រដ្ឋមន្ត្រីក្រសួងការពារជាតិ លោក ទៀ បាញ់ បានដាក់បទបញ្ជា និងជំរុញដល់កម្លាំងអាវុធហត្ថ សហការជាមួយកម្លាំងសមត្ថកិច្ចពាក់ព័ន្ធ ដើម្បីចាត់វិធានការគ្រប់សកម្មភាពរាល់បុគ្គល ដែលមានបំណងបំផ្លាញដំណើរការបោះឆ្នោត នាថ្ងៃទី២៣ ខែកក្កដា ឆ្នាំ២០២៣។
ក្នុងពិធីអបអរសាទរខួបអនុស្សាវរីយ៍ លើកទី៣០ ថ្ងៃបង្កើតកងរាជអាវុធហត្ថ នៅមជ្ឈមណ្ឌលហ្វឹកហ្វឺនកងរាជអាវុធហត្ថភ្នំជុំសែនរីករាយ ខេត្តកំពង់ឆ្នាំង កាលពីថ្ងៃសុក្រ លោក ទៀ បាញ់ ដាក់បទបញ្ជាឱ្យភាគីពាក់ព័ន្ធ ត្រូវគ្រប់គ្រងកម្លាំងទ័ព បំពាក់មធ្យោបាយ សម្ភារៈ និងយុទ្ធោបករណ៍ ឱ្យបានរួចរាល់សម្រាប់ថ្ងៃបោះឆ្នោត។
ចំពោះកងកម្លាំងអាវុធហត្ថ ត្រូវសហការជាមួយក្រសួង ស្ថាប័ន និងអាជ្ញាធរមានសមត្ថកិច្ចពាក់ព័ន្ធចូលរួមការពារសន្ដិសុខ រក្សាសណ្ដាប់ធ្នាប់សាធារណៈ និងសុវត្ថិភាពសង្គម។
លោក ទៀ បាញ់ បន្ថែមថា ក្នុងពេលបោះឆ្នោតជ្រើសតាំងតំណាងរាស្ដ្រ នីតិកាលទី៧ នៃរដ្ឋសភា នាយទាហាន នាយទាហានរង និងពលទាហាន នៃកងរាជអាវុធហត្ថ ត្រូវចូលរួមបោះឆ្នោតឱ្យបានគ្រប់ៗគ្នានិងត្រូវគោរពអនុវត្តឱ្យបានត្រឹមត្រូវនូវច្បាប់ បទបញ្ជា និងនីតិវិធីនៃការបោះឆ្នោត។
ក្នុងនោះ រដ្ឋមន្ត្រីក្រសួងការពារជាតិ ជំរុញកងកម្លាំងអាវុធហត្ថ ត្រូវរួមគ្នាធានាឱ្យការបោះឆ្នោតនាពេលខាងមុខ គឺប្រព្រឹត្តទៅប្រកបដោយសេរី ត្រឹមត្រូវ យុត្តិធម៌ ដើម្បីបន្តលើកកម្ពស់លទ្ធិប្រជាធិបតេយ្យ និងការអភិវឌ្ឍប្រទេសជាតិ កាន់តែរីកចម្រើនបន្ថែមទៀត។
លោកបញ្ជាក់ថា៖ «ត្រូវពង្រឹង និងចាត់វិធានការសមស្របតាមច្បាប់ ដើម្បីការពាររារាំងគ្រប់សកម្មភាព ដែលប៉ុនប៉ងបំផ្លាញដល់ដំណើរការបោះឆ្នោត និងត្រូវការពាររាជរដ្ឋាភិបាលស្របច្បាប់ ដែលកើតចេញពីការបោះឆ្នោត និងការពាររាល់សមិទ្ធផលជាតិ ឱ្យបានស្ថិតស្ថេរគង់វង្ស»។
លោកបន្តថា ត្រូវសហការជាមួយសមត្ថកិច្ចពាក់ព័ន្ធ និងអាជ្ញាធរមូលដ្ឋានគ្រប់លំដាប់ថ្នាក់ រួមគ្នាការពារសន្ដិភាព ដោយមិនត្រូវឱ្យសន្ដិភាពនេះ ត្រូវបានបំផ្លាញពីជនណាម្នាក់ ឬបក្សនយោបាយណាមួយនោះទេ។
លោក ទៀ បាញ់ និយាយថា រាល់សមិទ្ធផលទាំងឡាយរបស់ជាតិ ដែលសម្រេចបានដោយឆ្លងកាត់ការលំបាក និងឧបសគ្គទម្រាំមានសព្វថ្ងៃនេះ ត្រូវរក្សាឱ្យស្ថិតស្ថេរ គង់វង្ស ជាពិសេសជ័យជម្នះ៧មករា ដែលនាំមកនូវសន្ដិភាព និងការអភិវឌ្ឍជាតិ។
