ក្រសួងការងារនិងបណ្ដុះបណ្ដាលវិជ្ជាជីវៈបានច្រានចោលរបាយការណ៍ថ្មីមួយ ដែលចេញផ្សាយដោយអង្គការក្រៅរដ្ឋាភិបាលនិងសហជីពចំនួនបួនស្ថាប័នដែលបានលើកឡើងពីការបាត់បង់ប្រាក់ឈ្នួលនៅក្នុងវិស័យវាយនភណ្ឌកាត់ដេរនៅក្នុងប្រទេសកម្ពុជា។
លោក កត្តា អន អ្នកនាំពាក្យក្រសួងការងារនិងបណ្ដុះបណ្ដាលវិជ្ជាជីវៈ បាននិយាយពីម្សិលមិញថា៖ «ការរកឃើញរបស់អង្គការនិងសហជីពតាមរយៈរបាយការណ៍របស់ខ្លួន យើងខ្ញុំមិនដឹងថាគាត់ប្រើវិធីសាស្ត្រ និងសូចនាករក្នុងការប្រមូលនិងវាយតម្លៃទិន្នន័យបែបណានោះទេ»។
លោកបន្តថា៖ «យើងសង្កេតឃើញថា ក្នុងអំឡុងពេលដែលពិភពលោកទទួលរងវិបត្តិជំងឺកូវីដ១៩ និងសង្គ្រាមរូស្ស៊ីនិងអ៊ុយក្រែន
ដែលជាទូទៅពិភពលោកទាំងមូលបានរងគ្រោះផ្នែកសេដ្ឋកិច្ច ជាពិសេសសង្វាក់ផលិតកម្ម ការនាំចេញ ការព្យួរការងារ និងប្រាក់ចំណូល»។
លោកបានថ្លែងថា នៅកម្ពុជាក៏មានការធ្លាក់ចុះម៉ោងការងារនិងប្រាក់ឈ្នួលខ្លះផងដែរ ព្រោះថាប្រជាជនកាត់បន្ថយការចំណាយ ការធ្លាក់នៃការបញ្ជាទិញលើវិស័យ
វាយនភណ្ឌកាត់ដេរ ផលិតស្បែកជើង និងផលិតផលិតផលធ្វើដំណើរនិងកាបូប។
លោកបានបន្ថែមថា បើពិនិត្យមើលការនាំចេញក្នុងវិស័យនេះរបស់បណ្តាប្រទេសប្រកួតប្រជែងរបស់កម្ពុជាក៏បានធ្លាក់ចុះ លើកលែងតែប្រទេសបង់ក្លាដែសដែលមានការកើនឡើងតិចតួច។ ជាក់ស្តែង ការនាំចេញរបស់ប្រទេសឥណ្ឌូនេស៊ីបានធ្លាក់ចុះ១៩,២ភាគរយ (៥ខែដើមឆ្នាំ) ស្រីលង្កាធ្លាក់ចុះ
៤,៦ភាគរយ (៥ខែដើមឆ្នាំ) និងវៀតណាម ធ្លាក់ចុះ១៥,៧ភាគរយ (៦ខែដើមឆ្នាំ) ដែលការធ្លាក់ចុះនេះចាប់ផ្តើមតាំងពីត្រីមាសទី៣ ឆ្នាំ២០២២ មកម៉្លេះ។
លោក កត្តា អន បានលើកឡើងថា សម្រាប់កម្ពុជា ការនាំចេញផលិតផលវាយនភណ្ឌ កាត់ដេរ ស្បែកជើង ផលិតផលធ្វើដំណើរ និងកាបូបរបស់កម្ពុជានៅឆ្នាំ២០២១ បានកើនឡើងពី១១,២ប៊ីលានដុល្លារអាមេរិក ដល់ ១២,៨ប៊ីលានដុល្លារអាមេរិកក្នុងឆ្នាំ
២០២២ ឬកើនឡើង១៤,៥ភាគរយ។
លោកបន្ថែមថា ក្នុងរយៈពេល៦ខែដើមឆ្នាំ២០២៣ ការនាំចេញមានទំហំទឹកប្រាក់ប្រមាណជា៥,៣ ប៊ីលានដុល្លារអាមេរិក ថយចុះ១៨,៦ភាគរយធៀបទៅនឹង៦ខែដើមឆ្នាំ២០២២។
បើតាមអ្នកនាំពាក្យដដែល កំលុងពេលវិបត្តិកូវីដ១៩ រដ្ឋាភិបាលបានបើកផ្តល់ប្រាក់ឧបត្ថម្ភដល់កម្មករនិយោជិត ដែលរងការព្យួរកិច្ចសន្យាការងារចំនួនជាង៣៥ម៉ឺននាក់ ដែលបានចំណាយថវិការជាតិសរុបចំនួនជាង
