ការសាងសង់អាកាសយានដ្ឋានអន្តរជាតិតេជោ សម្រេចបានជាង ៥០ភាគរយហើយសម្រាប់ដំណាក់កាលទី ១ ហើយត្រូវបានគេរំពឹងថានឹងដាក់ឲ្យដំណើរការនៅឆ្នាំ ២០២៥។
បច្ចុប្បន្នភាពនេះត្រូវបានចែករំលែកដោយលោក ស៊ិន ច័ន្ទសេរីវុត្ថា អនុរដ្ឋលេខាធិការនៃរដ្ឋលេខាធិការដ្ឋានអាកាសចរស៊ីវិល ដោយបន្ថែមថា ដំណាក់កាលទីមួយទាំងមូលនឹងត្រូវបញ្ចប់នៅឆ្នាំក្រោយ។
លោកបានសង្កត់ធ្ងន់ថា នៅពេលដែលដំណាក់កាលទី១ ត្រូវបានបញ្ចប់ អាកាសយានដ្ឋានអន្តរជាតិតេជោនឹងអាចទទួលយន្តហោះខ្នាតធំជាមួយនឹងចំណតចំនួន៣២កន្លែង ដែលអាចផ្ទុកអ្នកដំណើរបានពី១៣ លានទៅ ១៥លាននាក់ក្នុងមួយឆ្នាំ និងអាចផ្ទុកទំនិញតាមអាកាសបានចំនួន ១៧៥,០០០តោន ក្នុងមួយឆ្នាំ នៅឆ្នាំ២០២៤។
ស្ថិតនៅលើផ្ទៃដីទំហំ ២,៦០០ហិកតា នៅក្នុងក្រុងតាខ្មៅ និងស្រុកកណ្តាលស្ទឹង នៃខេត្តកណ្តាល និងស្រុកបាទី ខេត្តតាកែវ ការសាងសង់អាកាសយានដ្ឋាននេះត្រូវបានគេប៉ាន់ស្មានថានឹងចំណាយថវិកាសាងសង់ប្រហែល ១,៥០០លានដុល្លារ។
រាជរដ្ឋាភិបាលក៏កំពុងសាងសង់ព្រលានយន្តហោះអន្តរជាតិថ្មីនៅខេត្តសៀមរាបដែលនឹងត្រូវបញ្ចប់ក្នុងឆ្នាំ២០២៣ ហើយក្នុងខេត្តកោះកុងនឹងដាក់ឱ្យដំណើរការក្នុងពេលឆាប់ៗ។
ការសាងសង់អាកាសយានដ្ឋានក្នុងខេត្តមណ្ឌលគិរី បន្ទាយមានជ័យ និងបាត់ដំបង ក៏កំពុងស្ថិតក្នុងគម្រោងផងដែរ៕ AKP-ផល សុផានិត