ក្រសួងសុខាភិបាលបានព្រមានជាថ្មីពីការកើនឡើងជំងឺគ្រុនឈាន និងអំពាវនាវដល់ប្រជាពលរដ្ឋប្រុងប្រយ័ត្នដោយបង្ការសុខភាពពីការឆ្លងជំងឺឈាម ដើម្បីចូលរួមទប់ស្កាត់ការផ្ទុះឡើងជំងឺគ្រុនឈាមទ្រង់ទ្រាយធំនៅក្នុងសហគមន៍។
ការព្រមាននេះដោយសារឆ្នាំនេះជាឆ្នាំដែលជំងឺគ្រុនឈាមត្រូវកើនឡើងខ្ពស់ខុសប្រក្រតី ព្រោះរៀងរាល់ប្រាំទៅប្រាំមួយឆ្នាំមានវដ្ដនៃការកើនឡើងជំងឺគ្រុនឈាមម្ដង។
ក្រសួងសុខាភិបាលបានចេញសេចក្ដីណែនាំកាលពីថ្ងៃព្រហស្បត្តិ៍ថា ជំងឺគ្រុនឈាមអាចកើតមានលើមនុស្សគ្រប់វ័យតាមរយៈការខាំចម្លងដោយមូសខ្លាញីដែលចូលចិត្តពងកកើតជាដង្កូវទឹកនៅទីកន្លែងដែលមានទឹកដក់រងថ្លាគ្មានក្លិន ដូចជាឧបករណ៍ទាំងឡាយណាដែលដក់ទឹក ជាពិសេសសម្បកកង់រថយន្ត ម៉ូតូ ក្រឡ កំប៉ុង ចាន កែវដែលទុកឬបោះចោលពាសវាលពាសកាលបង្កើតជាប្រភពដក់ទឹកនិងជម្រកសត្វមូស។
ក្រសួងសុខាភិបាលបានបញ្ជាក់ថា អ្នកកើតជំងឺនេះជាទូទៅមានរោគសញ្ញាគ្រុនក្តៅខ្លួនខ្លាំងភ្លាមៗចាប់ពី៣៩ ទៅ៤០អង្សារសេ។ ដូច្នេះប្រសិនបើពលរដ្ឋមានរោគសញ្ញាគ្រុនក្ដៅបែបនេះត្រូវប្រញាប់ស្វែងរកការពិគ្រោះយោបល់និងពិនិត្យព្យាបាលនៅតាមមន្ទីរពេទ្យឱ្យបានឆាប់តាមដែលអាចធ្វើទៅបាន។
ជាមួយនឹងគ្នានេះក្រសួងសុខាភិបាលបានណែនាំឱ្យពលរដ្ឋគ្រប់រូបបង្ការចំពោះជំងឺគ្រុនឈាម ហើយអំពាវនាវដល់ពលរដ្ឋទាំងអស់ រួមទាំងអាជ្ញាធរមូលដ្ឋានចូលរួមចលនាកាត់បន្ថយនិងទប់ស្កាត់ការកកើតសត្វមូសដោយប្រកាន់ខ្ជាប់នូវគោលជំហរនិងវិធានការប្រាំចំណុច។
វិធានការទី១ គឺណែនាំឱ្យរួមគ្នាកម្ចាត់ដង្កូវទឹកនៅតាមទីកន្លែងទាំងឡាយដែលមានទឹកដក់ និងសម្អាតឧបករណ៍សម្រាប់ដាក់ទឹកប្រើប្រាស់រៀងរាល់មួយសប្ដាហ៍ម្ដង ហើយត្រូវសហការជាមួយបណ្តាញសុខាភិបាលនៅតាមមូលដ្ឋាន ដើម្បីដាក់ថ្នាំបាណកឃាដសម្លាប់ដង្កូវទឹកនៅក្នុងអាងទឹក ពាងទឹក និងកន្លែងដែលស្តុកទឹក។
