រដ្ឋាភិបាលបានចេញអនុក្រឹត្យស្តីពី «អត្តសញ្ញាណកម្មពិការភាព តាមគំរូសង្គម និងសិទ្ធិជាមូលដ្ឋាន» ដែលមានគោលបំណងរៀបចំគ្រប់គ្រងប្រព័ន្ធទិន្នន័យអត្តសញ្ញាណកម្មពិការភាពសម្រាប់ជាមូលដ្ឋានកំណត់ក្រុមគោលដៅជនមានពិការភាព ដើម្បីបង្កភាពងាយស្រួលដល់ពួកគេទទួលបានអត្ថប្រយោជន៍ពីប្រព័ន្ធគាំពារសង្គមនិងសេវាសង្គមផ្សេងៗទៀត។
អនុក្រឹត្យនេះមានវិសាលភាពអនុវត្តចំពោះជនមានពិការភាពក្នុងប្រទេសកម្ពុជា។
អនុក្រឹត្យកម្រាស់១០ទំព័រ មានហត្ថលេខានាយករដ្ឋមន្ត្រី ហ៊ុន សែន ចុះថ្ងៃទី២៩ ខែកក្កដា បានឱ្យដឹងថា អនុក្រឹត្យនេះបង្កើតឡើងក្នុងគោលបំណងរៀបចំនិងគ្រប់គ្រងប្រព័ន្ធទិន្នន័យអត្តសញ្ញាណកម្មពិការភាពឱ្យមានបទដ្ឋានរួមមួយប្រកបដោយសង្គតិភាពតាមប្រព័ន្ធបច្ចេកវិទ្យាព័ត៌មាន។
អនុក្រឹត្យបន្តថា ប្រព័ន្ធគ្រប់គ្រងទិន្នន័យអត្តសញ្ញាណកម្មពិការភាពជាមូលដ្ឋានកំណត់ក្រុមគោលដៅជនមានពិការភាពក្នុងការលើកកម្ពស់ជីវភាព ការទទួលបានសេវាសង្គម ការអភិវឌ្ឍដល់ជនមានពិការភាព និងការប្រើប្រាស់ជាទិន្នន័យសម្រាប់កំណត់ក្រុមគោលដៅរបស់កម្មវិធីជំនួយសង្គម និងរបបសន្តិសុខសង្គមក្នុងប្រព័ន្ធគាំពារសង្គម។
រដ្ឋាភិបាលចេញអនុក្រឹត្យនេះ សម្រាប់ការផ្តល់បណ្ណសម្គាល់ជនមានពិការភាព ក្រោយពីការកំណត់អត្ថសញ្ញាណកម្មពិការភាព ដើម្បីបង្កលក្ខណៈងាយស្រួលដល់ជនមានពិការភាពទទួលបានអត្ថប្រយោជន៍ពីប្រព័ន្ធគាំពារសង្គម
និងសេវាសង្គមផ្សេងទៀត ប្រកបដោយសមធម៌ និង
បរិយាបន្នស្របតាមគោលនយោបាយរបស់រាជរដ្ឋាភិបាល។
អនុក្រឹត្យបានបញ្ជាក់ថា៖ «ជនមានពិការភាពដែលចូលរួមកំណត់អត្តសញ្ញាណកម្មពិការភាព តាមគំរូសង្គម និងសិទ្ធិជាមូលដ្ឋាន ត្រូវបានវាយតម្លៃតាមប្រព័ន្ធបច្ចេកវិទ្យាព័ត៌មានសម្រាប់ការគ្រប់គ្រងពិការភាព ដើម្បីទទួលបានបណ្ណសម្គាល់ជនមានពិការភាពទៅតាមប្រភេទនិង
កម្រិតពិការភាព»។
អនុក្រឹត្យបន្តថា៖ «ប្រភេទពិការភាពក្នុងអនុក្រឹត្យចែកចេញជា៥ប្រភេទ គឺពិការភាពកាយសម្បទា ពិការភាពញាណដឹង ពិការភាពសតិបញ្ញ ពិការភាពផ្លូវចិត្ត ពិការភាពផ្សេងៗ ហើយប្រភេទពិការភាពនីមួយៗចែកចេញជា៣កម្រិត គឺកម្រិត១ (កម្រិតធ្ងន់បំផុតនិងធ្ងន់) កម្រិត២ (កម្រិតមធ្យម) កម្រិត៣ (កម្រិតស្រាល)»។
តាមអនុក្រឹត្យនេះ បណ្ណសម្គាល់ជនមានពិការភាពមានសុពលភាពជាអចិន្ត្រៃយ៍លើកលែងតែជនមានពិការភាពដែលត្រូវដកចេញពីប្រព័ន្ធគ្រប់គ្រង ដូចជាក្នុងករណីទទួលមរណភាព ចាកចេញពីកម្មវិធីដោយស្ម័គ្រចិត្ត មិនមានពិការភាពអចិន្ត្រៃយ៍ និងក្លែងបន្លំបណ្ណសម្គាល់ជនមានពិការភាព។
ក្នុងអនុក្រឹត្យបានព្រមានថា៖ «ជនណាដែលក្លែងបន្លំបណ្ណសម្គាល់ជនមានពិការភាព ឬទិន្នន័យអត្តសញ្ញាណកម្មពិការភាព តាមគំរូសង្គម និងសិទ្ធិជាមូលដ្ឋាន ត្រូវទទួលខុសត្រូវចំពោះមុខច្បាប់ជាធរមាន»។
កិច្ចការទាំងអស់ដែលមានចែងក្នុងអនុក្រឹត្យនេះត្រូវដឹកនាំអនុវត្តដោយក្រសួងសង្គមកិច្ច អតីតយុទ្ធជន និងយុវនីតិសម្បទា ព្រមទាំងមានការចូលរួមគាំទ្រពីក្រសួងមហាផ្ទៃ ក្រសួងផែនការ ក្រសួងសុខាភិបាល ក្រសួងសេដ្ឋកិច្ចនិងហិរញ្ញវត្ថុ និងរដ្ឋបាលរាជធានី ខេត្ត ឃុំ/សង្កាត់។
លោក សាន់ រតនា ប្រធាននាយកដ្ឋានសុខុមាលភាពជនពិការ បានបញ្ជាក់ថា ក្រុមការងារបន្ទុកលើកិច្ចការនេះ គឺបានចាប់ផ្ដើមអនុវត្តកិច្ចជាបណ្ដើរៗតាំងពីឆ្នាំ២០២០មកម៉្លេះហើយរហូតមកដល់ពេលនេះជនមានពិការភាពប្រមាណ២៦ម៉ឺននាក់ហើយដែលត្រូវបានកំណត់អត្តសញ្ញាណកម្មពិការភាព តាមគំរូសង្គម និងសិទ្ធិជាមូលដ្ឋាន។
លោកនិយាយថា នៅពេលកំណត់អត្តសញ្ញាណជនមានពិការភាពហើយគេមានទិន្នន័យស្ដីពីស្ថានភាពជនមានពិការភាពកម្រិតធ្ងន់ មធ្យម និងស្រាល ដែលការធ្វើបែបនេះមានប្រយោជន៍សម្រាប់ការរៀបចំគោលនយោបាយនិងការអន្តរាគមន៍លើករណីផ្សេងៗទៀត ដើម្បីឆ្លើយតបនឹងតម្រូវការចាំបាច់របស់ពួកគេ៕