រដ្ឋមន្ត្រីថ្មីរបស់ក្រសួងរៀបចំដែនដី នគរូបនីយកម្ម និងសំណង់ គឺលោក សាយ សំអាល់ បានជំរុញអាជ្ញាធរខេត្តសៀមរាបពន្លឿនការចេញបណ្ណកម្មសិទ្ធិកាន់កាប់ដីដល់ពលរដ្ឋដែលស្ម័គ្រចិត្តផ្លាស់ប្ដូរទីលំនៅឋានពីតំបន់រមណីយដ្ឋានអង្គរមករស់នៅតំបន់អភិវឌ្ឍរុនតាឯកក្នុងស្រុកបន្ទាយស្រី និងតំបន់អភិវឌ្ឍពាក់ស្នែងក្នុងស្រុកអង្គរធំ ខេត្តសៀមរាប។
ការជំរុញការពន្លឿននេះធ្វើនៅក្នុងកិច្ចប្រជុំពិនិត្យវឌ្ឍនភាពការងារដោះស្រាយបញ្ហាសំណង់និងដីធ្លីក្នុងតំបន់រមនីយដ្ឋានអង្គរ និងតំបន់ដទៃទៀតក្រោមការគ្រប់គ្រងរបស់អាជ្ញាធរជាតិអប្សរានៅខេត្តសៀមរាប កាលពីថ្ងៃសុក្រ។
លោក សាយ សំអាល់ បានណែនាំក្រសួងវប្បធម៌និងវិចិត្រសិល្ប: ក៏ដូចជាអាជ្ញាធរជាតិអប្សរាត្រូវសហការមួយអាជ្ញាធរខេត្តសៀមរាប ដើម្បីដោះស្រាយ សម្របសម្រួល និងថែរក្សាការពារបាននូវតំបន់អភិរក្សក្នុងតំបន់រមណីយដ្ឋានអង្គរ គឺតំបន់មួយ តំបន់ពីរ និងតំបន់បីកុំឱ្យមានការរំលោភបំពានដោយខុសច្បាប់កើតឡើងទៀត។
លោកបន្តថា តំបន់រមណីយដ្ឋានអង្គរត្រូវរក្សាទុកជាសម្បត្តិបេតិកភណ្ឌដ៏មានតម្លៃសម្រាប់ជាតិនិងពិភពលោក។
លោកបានជំរុញដល់ក្រសួង ស្ថាប័នពាក់ព័ន្ធ អាជ្ញាធរខេត្តដែនដី បង្កើនការយកចិត្តទុកដាក់ខ្ពស់លើការពិនិត្យវឌ្ឍនភាពនៅតំបន់អភិវឌ្ឍន៍រុនតាឯកនិងពាក់ស្នែងចំពោះកិច្ចការដែលនៅសេសសល់ ជាពិសេសបញ្ហាហេដ្ឋារចនាសម្ព័ន្ធផ្លូវថ្នល់ ព្រមទាំងការគាំទ្រដល់ជីវភាពរស់នៅរបស់ពលរដ្ឋដែលបានផ្លាស់ទីលំនៅឋានទៅតំបន់នោះ។
បន្ទាប់ពីដឹកនាំកិច្ចប្រជុំរួច លោក សាយ សំអាល បានបន្តដឹកនាំក្រុមការងារចុះទៅតំបន់អភិវឌ្ឍន៍រុនតាឯកក្នុងស្រុកបន្ទាយស្រី ដើម្បីត្រួតពិនិត្យវឌ្ឍនភាពនៃហេដ្ឋារចនាសម្ព័ន្ធដែលកំពុងស្ថាបនានៅទីនោះ។
លោក រិន ឡូត អភិបាលស្រុកបន្ទាយស្រី បានលើកឡើងថា រដ្ឋមន្ត្រីក្រសួងរៀបចំដែនដីបានដឹកនាំក្រុមការងារមកត្រួតពិនិត្យលើប្រព័ន្ធផ្លូវថ្នល់ ប្រព័ន្ធលូរំដោះទឹក មន្ទីរពេទ្យ សាលារៀនជាដើម។
លោកបានបញ្ជាក់ថា៖ «ពលរដ្ឋប្រមាណជិត៦០០គ្រួសារដែលបានទទួលបណ្ណកម្មសិទ្ធិដីធ្លី (ប្លង់រឹង) ក្នុងចំណោមពលរដ្ឋដែលបានស្ម័គ្រចាកចេញពីតំបន់រមណីយដ្ឋានអង្គរមករស់នៅតំបន់នេះ»។
របាយការណ៍ចុងក្រោយរបស់ក្រសួងរៀបចំដែនដី
នគរូបនីយកម្ម និងសំណង់ បានឱ្យដឹងថា ពលរដ្ឋស្ម័គ្រចិត្តចាកចេញពីតំបន់រមណីយដ្ឋានអង្គរចំនួន ៩ ៨៣៦នាក់ហើយ ដែលបានចាប់ឆ្នោតជ្រើសរើសយកដីឡូតិ៍ទំហំ ២០ម៉ែត្រ x ៣០ម៉ែត្រនៅតំបន់អភិវឌ្ឍរុនតាឯកនិងតំបន់អភិវឌ្ឍពាក់ស្នែង។