លោកថ្លែងថា ត្រូវបន្តអនុវត្តនយោបាយភូមិ ឃុំ សង្កាត់មានសុវត្ថិភាព ដើម្បីទប់ស្កាត់បទល្មើសនានាឱ្យកាន់តែមានប្រសិទ្ធភាព រួមចំណែកថែរក្សាសន្ដិសុខ សណ្ដាប់ធ្នាប់ ការអភិវឌ្ឍសេដ្ឋកិច្ចសង្គម ការកសាងហេដ្ឋារចនាសម្ព័ន្ធ ការពារធនធានធម្មជាតិ ការជួយសង្គ្រោះប្រជាជនពេលកើតគ្រោះមហន្ដរាយផ្សេងៗ ដូចជាគ្រោះទឹកជំនន់ គ្រោះរាំងស្ងួត ជំងឺរាតត្បាតជាដើម។
រដ្ឋមន្ត្រីបន្ថែមថា ចំពោះការគ្រប់គ្រង ថែទាំមធ្យោបាយ សម្ភារៈ បរិក្ខា យុទ្ធោបករណ៍ អាវុធ និងគ្រាប់ បង្ការ កុំឱ្យមានការឆេះខូចខាត បាត់បង់ រក្សាគុណភាពឱ្យបានល្អ ដើម្បីការហ្វឹកហ្វឺន និងកិច្ចប្រតិបត្តិការឱ្យមានប្រសិទ្ធភាព។
អ្នកនាំពាក្យក្រសួងការពារជាតិ លោក ឈុំ សុជាតិ ប្រាប់កាសែតខ្មែរថាមស៍ យ៉ាងខ្លីកាលពីម្សិលមិញថា បច្ចុប្បន្ននេះ មន្ត្រីក្រសួង ទទួលបានបទបញ្ជាពីរដ្ឋមន្ត្រី លោក ទៀ បាញ់ រួចរាល់ហើយ ហើយក្រសួង ក៏បានសហការជាមួយសមត្ថកិច្ចពាក់ព័ន្ធរួចរាល់ហើយដែរ។
លោកថា៖ «សម្រាប់ការចុះប្រតិបត្តិការក្នុងដំណើរការបោះឆ្នោតខាងមុខនេះ ក្រសួងការពារជាតិ បានសហការជាមួយក្រសួងមហាផ្ទៃ ដើម្បីរៀបចំ និងត្រៀមលក្ខណៈកងកម្លាំងរួចរាល់ហើយ»។
លោកបន្តថា សមត្ថកិច្ចពាក់ព័ន្ធប្ដេជ្ញាធានាឱ្យការបោះឆ្នោត នៅថ្ងៃទី២៣ ខែកក្កដា ឆ្នាំ២០២៣ ប្រព្រឹត្តទៅល្អ និងគ្មានភាពអសកម្មណាមួយកើតឡើងនោះទេ។
ប្រធានគណបក្សយុវជនកម្ពុជា លោក ពេជ្រ ស្រស់ បានឱ្យដឹងថា ចំពោះដំណើរការបោះឆ្នោត គឺជារឿងសំខាន់សម្រាប់ជាតិ ប៉ុន្តែបើរដ្ឋាភិបាលចាំផ្ទះ មិនយកចិត្តទុកដាក់ការពារសន្តិសុខសណ្ដាប់ធ្នាប់ក្នុងដំណើរការបោះឆ្នោតទេ នោះនឹងធ្វើឱ្យដំណើរការបោះឆ្នោត បរាជ័យ និងគ្មានភាពរលូន។
លោកបន្ថែមថា រដ្ឋាភិបាលចាំផ្ទះ គួរតែអនុវត្តឱ្យបានម៉ឺងម៉ាត ច្បាស់លាស់ និងគ្រប់ជ្រុងជ្រោយ ដើម្បីធានាបរិយាកាលនៅថ្ងៃបោះឆ្នោត គ្មានភាពចលាចល និងបាតុភាពណាមួយកើតឡើងឡើយ។
លោក ពេជ្រ ស្រស់ ក៏បានអំពាវនាវប្រជាពលរដ្ឋ កុំធ្វើអ្វីដែលបង្កឱ្យខុសច្បាប់នៅថ្ងៃបោះឆ្នោត ដែលនាំឱ្យមានបញ្ហាដល់ខ្លួនឯង គ្រួសារ និងសង្គមជាតិ។
លោកស្រី សឹង សុធី ប្រធានគណបក្សស្ដ្រីដើម្បីស្ត្រី បានថ្លែងថា ចំពោះការបញ្ចេញមិតិយោបល់ និងការសម្រេចចិត្តលើដំណើរការបោះឆ្នោត គឺជាសិទ្ធិរបស់ប្រជាពលរដ្ឋ ដែលមាននៅក្នុងលទ្ធិប្រជាធិបតេយ្យ។