វិធានការទី២ គឺណែនាំម្ចាស់ការដ្ឋានសំណង់ រួមទាំងកម្មករដែលកំពុងបំពេញការងារនៅតាមការដ្ឋានសំណង់ទាំងអស់ត្រូវសម្អាតបរិវេណការដ្ឋានសំណង់របស់ខ្លួន ជាពិសេសត្រូវលុបបំបាត់វត្ថុដក់ទឹកនិងថ្លុកដក់ទឹក។ ទន្ទឹមនឹងនេះក្រសួងសុខាភិបាលបានណែនាំមន្ទីរសុខាភិបាលទាំងអស់ត្រូវសហការជាមួយអាជ្ញាធរពាក់ព័ន្ធ ដើម្បីចុះត្រួតពិនិត្យនៅតាមការដ្ឋានសំណង់ជំរុញការអនុវត្តការងារនេះឱ្យមានប្រសិទ្ធភាព។
វិធានការទី៣ គឺណែនាំម្ចាស់អាជីវកម្មទាំងឡាយដែលប្រកបរបរពាក់ព័ន្ធនឹងសម្បកកង់យានយន្តត្រូវគ្រប់គ្រងសម្បកកង់ទាំងនោះកុំឱ្យដក់ទឹក ពោលគឺត្រូវមានវិធីសាស្រ្តគ្រប់គ្រងសម្បកកង់ដោយសុវត្ថិភាពគ្មានសត្វមូសកកើត។
វិធានការទី៤ គឺណែនាំដល់ប្រជាជនគ្រប់រូបត្រូវប្រកាន់ខ្ជាប់ទម្លាប់រស់នៅស្អាត ផ្ទះមានអនាម័យ ផ្ទះមានពន្លឺចេញចូលគ្រប់គ្រាន់ និងទុកដាក់របស់របរសម្លៀកបំពាក់ប្រកបដោយសណ្តាប់ធ្នាប់។ ជាងនេះទៅទៀត គឺត្រូវលុបបំបាត់ព្រៃស៊ុបទ្រុបជុំវិញផ្ទះ ត្រូវស្លៀកសម្លៀកបំពាក់ជិតរាងកាយនៅពេលថ្ងៃ និងត្រូវដេកក្នុងមុងជាប្រចាំ ហើយមិនត្រូវអង្គុយលេងនៅជិតទីកន្លែងងងឹតៗឡើយ។
ចំណែកវិធានការទី៥ គឺណែនាំឱ្យប្រញាប់នាំអ្នកជំងឺទៅរកសេវាពិនិត្យនិងព្យាបាលមណ្ឌលសុខភាព មន្ទីរពេទ្យដែលនៅជិតបំផុតជាបន្ទាន់នៅក្នុងករណីមានរោគសញ្ញាក្តៅខ្លួនខ្លាំងភ្លាមៗ។
របាយការណ៍កម្មវិធីជាតិប្រយុទ្ធនឹងជំងឺគ្រុនឈាមនៃក្រសួងសុខាភិបាល បានបង្ហាញថា ក្នុងរយៈពេល៦ខែដើមឆ្នាំនេះ កម្ពុជាមានជំងឺគ្រុនឈាមប្រមាណជាង ៤ ៦០០ករណី និងមានអ្នកស្លាប់ដោយសារជំងឺនេះមានចំនួន១០ករណី។ ចំនួនកើនឡើងខ្លាំងបើធៀបនឹងរយៈពេលដូចគ្នាកាលពីឆ្នាំ២០២២។
ក្នុងឆ្នាំ២០២៣នេះ រាជធានីខេត្តដែលមានករណីជំងឺគ្រុនឈាមច្រើនជាងគេ គឺនៅភ្នំពេញ កណ្តាល ត្បូងឃ្មុំ បន្ទាយមានជ័យ និងខេត្តសៀមរាប។
លោក ងី មានហេង ប្រធានមន្ទីរសុខាភិបាលរាជធានីភ្នំពេញបានបញ្ជាក់ថា មន្ត្រីជំនាញសហការជាមួយនឹងអាជ្ញាធរមូលដ្ឋានបានអប់រំប្រពលរដ្ឋនៅតាមសហគមន៍៕