របាយការណ៍បន្តថា ក្នុងនោះមានពលរដ្ឋចំនួន ៥ ៨៦៥គ្រួសារបានស្ម័គ្រចិត្តទៅតំបន់អភិវឌ្ឍន៍រុនតាឯកក្នុងស្រុកបន្ទាយស្រី និងពលរដ្ឋចំនួន ៣ ៩៧១គ្រួសារបានស្ម័គ្រចិត្តទៅតំបន់អភិវឌ្ឍន៍ពាក់ស្នែងក្នុងស្រុកអង្គរធំ ខេត្តសៀមរាប។
របាយការណ៍បន្ថែមថា នៅពេលដែលពួកគេរុះរើផ្ទះទៅនៅតំបន់អភិវឌ្ឍទាំងពីរ ពួកគេបានទទួលស័ង្កសី៣០សន្លឹកក្នុងមួយគ្រួសារ ដែលមកទាល់នឹងពេលនេះអាជ្ញាធរបានប្រគល់ស័ង្កស៊ីប្រមាណ ២៤៤ ៧៤០សន្លឹកសម្រាប់
៨ ១៥៧គ្រួសារហើយ។
លោក យ៉ាំង មករា មានវ័យ៣៤ឆ្នាំ ជាពលរដ្ឋម្នាក់ដែលបានស្ម័គ្រចិត្តចាកចេញពីតំបន់រមណីយដ្ឋានអង្គរមករស់នៅតំបន់អភិវឌ្ឍរុនតាឯក។ លោកនិយាយថា លោកមិនទាន់បានបណ្ណកាន់កាប់កម្មសិទ្ធិដីធ្លីនៅឡើយទេ។ ភាគច្រើននៃពលរដ្ឋដែលបានដូរទីតាំងមករស់នៅក្នុងតំបន់នេះសុទ្ធតែមិនទាន់ទទួលបានកម្មសិទ្ធិដីធ្លីរបស់ពួកគាត់នៅឡើយទេ។
លោកបន្តថា បណ្ណកម្មសិទ្ធិកាន់កាប់ដីធ្លីពិតជាសំខាន់ខ្លាំងណាស់សម្រាប់ពលរដ្ឋដែលស្ម័គ្រមកនៅទីនេះ។ ពួកគាត់ត្រូវការបណ្ណកម្មសិទ្ធិកាន់កាប់ដីធ្លីជាចាំបាច់សម្រាប់ដាក់កម្ចីប្រាក់ពីធនាគារយកមកធ្វើផ្ទះ និងបង្កើតមុខរបបសម្រាប់ចិញ្ចឹមជីវិត។
លោកបន្ថែមថា៖ «ប្រសិនបើយើងគ្មានបណ្ណកម្មសិទ្ធិកាន់កាប់ដីធ្លីដែលទទួលស្គាល់ពីអាជ្ញាធរមានសមកិច្ចទេ គឺខាងធនាគារមិនហ៊ានផ្ដល់កម្ចីដល់ពួកយើងឡើយ»។
លោកបន្ថែមថា៖ «ខ្ញុំកំពុងទន្ទឹងរង់ចាំអាជ្ញាធរប្រគល់បណ្ណកម្មសិទ្ធិកាន់កាប់ដីធ្លី ព្រោះខ្ញុំឮគេនិយាយថា អាជ្ញាធរកំពុងពន្លឿនការចេញបណ្ណកម្មសិទ្ធិកាន់កាប់ដីធ្លីដល់ពួកខ្ញុំ។ ប្រសិនបើបានកាន់តែលឿន គឺកាន់តែល្អសម្រាប់ពួកខ្ញុំ»។
កាលពីឆ្នាំកន្លងមករដ្ឋាភិបាលបានដាក់ចេញគោលនយោបាយផ្ដល់ដីលំនៅឋានជូនពលរដ្ឋតំបន់អភិវឌ្ឍរុនតាឯកក្នុងស្រុកបន្ទាយស្រី និងភូមិអភិវឌ្ឍពាក់ស្នែងក្នុងស្រុងអង្គរធំ ខេត្តសៀមរាប ជាថ្នូរនឹងការណ៍ដែលពួកគេព្រមរុះរើទីលំនៅឋានដែលខុសច្បាប់ចេញពីតំបន់រមណីដ្ឋានអង្គរ និងតំបន់ដទៃទៀតស្ថិតក្រោមការគ្រប់គ្រងរបស់អាជ្ញាធរជាតិអប្សរា។
តាមគោលការណ៍ ពលរដ្ឋមួយគ្រួសារត្រូវទទួលបានដីក្នុងទំហំ ២០ម៉ែត្រ x ៣០ម៉ែត្រសម្រាប់សង់លំនៅឋានជាមួយនឹងការសាងសង់ហេដា្ឋរចនាសម្ព័ន្ធនានា ដូចជា
ប្រព័ន្ធអគ្គិសនី ប្រព័ន្ធទឹកស្អាត ប្រព័ន្ធលូ ផ្លូវថ្នល់ ផ្សារ មន្ទីរពេទ្យ និងសាលារៀនជាដើមនៅក្នុងតំបន់អភិវឌ្ឍទាំងពីរ ដើម្បីសម្រួលដល់ពលរដ្ឋដែលទើបតែផ្លាស់ប្តូរទីលំនៅមករស់នៅក្នុងភូមិថ្មីនេះ៕