គណៈកម្មាធិការចម្រុះកិច្ចការព្រំដែន ចេញប្រតិកម្ម និងទាត់ចោលទាំងស្រុងរាល់ការចោទប្រកាន់ប្រទេសវៀតណាម បង្ខិតបង្គោលព្រំដែនចូលទឹកដីកម្ពុជា ថាគ្មានមូលដ្ឋានច្បាស់លាស់ និងស្នើសមត្ថកិច្ចចាត់វិធានការលើបុគ្គលទាំងនោះតាមផ្លូវច្បាប់។
ការចេញសេចក្ដីថ្លែងការណ៍ប្រតិកម្មខាងលើនេះ ធ្វើឡើងបន្ទាប់ពីស្ថាប័នសារព័ត៌មានស្ថិតនៅក្រៅប្រទេសមួយចំនួន លើកឡើងថា វៀតណាម បានបង្ខិតបង្គោលព្រំដែនចូលទឹកដីកម្ពុជា និងត្រូវបានអ្នកប្រើប្រាស់បណ្ដាញសង្គមទាំងនៅកម្ពុជា និងក្រៅប្រទេសមួយចំនួន ចែករំលែកតៗគ្នា។
កាលពីថ្ងៃទី៩ ខែកក្កដា ឆ្នាំ២០២៣ ទូរទស្សន៍ព្រះអាទិត្យកម្ពុជា (Cambodia SUNTV) បានផ្សព្វផ្សាយលើបណ្ដាញសង្គមដោយដាក់ចំណងជើងថា ចោលម្សៀតបំផុត ដែលយួនចេះតែបង្ខិតបង្គោលព្រំដែនចូលមកកម្ពុជា បានជាបន្តរហូតយ៉ាងនេះ។
ក្នុងវីដេអូឃ្លីបជាង៦នាទី ដែលមានព្រះសង្ឃនិមន្តទៅមើលព្រំដែនផ្ទាល់បានអធិប្បាយថា ព្រំដែនកម្ពុជា-វៀតណាម ដែលស្ថិតនៅស្រុកពញាក្រែក ខេត្តត្បូងឃ្មុំ ត្រូវបាត់បង់ដីច្រើនជាងគេ។
ប្រភពបន្តថា កាលពីជាង១០ឆ្នាំមុន វត្តស្អំ នៅម្ដុំព្រៃខ្មោច ប៉ុន្តែដោយសារវៀតណាម ចេះតែរំកិលព្រំដែនចូលមក ខាងវត្តក៏សម្រេចលើកមកដាក់មកនៅក្បែរផ្លូវវិញ (ផ្លូវដីគ្រួសក្រហម ក្នុងទឹកដីកម្ពុជា)។
ព្រះសង្ឃក្នុងវីដេអូបន្ថែមថា កាលពីមុនបង្គោលព្រំដែន គឺស្ថិតនៅថ្នល់អាមេរិក ប៉ុន្តែបច្ចុប្បន្នបង្ខិតចូលក្នុងដីកម្ពុជាកាន់តែឆ្ងាយជិតដល់ផ្លូវគ្រួសក្រហម និងជិតដល់វត្ត។
កាលពីថ្ងៃសុក្រ គណៈកម្មាធិការចម្រុះកិច្ចការព្រំដែន បានចេញសេចក្តីថ្លែងការណ៍ថា ការផ្សព្វផ្សាយរបស់គណនីហ្វេសប៊ុកឈ្មោះ ទូរទស្សន៍ព្រះអាទិត្យកម្ពុជា មានចេតនាប្រឌិតរឿង និងផ្សព្វផ្សាយព័ត៌មានក្លែងក្លាយ ក្នុងគោលដៅញុះញង់ប្រជាពលរដ្ឋក្នុងកំលុងពេលជិតបោះឆ្នោត ដើម្បីបំភាន់សាធារណៈមតិជាតិ និងអន្តរជាតិ។
ការផ្សាយខាងលើនេះ គឺជាការចោទប្រកាន់ដោយគ្មានមូលដ្ឋានមកលើការងារព្រំដែនរបស់រដ្ឋាភិបាលកម្ពុជា អំពីការធ្វើឱ្យបាត់បង់ទឹកដី ក៏ដូចជាការបណ្តោយឱ្យមានការរំលោភបំពានទឹកដីពីប្រទេសជិតខាង ដែលធ្វើឱ្យប្រជាពលរដ្ឋបាត់បង់ដីស្រែចំការ ជាដើម។
