា អាជ្ញាធរមានសមត្ថកិច្ចបានហាមឃាត់ជាដាច់ខាតនូវការធ្វើដំណើរតាមសមុទ្រនៅក្នុងខណៈនេះ ទោះបីជាអាកាសធាតុដ៏អាក្រក់វាបានបង្កផលប៉ះពាល់ដល់ការធ្វើដំណើរទេសចរ និងរបបនេសាទរបស់ប្រជាពលរដ្ឋយ៉ាងណាក៏ដោយ។
លោកបាននិយាយថា៖ «យើងមិនអាចឱ្យធ្វើចរាចរនៅតាមទឹក [សមុទ្រ] បានទេ ព្រោះរលកខ្ពស់ៗ
ណាស់។ ទោះក្រុមហ៊ុនទេសចរណ៍ដឹកអ្នកដំណើរចង់បានផលចំណេញនៅពេលនេះមានបំណងដឹកភ្ញៀវ ក៏យើងមិនអនុញ្ញាតដែរ ពីព្រោះវាបង្កហានីភ័យខ្លាំងណាស់»។
ក្នុងខេត្តព្រះសីហនុមានតំបន់ទេសចរណ៍តាមឆ្នេរនិងកោះដែលមានអំណោយផលពីធម្មជាតិកំពុងទាក់ទាញទេសចរជាតិនិងអន្តរជាតិ។ នៅទីនោះមានឆ្នេរនិងប្រជុំកោះជាច្រើន ដូចជាឆ្នេរអូរឈើទាល ឆ្នេរឯករាជ្យ ឆ្នេរសុខា ឆ្នេរឡូងសិត កោះរ៉ុង កោះរ៉ុងសន្លឹម កោះសង្សារ កោះពស់ កោះក្របី កោះពូលូវៃ កោះត្រងោល កោះព្រីង កោះឆ្ឆាម កោះតាងជាដើម។
រដ្ឋបាលខេត្តនេះកំពុងទាក់ទាញវិនិយោគិនមកអភិវឌ្ឍតំបន់សក្តានុពលទាំងនោះទៅជាតំបន់ទេសចរណ៍ធម្មជាតិជាបន្តបន្ទាប់។ ជាមួយនឹងគ្នានេះ អាជ្ញាធរខេត្តព្រះសីហនុក៏មានគម្រោងបង្កើតសារមន្ទីរសង្គ្រាមបាតសមុទ្រ និងរៀបចំខ្សែទស្សនាផ្កាថ្ម ត្រី សេះសមុទ្រ និងជីវៈចម្រុះផ្សេងទៀតដែលមាននៅបាតសមុទ្រទីនោះ៕