កាកបាទក្រហមកម្ពុជានឹងចូលរួមជាមួយក្រសួងបរិស្ថាន ដើម្បីរួមគ្នារៀបចំយុទ្ធនាការកាត់បន្ថយការប្រើប្រាស់ប្លាស្ទិកក្នុងលក្ខណៈទ្រង់ទ្រាយធំនៅទីរួមខេត្តកំពង់ឆ្នាំ នៅថ្ងៃទី៣០ ខែកញ្ញា ឆ្នាំ២០២៣ ក្រោមប្រធានបទ «ថ្ងៃនេះ ខ្ញុំមិនប្រើថង់ប្លាស្ទិក»។
លោកស្រី ម៉ែន នារីសោភ័គ អគ្គលេខាធិការរងកាកបាទក្រហមកម្ពុជា បានប្រាប់ខ្មែរថាមស៍ពីម្សិលមិញថា កាកបាកក្រហមកម្ពុជាបានជួបប្រជុំជាមួយនឹងក្រសួងបរិស្ថាននៅថ្ងៃពុធ ដើម្បីពិភាក្សាការងារពីការចូលរួមក្នុងយុទ្ធនាការកាត់បន្ថយការប្រើប្រាស់ប្លាស្ទិក ដែលនឹងត្រូវរៀបចំធ្វើនៅខេត្តកំពង់ឆ្នាំងនៅថ្ងៃទី៣០ ខែកញ្ញា។
លោកស្រីបានបន្តថា តាមពិត ក្រសួងបរិស្ថានបានចាប់ផ្ដើមធ្វើយុទ្ធការនេះដំបូងតាមសាលារៀនតាំងពីថ្ងៃទី១ ខែកញ្ញាមកម៉្លេះ។ បន្ទាប់មករៀបចំកាន់តែទូលំទូលាយនៅបណ្តារោងចក្រ សហគ្រាស និងក្រុមហ៊ុនឯកជន។ មកដល់ពេលនេះ ក្រសួងបរិស្ថានបានពង្រីកការរៀបចំធ្វើយុទ្ធនាការនេះកាន់តែធំនៅតាមខេត្តនានានៅទូទៅប្រទេស ដោយចាប់ផ្ដើមដំបូងចេញពីខេត្តកំពង់ឆ្នាំង ដើម្បីឱ្យការផ្សព្វផ្សាយកាន់តែទូលំទូលាយ។
លោកស្រីបន្ថែមថា៖ «ការចូលរួមចំណែកក្នុងយុទ្ធនាការកាត់បន្ថយការប្រើប្រាស់ប្លាស្ទិកពីសំណាក់កាកបាទក្រហម គឺបង្ហាញជំនួយការឱ្យអាជ្ញាធរសាធារណៈក្នុងវិស័យមនុស្សធម៌ ដើម្បីចូលរួមផ្លាស់ប្ដូរឥរិយាបថនិងទម្លាប់ការប្រើប្រាស់ប្លាស្ទិករបស់ប្រជាពលរដ្ឋ ដោយសង្ឃឹមថា ការប្រើប្រាស់ប្លាស្ទិកនឹងមានការកាត់បន្ថយក្នុងចំណោមអ្នកប្រើប្រាស់»។
លោកស្រីនិយាយថា៖ «យើងធ្លាប់ចុះអប់រំ និងធ្វើការផ្សព្វផ្សាយដល់កម្មកររោងចក្រ ក៏ដូចជាពលរដ្ឋនៅតាមមូលដ្ឋានស្ដីពីផលប៉ះពាល់ខ្លាំងចំពោះសុខភាពដែលបណ្ដាលមកពីការប្រើប្រាស់ថង់ប្លាស្ទិក»។
ក្រសួងបរិស្ថានដែលដឹកនាំដោយលោក អ៊ាង
សុផល្លែត ដែលរដ្ឋមន្ត្រីថ្មី បានផ្ដោតសំខាន់លើការងារអាទិភាពចំនួនបីសំខាន់ គឺទី១.ការកាត់បន្ថយការប្រើប្រាស់ប្លាស្ទិក ទី២.ការដាំដើមឈើឡើងវិញដោយបង្កើនវិសាលភាពព្រៃឈើឱ្យបាន៦០ភាគរយនៅឆ្នាំ២០៥០ និងទី៣.ការលើកកម្ពស់ជីវភាពសហគមន៍ដោយស្វែងរករបរចិញ្ចឹមជីវិតផ្សេងៗដែលអាចរកប្រាក់ចំណូលជូនប្រជាពលរដ្ឋបាន ចៀសវាងការកាប់ព្រៃឈើជាការរកចំណូល។