គណៈកម្មាធិការចម្រុះកិច្ចការព្រំដែន បញ្ជាក់ថា ក្នុងកិច្ចការងារខណ្ឌសីមា និងបោះបង្គោលព្រំដែនរវាងកម្ពុជា ជាមួយនឹងវៀតណាម ក៏ដូចជាជាមួយនឹងប្រទេសជិតខាងដទៃទៀត កម្ពុជាធ្វើបានត្រឹមត្រូវ
និងច្បាស់លាស់បំផុត ដើម្បីរក្សាបានផ្ទៃក្រឡាដីកម្ពុជា
១៨១ ០៣៥ គីឡូម៉ែត្រក្រឡា ដូចបានកំណត់ច្បាស់នៅក្នុងរដ្ឋធម្មនុញ្ញនៃព្រះរាជាណាចក្រកម្ពុជា។
គណៈកម្មាធិការចម្រុះកិច្ចការព្រំដែន អំពាវនាវដល់ជនរួមជាតិទាំងក្នុង និងក្រៅប្រទេស កុំជឿ និងកុំចែកចាយរាល់ព័ត៌មានក្លែងក្លាយ ដែលមានចេតនាទុច្ចរិត វាយប្រហារដល់កិច្ចការព្រំដែនរបស់រដ្ឋាភិបាលកម្ពុជា ហើយដែលសកម្មភាពទាំងអស់នោះ អាចនឹងប្រឈមមុខនឹងផ្លូវច្បាប់។
គណៈកម្មាធិការចម្រុះកិច្ចការព្រំដែន ក៏ស្នើដល់អាជ្ញាធរមានសមត្ថកិច្ចស្រាវជ្រាវ ទប់ស្កាត់ និងចាត់វិធានការតាមផ្លូវច្បាប់ទៅលើជនខិលខូចទាំងឡាយណា ដែលមានចេតនាបង្កើតព័ត៌មានក្លែងក្លាយទាំងនេះ ដើម្បីយកទៅអនុវត្តតាមផ្លូវច្បាប់។
អភិបាលស្រុកពញាក្រែក លោក លី សុភាលីន ប្រាប់កាសែតខ្មែរថាមស៍ កាលពីម្សិលមិញថា សម្រាប់ក្នុងភូមិសាស្ត្រស្រុកពញាក្រែក កម្ពុជាគ្មានបានកាត់ដីឱ្យទៅវៀតណាម ជាអ្នកគ្រប់គ្រងនោះទេ តែអ្នកដែលបានលើកឡើងថា កម្ពុជាកាត់ដីឱ្យវៀតណាម គឺសុទ្ធតែជាព័ត៌មានប្រឌិដ្ឋខុសពីការពិតទាំងស្រុង។
លោកបន្ថែមថា បើសិនមានការកាត់ដីឱ្យទៅវៀតណាមពិតមែន នោះប្រជាពលរដ្ឋរស់នៅក្នុងភូមិ នឹងចេញមុខប្រតិកម្មមុនគេ មិនមែនជាក្រុមប្រឆាំងនោះទេ។
អភិបាលស្រុកបន្តថា បង្គោលក្នុងភូមិសាស្ត្រឃុំកក ដែលផ្សព្វផ្សាយថា វៀតណាម រំកិលព្រំដែនមកដល់ជិតវត្ត ក៏មិនពិតដែរ។
លោក លី សុភាលីន បញ្ជាក់ថា៖ «ឥឡូវនេះ ក្នុងភូមិសាស្ត្រស្រុកពញាក្រែក ៤២គីឡូម៉ែត្រ ត្រូវបានបោះបង្គោលព្រំដែនរួចរាល់អស់ហើយ ហើយបានកសាង និងធ្វើផ្លូវក្រវាត់ព្រំដែនរួចរាល់ហើយដែរ ដូច្នេះបងប្អូនអាចមកមើលបង្គោលព្រំដែនបាន៕