១៣៤ប៊ីលានដុល្លារអាមេរិក និងបានបើកផ្តល់ប្រាក់ឧបត្ថម្ភក្រោមកម្មវិធីជំនួយសង្គមដល់កម្មករនិយោជិតក្នុងវិស័យកាត់ដេរ ដែលរងផលប៉ះពាល់ដោយការបិទខ្ទប់ចំនួនជាង៣៤ម៉ឺននាក់។ ដោយវិបត្តិសេដ្ឋកិច្ចសាកល រដ្ឋាភិបាលបានសម្រេចបើកផ្តល់ប្រាក់ឧបត្ថម្ភម្ដងទៀតចាប់ពីថ្ងៃទី១ ខែមេសា ឆ្នាំ២០២៣មក ដែលគិតត្រឹមថ្ងៃទី២២ ខែកញ្ញា ឆ្នាំ២០២៣ នេះមានកម្មករនិយោជិតប្រមាណជាង៤ម៉ឺននាក់បានទទួលប្រាក់ឧបត្ថម្ភនេះ ដែលស្មើថវិកា ប្រមាណ២លានដុល្លារអាមេរិក។
ក្រសួងការងារនិងបណ្តុះបណ្តាលវិជ្ជាជីវៈ បានបញ្ជាក់ថា ខ្លួនបានចូលរួមចំណែកយ៉ាងសកម្មជាមួយរដ្ឋាភិបាលក្នុងការអនុវត្តយុទ្ធសាស្ត្របញ្ចកោណ-ដំណាក់កាលទី១ ដោយខិតខំប្រឹងប្រែងប្រកបដោយភាពបុរេសកម្ម ដើម្បីត្រឡប់ទៅរកមាគ៌ានៃកំណើននិងការអភិវឌ្ឍ។
អង្គការសង់ត្រាល់ សហព័ន្ធសហជីពប្រជាធិបតេយ្យកម្មករកាត់ដេរកម្ពុជា និងសហព័ន្ធសហជីពកម្មករកម្ពុជាកាលពីថ្ងៃអាទិត្យ បានចេញផ្សាយរបាយការណ៍ថ្មី ដែលនិយាយអំពីការបាត់បង់ប្រាក់ឈ្នួលនៅក្នុងវិស័យវាយនភណ្ឌកាត់ដេរនៅក្នុងប្រទេសកម្ពុជា។
ក្នុងរបាយការណ៍នេះរកឃើញបញ្ហាសំខាន់ៗចំនួនបួន។ ទី១ប្រាក់ឈ្នួលប្រចាំខែធ្លាក់ចុះ គឺចាប់តាំងពីឆ្នាំ២០២០ ដោយមិនគិតបញ្ចូលប្រាក់ថែមម៉ោង។ បើទោះបីជាប្រាក់ឈ្នួលអប្បបរមាមានការកើនឡើងចំនួន ១០ដុល្លារនៅក្នុងចន្លោះឆ្នាំ២០២០-២០២៣ ប៉ុន្តែកម្មករភាគច្រើនបានផ្ដល់ចម្លើយថា ឥឡូវនេះពួកគាត់រកកម្រៃបានតិចជាងកាលពីឆ្នាំ២០២០ មុនពេលរងការប៉ះទង្គិចពីជំងឺកូវីដ-១៩។
ទី២ការងារថែមម៉ោងធ្លាក់ចុះជាង៦០ភាគរយតាំងពីឆ្នាំ២០២០មក។ ប្រាក់ឈ្នួលថែមម៉ោងដែលកម្មករធ្លាប់រកបាន គឺធ្លាក់ចុះពីចំនួន៣៦ដុល្លារក្នុងមួយខែកំលុងមុនពេលមានវិបត្តិកូវីដ ហើយថយមកត្រឹម១២ដុល្លារក្នុងមួយខែនៅឆ្នាំ២០២៣នេះ។
ចំណែកទី៣ បំណុលកើនឡើង ៩១ភាគរយនៃកម្មករដែលបានចូលរួមសម្ភាសន៍ប្រមាណជាង៣០០នាក់។ ពួកគាត់មានកម្ចីយ៉ាងហោចណាស់មួយកន្លែង ហើយ៧០ភាគរយនៃអ្នកទាំងនោះលើកឡើងថា ការរាតត្បាតជំងឺកូវីដ ក៏ជាមូលហេតុមួយធ្វើឱ្យបំណុលកើនឡើងដែរ។
បន្ថែមពីនេះរបាយការណ៍ក៏បានរកឃើញក្រុមហ៊ុនម៉ាកល្បីៗចំនួនប្រាំមួយ គឺ Adidas Nike Target USA GAP Puma Levi Strauss បានជំពាក់ប្រាក់កម្មករកម្ពុជាទាំងប្រាក់ឈ្នួលនិងប្រាក់បំណាច់បញ្ចប់កិច្ចសន្យាប្រមាណជាង៣០០លានដុល្លារ
(៣៤២.៥) នៅរវាងឆ្នាំ២០២១-២០២២ កំលុងពេលវិបត្តិកូវីដ១៩៕