លោក អ៊ាង សុផល្លែត រដ្ឋមន្ត្រីក្រសួងបរិស្ថានបានប្រាប់ខ្មែរថាមស៍ពីម្សិលមិញថា កាកបាទក្រហមបានបង្ហាញពីចំណាប់អារម្មណ៍ខ្ពស់ក្នុងការសហការជាមួយក្រសួងបរិស្ថានក្នុងចលនាកាត់បន្ថយការប្រើប្រាស់ថង់ប្លាស្ទិក និងការងារមួយចំនួនទៀតដែលទាក់ទងនឹងវិសយ័បរិស្ថាន ដូចជាការដាំស្តារព្រៃឈើ ការផ្សព្វផ្សាយដល់ប្រជាសហគមន៍ពីផលប៉ះពាល់នៃការប្រើប្រាស់ប្លាស្ទិក និងការប្រែប្រួលអាកាសធាតុជាដើម។
លោកបន្តថា ថ្ងៃធ្វើយុទ្ធនាការនៅខេត្តកំពង់ធំ កាកបាទក្រហមកម្ពុជានឹងសមាសភាពចូលរួមពីថ្នាក់កណ្តាលមក ចូលរួមជាមួយនឹងក្រសួងបរិស្ថាន និងជំរុញសាខាកាកបាទក្រហមខេត្តចូលរួមក្នុងយុទ្ធនាការនេះដែរ។
លោកបន្ថែមថា កាកបាទក្រហមបានស្នើសុំសម្ភារផ្សព្វផ្សាយ (IEC materials) ដើម្បីឱ្យសាខាតាមបណ្តាខេត្តធ្វើយុទ្ធនាការផ្សព្វផ្សាយបន្តទៅសហគមន៍ និងស្នើដាក់ joint logo លើសម្ភារៈផ្សព្វផ្សាយក្នុងករណីដែលត្រូវបោះពុម្ពក្រោមការឧបត្ថម្ភថវិកាពីកាកបាទក្រហម។
លោក អ៊ាង សុផល្លែត បាននិយាយថា៖ «ប្រធានកាកបាទក្រហមកម្ពុជាតែងតែយកចិត្តទុកដាក់លើសុខុមាលភាពរបស់ប្រជាជន ព្រមទាំងសិស្សានុសិស្ស ហើយមកដល់ពេលនេះកាកបាទក្រហមបានបន្តការយកចិត្តទុកដាក់បន្ថែមទៀតតាមរយៈការចូលរួមក្នុងយុទ្ធនាការកាត់បន្ថយការប្រើប្រាស់ថង់ប្លាស្ទិក»។
លោកបន្តថា៖ «តាមរយៈយុទ្ធនាការនេះនឹងជួយដល់សុខុមាលភាពរបស់ប្រជាពលនិងសិស្សានុសិស្សយើងឱ្យគេចផុតពីសារធាតុពុលដែលបញ្ចេញដោយកាកសំណល់ប្លាស្ទិក ហើយក៏ជួយដល់វិស័យបរិស្ថានផងដែរ»។
លោក ហេង យ៉ុនគូរ៉ា នាយកប្រតិបត្តិអង្គការកែច្នៃនិងអនាម័យសហគមន៍ (CSARO) យល់ឃើញថា សកម្មភាពដែលក្រសួងបរិស្ថានកំពុងតែធ្វើយុទ្ធនាការនេះ គឺជាសកម្មភាពល្អក្នុងការផ្សព្វផ្សាយឱ្យប្រជាសហគមន៍ទាំងអស់បានយល់ដឹងអំពីផលប៉ះពាល់ដល់សុខភាពនិងបរិស្ថាន ដែលបណ្ដាលមកពីការប្រើប្រាស់ថង់ប្លាស្ទិក។
លោកបានស្នើដល់ក្រសួងបរិស្ថានដែលធ្វើយុទ្ធនាការនេះធ្វើយ៉ាងណាចុះផ្សព្វផ្សាយនិងណែនាំដល់មូលដ្ឋានដែលប្រជាជនកំពុងរស់នៅ ដើម្បីឱ្យពួកគាត់បានយល់ស៊ីជម្រៅថែមទៀត ព្រោះប្រជាជនរស់នៅតាមមូលដ្ឋានភាគច្រើនមិនសូវមានការយល់ដឹងពីបញ្ហាដែលបណ្ដាលមកពីការប្រើប្រាស់ប្លាស្ទិក។
លោកកត់សម្គាល់ឃើញថា៖ «ពលរដ្ឋជាច្រើនបាននិយមប្រើប្រាស់ថង់ប្លាស្ទិក ដោយសារការនាំចូលមកក្នុងប្រទេសកម្ពុជា ក៏មានចំនួនច្រើនដែរ។ នៅពេលយើងប្រើប្រាស់វាហើយបាននៅសល់ទុកវាជាច្រើននៅលើនិងក្នុងដីនៃប្រទេសយើង»៕
Related Posts
- January 20, 2023
- September 5, 2023
- December 19, 2022
- January 10, 2023
