ក្នុងរយៈពេលប៉ុន្មានថ្ងៃចុងក្រោយនេះ ប្រជាពលរដ្ឋជាច្រើនគ្រួសារ ស្ថិតក្នុងខេត្តចំនួន៩ បានរងគ្រោះជំនន់ទឹកភ្លៀង ដែលបណ្ដាលឱ្យលិចផ្ទះ លិចសាលារៀន ស្លាប់មនុស្ស និងមានមនុស្សរងរបួសមួយចំនួន។
លោក គន់ គីម អនុប្រធានទី១ គណៈកម្មាធិការជាតិគ្រប់គ្រងគ្រោះមហន្តរាយ បានឱ្យដឹងថា រយៈពេលប៉ុន្មានថ្ងៃចុងក្រោយនេះ មានគ្រោះទឹកជំនន់ដោយសារទឹកភ្លៀងកើតឡើងក្នុងខេត្តចំនួន៩ ប៉ុន្តែគ្មានផលប៉ះពាល់ និងខូចខាតធ្ងន់ធ្ងរច្រើននោះទេ។
លោកបន្ថែមថា គិតត្រឹមថ្ងៃទី១ ខែសីហា ឆ្នាំ២០២៣ ខេត្តជួបបញ្ហាជំនន់ទឹកភ្លៀង មានខេត្តកំពង់ស្ពឺ កោះកុង កែប កំពត ព្រះសីហនុ មណ្ឌលគិរី រតនគិរី ព្រះវិហារ និងសៀមរាប។
លោកបន្ថែមថា ចំពោះខេត្តកំពត គឺមានស្លាប់ចំនួនពីរនាក់ ដោយសារទៅបោះតង់នៅកន្លែងប្រឈមទឹកជន់ខ្លាំង។
លោកបន្តថា បច្ចុប្បន្ន គណៈកម្មាធិការគ្រប់គ្រងគ្រោះមហន្តរាយថ្នាក់ជាតិ និងខេត្ត បានចាត់មន្ត្រីចុះពិនិត្យ ចែកជំនួយនៅទីតាំងខ្លះ និងតាមដានសភាពការណ៍ជាប្រចាំ។
អ្នកនាំពាក្យគណៈកម្មាធិការជាតិគ្រប់គ្រងគ្រោះមហន្តរាយ លោក សុទ្ធ គឹមកុលមុនី បានឱ្យដឹងថា ជំនន់ទឹកភ្លៀងបង្កមកពីមានភ្លៀងធ្លាក់ជាប់គ្នាចាប់ពីថ្ងៃទី២៧កក្កដា ដែលប៉ះពាល់ទៅតំបន់មួយចំនួននៃខេត្តព្រះសីហនុ កែប កំពត និងខេត្តកោះកុង ដែលបណ្ដាលឱ្យលិចផ្ទះប្រជាពលរដ្ឋ សាលារៀន ផ្លូវជាតិ និងផ្លូវលំមួយចំនួន បង្កឱ្យអាកខានដល់ការធ្វើដំណើរផងដែរ។
លោកបន្តថា ចំពោះក្នុងភូមិសាស្ត្រខេត្តកំពត បានបង្កផលប៉ះពាល់ដល់ប្រជាពលរដ្ឋក្រុងកំពត ស្រុកទឹកឈូរ និងស្រុកកំពង់ត្រាច ជាង ៤ ៤០០គ្រួសារ ដែលបណ្ដាលឱ្យលិចផ្ទះជាង ១ពាន់ខ្នង សាលារៀន ៤អគារ ស្លាប់មនុស្សពីរនាក់ របួស២នាក់ និងជួយសង្គ្រោះ ៤១នាក់។
អ្នកនាំពាក្យខាងលើបន្ថែមថា ចំពោះខេត្តកោះកុង ក៏មានលិចផ្ទះពលរដ្ឋជាច្រើនខ្នងផងដែរ។ ចាប់តាំងពីមានជំនន់ទឹកភ្លៀង រហូតដល់បច្ចុប្បន្ន អាជ្ញាធរបន្តតាមដានស្ថានភាពទឹកភ្លៀងធ្លាក់បន្ថែម ហើយគណៈកម្មាធិការជាតិគ្រប់គ្រងគ្រោះមហន្តរាយ ក៏បានត្រៀមខ្លួនរួចជាស្រេច ដើម្បីជួយអន្តរាគមន៍នៅគ្រប់ទីកន្លែងដែលងាយរងគ្រោះ។
លោក សុទ្ធ គឹមកុលមុនី បញ្ជាក់ថា៖ «នៅតាមរាជធានីខេត្ត គណៈកម្មការគ្រប់គ្រងគ្រោះមហន្តរាយ បានត្រៀមរៀបចំទីទួលសុវត្ថិភាព និងមធ្យោបាយ ដើម្បីជួយសង្គ្រោះ ហើយយើងក៏សូមអំពាវនាវដល់អាជ្ញាធរ បន្តតាមដានការជូនដំណឹងពីក្រសួងស្ថាប័នជំនាញពាក់ព័ន្ធបញ្ហាអាកាសធាតុ ដើម្បីរៀបចំត្រៀមជូនដំណឹងទៅប្រជាពលរដ្ឋនៅតាមមូលដ្ឋានឱ្យមានការប្រុងប្រយ័ត្ន»។