អ្នកស្រីបន្ថែមថា បើគណបក្សស្ត្រីដើម្បីស្ត្រី ឈ្នះឆ្នោត ឬដឹកនាំរដ្ឋាភិបាល គឺរដ្ឋាភិបាលរបស់លោកស្រី ផ្ដល់សិទ្ធិដល់ប្រជាពលរដ្ឋជាធំ ទោះគាត់ទៅបោះឆ្នោត ឬមិនទៅបោះឆ្នោត ឬចង់គូសសន្លឹកឆ្នោតចោល ក៏ដោយ ប៉ុន្តែគណបក្សលើកទឹកចិត្តឱ្យប្រជាពលរដ្ឋទៅបោះឆ្នោត។
ប្រធានគណបក្សស្ត្រីដើម្បីស្ត្រី បន្ថែមថា៖ «សម្រាប់ការបោះឆ្នោតនៅថ្ងៃខាងមុខ នឹងគ្មានចលាចលអ្វីកើតឡើងនោះទេ ព្រោះមនុស្សមួយចំនួនតូច គាត់ចេះតែនិយាយបំភ័យ និយាយបំពុល ដើម្បីឱ្យប្រជាពលរដ្ឋមានការព្រួយបារម្ភ»។
ឧត្តមសេនីយ៍ឯក ឆាយ គឹមខឿន អគ្គស្នងការរងនគរបាលជាតិ បានឱ្យដឹងថា កងកម្លាំងការពារសន្តិសុខគ្រប់ភាគីពាក់ព័ន្ធប្រមាណជាង៧ម៉ឺននាក់ នឹងដាក់ពង្រាយក្នុងថ្ងៃបោះឆ្នោតជ្រើសតាំងតំណាងរាស្ត្រ នាថ្ងៃទី២៣ ខែកក្កដា ឆ្នាំ២០២៣ ដើម្បីពារសន្តិសុខ និងសណ្ដាប់ធ្នាប់ នៅទូទាំងប្រទេស។
អគ្គស្នងការរងបញ្ជាក់ថា កម្លាំងសន្តិសុខទាំងអស់ បានបែងចែកតាមដំណាក់កាលនីមួយៗដូចជា ដំណាក់កាលឃោសនារកសំឡេងឆ្នោត ដាក់ពង្រាយកម្លាំងសន្តិសុខជិត ២ម៉ឹននាក់ ប៉ុន្តែសម្រាប់ក្នុងថ្ងៃបោះឆ្នោតផ្ទាល់តែម្ដង គឺមានរហូតដល់ជាង ៧ម៉ឺននាក់ ដើម្បីការពារសន្តិសុខសណ្ដាប់ធ្នាប់នៅតាមការិយាល័យបោះឆ្នោត និងរាប់សន្លឹកឆ្នោត។
លោកនិយាយថា សម្រាប់ក្នុងថ្ងៃបោះឆ្នោត មានការកម្លាំងគាំទ្រពីកងរាជអាវុធហត្ថ និងកងយុទ្ធពលខេមរភូមិន្ទ ដែលត្រូវពង្រាយនៅតាមតំបន់ក្រៅភូមិសាស្ត្រតាមបណ្ដាស្រុកនីមួយៗនៅទូទាំងប្រទេស ប៉ុន្តែសម្រាប់កម្លាំងនគរបាល និងប្រជាការពារ គឺជាភ្នាក់ងារចុះផ្ទាល់នៅការិយាល័យបោះឆ្នោត។
គួររម្លឹកថា ការបោះឆ្នោតជ្រើសតាំងតំណាងរាស្ត្រ នីតិកាលទី៧ នឹងប្រព្រឹត្តទៅនៅថ្ងៃទី២៣ ខែកក្កដា ឆ្នាំ២០២៣ ដែលមានប្រជាពលរដ្ឋសរុបប្រមាណ ៩ ៧១០ ៦៥៥នាក់ មានឈ្មោះក្នុងបញ្ជីបោះឆ្នោត នៅតាមការិយាល័យបោះឆ្នោតសរុបចំនួន ២៣ ៧៨៩ នៅទូទាំងប្រទេស។
គណបក្សនយោបាយ ដែលមានឈ្មោះចូលរួមបោះឆ្នោតជ្រើសតាំងតំណាងរាស្ត្រ សរុបមានចំនួន
១៨ គណបក្ស ខណៈគណបក្សភ្លើងទៀន ដែលជាបក្សប្រឆាំងដ៏ធំនៅកម្ពុជា ត្រូវបានអាក់ខានចូលរួមបោះឆ្នោត ដោយសារ គ.ជ.ប អះអាងថា ខ្វះខាតនីតិវិធីមួយចំនួន។
ព្រឹត្តិការណ៍នៃយុទ្ធនាការឃោសនារកសំឡេងឆ្នោត ធ្វើឡើងចាប់ពីថ្ងៃទី១កក្កដា រហូតដល់ថ្ងៃទី២១ ខែកក្កដា ឆ្នាំ២០២៣ ខណៈថ្ងៃទី២២កក្កដា គឺជាថ្ងៃ ស៕