រដ្ឋាភិបាលបានរៃអង្គាសថវិកាតាមរយៈការបោះផ្សាយមូលបត្របំណុលរដ្ឋជាមួយនឹងទឹកប្រាក់សរុបចំនួន២៧លានដុល្លារក្នុងរយៈពេល៦ខែដំបូងនៃឆ្នាំនេះ ដែលស្មើនឹង១៣.៥ ភាគរយនៃគោលដៅសរុបចំនួន ២០០លានដុល្លារ។

រដ្ឋាភិបាលបានដាក់​ចេញ​មូលបត្រ​បំណុល​​ក្នុង​ទីផ្សារ​ដំបូង​គេ​តាម​រយៈ​វេទិកា​ដេញថ្លៃ​របស់​ធនាគារជាតិ​នៃ​កម្ពុជា។

របាយការណ៍របស់ធនាគារជាតិបានបង្ហាញថា “នៅក្នុងឆមាសទី១នៃឆ្នាំ២០២៣ ការដេញថ្លៃសម្រាប់មូលបត្របំណុលរដ្ឋតាម​រយៈ​វេទិកា​ដេញថ្លៃ​របស់​ធនាគារជាតិ​នៃ​កម្ពុជា ត្រូវបានធ្វើឡើងចំនួន៦ ដង ជាមួយនឹងដើមទុនសរុបចំនួន ប្រហែល២៧ លានដុល្លារ ។

យោងតាមក្រសួងសេដ្ឋកិច្ច និងហិរញ្ញវត្ថុ បានឱ្យដឹងថា នៅឆ្នាំ២០២៣រដ្ឋាភិបាលគ្រោងនឹងរៃអង្គាសប្រាក់ចំនួន ២០០លានដុល្លារពីមូលបត្របំណុល ដែលអាចនាំមកនូវប្រាក់ចំណូលដោយផ្ទាល់ និងធានានូវប្រសិទ្ធភាពនៃការវិនិយោគ និងនិរន្តរភាពនៃការគ្រប់គ្រងបំណុល និងថវិកាជាតិ។

មូលបត្របំណុលរបស់រដ្ឋមិនត្រឹមតែបំពេញការចំណាយប្រចាំឆ្នាំប៉ុណ្ណោះទេ ថែមទាំងរួមចំណែកដល់ការលើកកម្ពស់វិស័យមូលបត្រក្នុងប្រទេសផងដែរ។

នេះ​ជា​ឆ្នាំ​ទី​២​នៃ​ការដាក់​ចេញ​មូលបត្រ​របស់​រដ្ឋ។

អ្នកវិនិយោគិនជាមួយមូលបត្របំណុលរដ្ឋនឹងទទួលបានការកាត់ពន្ធកាត់ទុកចំនួន៥០ ភាគរយលើការប្រាក់ដែលទទួលបានពីការកាន់កាប់ ការជួញដូរមូលបត្របំណុល និងការលើកលែងពន្ធលើការទទួលបានដើមទុនពីការទិញ និងជួញដូរមូលបត្របំណុលសម្រាប់រយៈពេល៣ ឆ្នាំ។ Chea Vannak – AKP