លោក ជា ច័ន្ទកញ្ញា អភិបាលស្រុកស្រែអំបិល ខេត្តកោះកុង បានឱ្យដឹងថា ចាប់ពីថ្ងៃទី៣០កក្កដា ដល់ថ្ងៃ១សីហា ភ្លៀងលាយខ្យល់កន្ត្រាក់បង្កជាជំនន់ទឹកភ្លៀង បណ្តាលធ្វើឱ្យប៉ះពាល់ដល់លំនៅដ្ឋានប្រជាពលរដ្ឋចំនួន
១២៥ខ្នង និងបំផ្លាញសម្ភារប្រជាពលរដ្ឋមួយចំនួនធំនៅឃុំ
ជីខលើ និងឃុំដងពែង។
លោកបន្តថា បច្ចុប្បន្ន ក្រុមការងារស្រុកបាននិងកំពុងចុះពិនិត្យស្ថានភាព និងបានរកទីទួលសុវត្ថិភាព ដើម្បីជម្លៀសប្រជាពលរដ្ឋបន្តទៀតទៅរកទីទួលសុវត្ថិភាព និងផ្តល់នៅគ្រឿងឧបភោគបរិភោគមួយចំនួនផងដែរ។
កាលពីថ្ងៃចន្ទ ទំព័រហ្វេសប៊ុកគណៈកម្មាធិការជាតិគ្រប់គ្រងគ្រោះមហន្តរាយ បានឱ្យដឹងថា ជំនន់ទឹកភ្លៀងចាប់ផ្តើមកាលពីថ្ងៃទី២៨កក្កដា ដល់ថ្ងៃទី៣០កក្កដា បានបង្កផលប៉ះពាល់ដល់ប្រជាពលរដ្ឋចំនួន ៩ ០០០គ្រួសារ ស្មើនឹង ១៨ភូមិ ស្ថិតក្នុងក្រុងកែប និងស្រុកដំណាក់ចង្អើរ។
ដោយឡែក ប្រជាពលរដ្ឋរស់នៅក្នុងភូមិឈើនាងខ្ពស់ ឃុំតាំងខ្យា ស្រុកភ្នំស្រួច ខេត្តកំពង់ស្ពឺ ក៏រងគ្រោះដោយសារជំនន់ទឹកភ្លៀងផងដែរ។ ក្នុងនោះ កងសង្គ្រោះគ្រោះមហន្តរាយលេខ៧០៨ បានចេញប្រតិបត្តិការជម្លៀសប្រជាពលរដ្ឋចំនួន ១៥០នាក់ ចេញពីតំបន់ជំនន់ទឹកភ្លៀងផងដែរ។
កាលពីថ្ងៃអង្គារ ក្រសួងធនធានទឹក និងឧតុនិយម ជូនដំណឹងឱ្យដឹងថា ចាប់ពីថ្ងៃទី២ ដល់ថ្ងៃទី៨ ខែកក្កដា ឆ្នាំ២០២៣ កម្ពុជាទទួលឥទ្ធិពលពីប្រព័ន្ធសម្ពាធទាបអូសបន្លាយលើភាគខាងជើង ប្រទេសឡាវ និងវៀតណាម គួបផ្សំនឹងខ្យល់មូសុងនិរតីក្នុងកម្រិតមធ្យម។
ក្រសួងបន្ថែមថា រយៈពេល៧ថ្ងៃនេះ ក្នុងមហាសមុទ្រប៉ាស៊ីហ្វិក ព្យុះឈ្មោះ ខាណុន (KHANUN) កំពុងធ្វើដំណើរឆ្ពោះទៅភាគខាងកើតប្រទេសចិន ផងដែរ។
ក្រសួងបញ្ជាក់ថា ស្ថានភាពខាងលើនេះ ធ្វើឱ្យតំបន់ទំនាបកណ្ដាល និងខ្ពង់រាប នឹងមានភ្លៀងធ្លាក់ពីតិចទៅមធ្យម លាយឡំដោយផ្គរ រន្ទះ និងខ្យល់កន្ត្រាក់។
ចំពោះតំបន់មាត់សមុទ្រ នឹងមានភ្លៀងធ្លាក់ពីតិចទៅបង្គួរ លាយឡំដោយផ្គរ រន្ទះ និងខ្យល់កន្ត្រាក់ ជាពិសេសនៅលើផ្ទៃសមុទ្រ នឹងមានខ្យល់បក់បោកខ្លាំង ព្រមទាំងមានរលកសមុទ្រមានកម្ពស់ខ្ពស់។
គួររម្លឹកថា រយៈពេល៧ខែ ឆ្នាំ២០២៣ ខ្យល់កន្ត្រាក់កើតឡើងចំនួន ២២១លើក។ ក្នុងនោះផ្ទះរលំ ៨៨០ខ្នង ផ្ទះរបើកជាង ១២ ០០០ខ្នង ប៉ះពាល់សាលារៀន ៨៧ខ្នង តូបក្នុងផ្សារ ៧៧តូប អគាររដ្ឋបាល ៣៨កន្លែង ព្រមទាំងបណ្ដាលឱ្យមនុស្សស្លាប់ ៨នាក់ និងរបួស ១៤៥នាក់។
ចំពោះគ្រោះថ្នាក់ដោយសាររន្ទះកើតឡើងចំនួន ១០០លើក ប៉ះពាល់ផ្ទះ ៧ខ្នង បណ្ដាលឱ្យមនុស្សស្លាប់ ៥៩នាក់ មនុស្សរបួស ៤៥នាក់ និងគោ ក្របី ងាប់ ៨៧ក្បាល៕