ក្រសួងធនធានទឹក និងឧតុនិយម ស្នើធនាគារពិភពលោក បង្កើតផែនការគ្រប់គ្រងទន្លេសាប និងទន្លេមេគង្គ ដើម្បីធានាធនធានទឹក កែលម្អការកាត់បន្ថយទឹកជំនន់ និងស្ដារទន្លេដែលងាយរងគ្រោះ។
ការស្នើខាងលើនេះ ធ្វើឡើងក្នុងជំនួបពិភាក្សាការងាររវាងលោក ថោ ជេដ្ឋា រដ្ឋមន្ត្រីក្រសួងធនធានទឹក និងឧតុនិយម និងលោកស្រី Mariam Sherman នាយិកាធនាគារពិភពលោកប្រចាំប្រទេសមីយ៉ាន់ម៉ា កម្ពុជា និងឡាវ នៅទីស្ដីការក្រសួងកាលពីម្សិលមិញ។
ក្នុងជំនួបខាងលើនេះ លោក ថោ ជេដ្ឋា បានស្វាគមន៍ចំពោះប្រតិភូធនាគារពិភលោក និងសហការី ដែលបានជួបពិភាក្សាអំពីការអភិវឌ្ឍធនធានទឹកនៅកម្ពុជា ក៏ដូចជួបសម្តែងការគួរសមក្នុងនាមជារដ្ឋមន្ត្រីក្រសួងធនធានទឹក និងឧតុនិយម សម្រាប់នីតិកាលទី៧ នៃរដ្ឋសភា។
រដ្ឋមន្ត្រីបានស្នើធនាគារពិភពលោកជួយពង្រឹងគោលនយោបាយជាតិ និងការអភិវឌ្ឍសមត្ថភាពស្ថាប័ននៅថ្នាក់ជាតិ និងថ្នាក់ក្រោមជាតិ។
លោកក៏បានស្នើធនាគារពិភពលោក ជួយស្តារ និងរៀបចំឡើងវិញនូវហេដ្ឋារចនាសម្ពន្ធធនធានទឹក និងប្រព័ន្ធធារាសាស្ត្រ ព្រមទាំងកែលម្អការគ្រប់គ្រងធនធានទឹកជាចម្បងលើដៃទន្លេ។
ជាពិសេសស្នើជួយគាំទ្រលើការបង្កើតផែនការគ្រប់គ្រងអាងទន្លេសាប និងទន្លេមេគង្គ Detla ជាកម្មវិធីវិនិយោគយុទ្ធសាស្ត្រនៅតំបន់អាងទន្លេសាប និងដីសណ្ដទន្លេមេគង្គ ដើម្បីធានាធនធានទឹក កែលម្អការកាត់បន្ថយទឹកជំនន់ និងស្ដារទន្លេដែលងាយរងគ្រោះ។
លោក ថោ ជេដ្ឋា ថ្លែងថា ក្នុងនាមរដ្ឋាភិបាលកម្ពុជា បានវាយតម្លៃខ្ពស់ចំពោះកិច្ចសហប្រតិបត្តិការនានា និងបានទទួលស្គាល់នូវភាពជាដៃគូដ៏សំខាន់រវាងក្រសួងធនធានទឹក និងឧតុនិយម ជាមួយនឹងធនាគារពិភពលោក ដើម្បីកសាង និងអភិវឌ្ឍធនធានទឹករយៈពេលវែងនៅកម្ពុជា។
លោកបន្ថែមថា ការពង្រឹងស្ថាប័ន និងការអភិវឌ្ឍធនធានមនុស្ស គឺជាអាទិភាពទីមួយ ដូច្នេះ ធនាគារពិភពលោក ជាមជ្ឈមណ្ឌលចំណេះដឹង ដើម្បីគាំទ្រដល់ក្រសួងធនធានទឹក និងឧតុនិយម ឱ្យសម្រេចបាននូវចក្ខុវិស័យរបស់ខ្លួន។
រដ្ឋមន្ត្រីក្រសួងខាងលើក៏បានអរគុណចំពោះធនាគារពិភពលោក ដែលតែងគាំទ្រ និងមានកិច្ចសហការយ៉ាងរឹងមាំជាមួយរដ្ឋាភិបាលកម្ពុជាលើគម្រោងអភិវឌ្ឍន៍ជាច្រើននាពេលកន្លងមក។
លោកក៏បានណែនាំក្រុមការងារថ្មីរបស់ក្រសួងធនធានទឹក និងឧតុនិយម ដែលប្រមូលផ្តុំពីនាយកដ្ឋានបច្ចេកទេស និងមានបទពិសោធគ្រប់គ្រងគម្រោងរបស់ដៃគូអភិវឌ្ឍន៍។
រដ្ឋមន្ត្រីក៏បានស្នើឱ្យធនាគារពិភពលោក ធ្វើការយ៉ាងជិតស្និទ្ធជាមួយក្រុមការងារថ្មី និងពង្រឹងសមត្ថភាព PIUs ថ្មីរបស់ក្រសួងធនធានទឹក និងឧតុនិយម សម្រាប់ការអនុវត្តគម្រោង។
រដ្ឋលេខាធិការក្រសួងធនធានទឹក និងឧតុនិយម លោក អាន ពេជ្រហត្ថដា បានឱ្យដឹងថា ក្នុងវេទិកាទឹកអន្តរជាតិ ទន្លេមេគង្គ-កូរ៉េ កាលពីដើមខែកញ្ញា កម្ពុជាក៏បានស្នើប្រទេសពាក់ព័ន្ធឱ្យមានកិច្ចប្រឹងប្រែងរួមគ្នាបង្កើនភាពជាដៃគូអន្តរជាតិ និងកិច្ចគាំទ្រ ដើម្បីដោះស្រាយបញ្ហាប្រឈមនានាដែលបានកើតមានឡើងក្នុងអាងទន្លេមេគង្គ រួមមាន រំហូរទឹកទន្លេមេគង្គទាប និងការធ្លាក់ចុះផលស្តុកត្រី ជាដើម៕