ក្រសួងបរិស្ថានមានគម្រោងប្រែក្លាយអតីតបន្ទាយឆាកស្ដេចកនជារមណីយដ្ឋានធម្មជាតិប្រវត្តិសាស្ត្រក្នុងខេត្តត្បូងឃ្មុំ បន្ទាប់ពីរដ្ឋមន្ត្រីក្រសួងបរិស្ថាន លោក អ៊ាង សុផល្លែត ពិនិត្យឃើញពីសក្ដានុពលស្រូបទាញទេសចរ ដើម្បីបង្កើនសេដ្ឋកិច្ចពលរដ្ឋក្នុងខេត្តត្បូងឃ្មុំ។
លោក អ៊ាង សុផល្លែត រដ្ឋមន្ត្រីក្រសួងបរិស្ថាន ពីថ្ងៃអាទិត្យបានដឹកនាំក្រុមការងារចុះត្រួតពិនិត្យទីតាំងអតីតបន្ទាយឆាកស្តេចកន
ដើម្បីអភិវឌ្ឍជាតំបន់ទេសចរណ៍ធម្មជាតិប្រវត្តិសាស្ត្រ ដែលស្ថិតនៅទួលព្រះធាតុធំ ក្នុងភូមិយៀកត្បូង ឃុំដំរិល ស្រុកអូរាំងឪ ខេត្តត្បូងឃ្មុំ។
លោក អ៊ាង សុផល្លែត រដ្ឋមន្ត្រីក្រសួងបរិស្ថាន បានប្រាប់ខ្មែរថាមស៍ពីម្សិលមិញថា នៅតំបន់នោះស្ទឹងបន្ទាយឆាក និងទួលអតីតបន្ទាយឆាកស្ដេចកន ដែលមានគន្លងផ្លូវតភ្ជាប់ទៅកាន់តំបន់ដទៃៗទៀត។ ជារៀងរាល់ឆ្នាំ ប្រជាជនតែងតែប្រារព្ធពិធីបុណ្យអុំទូកនៅស្ទឹងបន្ទាយឆាក ដើម្បីអបអរសាទរព្រះរាជពិធីបុណ្យអុំទូក អកអំបុក សំពះព្រះខែ និងបណ្តែតប្រទីបពះតាមប្រពៃណីជាតិខ្មែរ។
លោកបានបន្តថា ក្រសួងបរិស្ថានបានពិនិត្យឃើញតំបន់នេះមានសក្ដានុពល ដែលអាចពង្រីកទៅជាតំបន់ទេសចរណ៍ធម្មជាតិប្រវត្តិសាស្ត្រ។ ទន្ទឹមនឹងនេះ ក្រសួងកំពុងជំរុញការអភិវឌ្ឍតភ្ជាប់ទៅកាន់តំបន់ដទៃៗទៀតដែលជាគន្លងផ្លូវស្ដេចកនកាលពីអតីតកាល ហើយក៏ចង់តភ្ជាប់តំបន់នេះជាមួយតំបន់ទេសចរណ៍ធម្មជាតិវប្បធម៌នៅវត្តព្រះធាតុបាស្រី ដែលស្ថិតនៅក្នុងឃុំព្រះធាតុ ស្រុកអូររាំងឪ ខេត្តត្បូងឃ្មុំ។
លោកបានបញ្ជាក់ថា៖ «នេះគ្រាន់តែជាការពិនិត្យនិងសិក្សាពីសក្ដានុពលនៅឡើយទេ ប៉ុន្តែអ្វីដែលសំខាន់នោះ គឺក្រសួងបរិស្ថានកំពុងសិក្សា ដើម្បីរៀបចំតំបន់ទេសចរណ៍វប្បធម៌ធម្មជាតិដោយភ្ជាប់ពីតំបន់មួយទៅតំបន់មួយឱ្យមានរចនាសម្ព័ន្ធប្រទាក់ក្រឡាគ្នា ឬហៅថា របៀងទេសចរណ៍ធម្មជាតិដែលប្រជាពលរដ្ឋកម្ពុជាយើង រួមជាមួយទេសចរអន្តរជាតិអាចមកទស្សនាពីតំបន់ទេសចរណ៍ធម្មជាតិវប្បធម៌មួយទៅតំបន់ទេសចរណ៍ធម្មជាតិវប្បធម៌មួយទៀតដោយភាពសប្បាយរីករាយ»។
ការចុះពិនិត្យតម្រាយផ្លូវលើទួលព្រះធាតុធំនេះ លោករដ្ឋមន្ត្រីក្រសួងបរិស្ថានបានដាក់ចេញទិសដៅអាទិភាពទាក់ទងនឹងវិស័យបរិស្ថាន និងការអភិវឌ្ឍប្រកបដោយចីរភាពតាមរយៈការដាំដើមឈើ ដើម្បីបង្កើនគម្របព្រៃឈើឱ្យបានយ៉ាងហោចណាស់៦០ភាគរយ បង្កើនហិរញ្ញប្បទានចីរភាព និងបៃតង ដើម្បីធានាចីរភាពបរិស្ថាន និងការរៀបចំខ្លួនឆ្លើយតបនឹងការប្រែប្រួលអាកាសធាតុ ព្រមទាំងលើកកម្ពស់សេដ្ឋកិច្ចបៃតង។
លោក ធុយ ចាន់ធួន អ្នកជំនាញបុរាណវិទ្យា បានលើកឡើងថា ប្រសិនបើក្រសួងបរិស្ថានជួយអភិវឌ្ឍតំបន់ទាំងនេះ គឺពិតជាប្រសើរណាស់ ព្រោះតំបន់នោះជាតំបន់ពេញដោយមនុស្សច្រើនកុះករនៅពេលបុណ្យចូលឆ្នាំប្រពៃណីជាតិ ក៏ដូចជាបុណ្យបិណ្ឌភ្ជុំជាដើម។
លោកបញ្ជាក់ថា នៅតំបន់នោះ គឺជាអតីតរាជធានីឥន្ទ្របុរៈប្រហែលរជ្ជការព្រះបាទសូរ្យវរ្ម័នទី១ ឬឥន្ទ្រវរ្ម័នទី១ ស្ថិតក្នុងបន្ទាយព្រៃគនរក្នុងដែលមានទំហំប្រមាណជាពីរគីឡូម៉ែត្របួនជ្រុង។
លោកថា៖ «ក្រោយមកអតីតរាជធានីបុរាណនេះត្រូវបានជួសជុលឡើងវិញនៅក្នុងរជ្ជការស្ដេចកនរវាងសតវត្សរ៍ទី១៦ ឬទី១៧។ បន្ទាប់ពីជួសជុលរួចហើយ ស្ដេចកនបានយកទីតាំងនោះធ្វើជាបន្ទាយរបស់ខ្លួន»។
លោកបានបន្ថែមថា៖ «តំបន់នោះមានបរិស្ថានល្អ ដែលសក្ដានុពលសម្រាប់ការអភិវឌ្ឍវិស័យកសិឧស្សាហកម្មផងដែរ»៕