មន្ទីរសុខាភិបាលរាជធានីភ្នំពេញ បានផ្ដល់ថ្នាំអាបែត (Abate) ១០តោន ដល់ការិយាល័យខណ្ឌប្រតិបត្តិតាមមូលដ្ឋានក្នុងភូមិសាស្ត្ររាជធានីភ្នំពេញ ដើម្បីទប់ស្កាត់ការរាតត្បាតដោយជំងឺគ្រុនឈាមនៅកម្ពុជា។
លោក ងី មានហេង ប្រធានមនី្ទសុខាភិបាលរាជធានីភ្នំពេញ បានឱ្យដឹងថា គិតដល់ពេលនេះ មនី្ទររបស់លោក បានបែងចែកថ្នាំ អាបែត ចំនួន ១០តោន សម្រាប់ការិយាល័យប្រតិបតិ្តចំនួន៦ និងសារអប់រំសុខភាពពាក់ព័ន្ធមួយចំនួន ដើម្បីទប់ស្កាត់ការរាតត្បាតដោយជំងឺគ្រុនឈាម។
លោកបន្ថែមថា ជាធម្មតានៅកម្ពុជា ករណីជំងឺគ្រុនឈាម តែងកើតមានជាប្រចាំ ព្រោះខែណាក៏មានកើតជំងឺនេះឡើងជារៀងរាល់ឆ្នាំ។
លោកបន្តថា ចំពោះសកម្មភាពជាប្រចាំថ្ងៃរបស់មន្រី្តសុខាភិបាលនៅតាមការិយាល័យប្រតិបតិ្ត និងមណ្ឌលសុខភាព បានចុះអប់រំផ្សព្វផ្សាយ និងយកថ្នាំអាបែត ដាក់ក្នុងពាងទឹក អាងទឹក របស់ប្រជាពលរដ្ឋតាមមូលដ្ឋាន ដើម្បីលុបបំបាត់ជម្រកមូសខ្លា។
លោកបញ្ជាក់ថា៖ «មូសខ្លា វាតែងពងក្នុងទឹកដក់ថ្លា វាមិនពងដាក់ក្នុងទឹកលូ ទឹកស្អុយនោះទេ ព្រោះថាទឹកលូ ទឹកស្អុយ វាកើតឡើងជាប្រភេទមូសធម្មតា»។
លោកស្រី ហ៊ាង មករា ប្រធានមណ្ឌលសុខភាពស្ទឹងមានជ័យ បានឱ្យដឹងថា មន្ត្រីសុខាភិបាល បានចុះផ្សព្វផ្សាយអប់រំ និងដាក់ថ្នាំអាបែតតាមខ្នងផ្ទះប្រជាពលរដ្ឋនៅតាមសហគមន៍។ ក្នុងនោះមានដូចជា ភូមិព្រែកទាល់១ សង្កាត់ស្ទឹងមានជ័យ២ ខណ្ឌមានជ័យ ដើម្បីជំរុញឱ្យប្រជាពលរដ្ឋ អនុវត្តវិធានការបង្ការរបស់ក្រសួង។
លោកបន្ថែមថា ចំពោះវិធានការដែលប្រជាពលរដ្ឋចូលរួមអនុវត្តមានដូចជា លុបបំបាត់ជម្រកមូស អនាម័យភូមិដ្ឋាន ផ្ទះសម្បែង និងទីសាធារណៈនានា ជាពិសេសយល់ដឹងពីរោគសញ្ញាបឋមសំខាន់ៗ នៃជំងឺគ្រុនឈាម ដែលត្រូវស្វែងរកសេវាព្យាបាលទាន់ពេលវេលា និងចេះថែទាំអ្នកជំងឺគ្រុនឈាម។
លោក លាង ឫទ្ធា ប្រធានកម្មវិធីជាតិប្រយុទ្ធជំងឺគ្រុនឈាម បានឱ្យដឹងថា ក្នុងរយៈពេល៦ខែ ឆ្នាំ២០២៣ មានអ្នកកើតជំងឺគ្រុនឈាមនៅកម្ពុជាមានជាង ៩ ០០០ករណី ក្នុងនោះ ២២ករណី បានស្លាប់។
លោកបន្ថែមថា តួលេខអ្នកជំងឺខាងលើនេះ កើនឡើងជាង ៥ ០០០ករណី បើធៀបរយៈពេលដូចគ្នាកាលពីឆ្នាំ២០២២ មានត្រឹមតែជាង ៤០០០ករណីប៉ុណ្ណោះ និងមានករណីស្លាប់ត្រឹមតែ ១០នាក់។
ប្រធានកម្មវិធីជាតិរូបនេះបន្តថា កាលពីឆ្នាំ២០១៩ ក៏មានអ្នកជំងឺគ្រុនឈាមមានការកើនឡើងច្រើនដូចគ្នានេះដែរ គឺដោយសារជាវដ្ត៤ឆ្នាំម្ដង ដែលត្រូវមានអ្នកជំងឺគ្រុនឈាមកើនឡើងបែបនេះ។
លោក លាង ឬទ្ធា បញ្ជាក់ថា៖ «ជំងឺគ្រុនឈាមនេះ ឆ្លងមនុស្សមិនរើសវ័យនោះទេ គឺឆ្លងទាំងមនុស្សធំ និងកូនក្មេង ដែលចម្លងតាមរយៈមូសខ្លា»។
លោកថ្លែងថា ប្រជាពលរដ្ឋដែលកើតជំងឺគ្រុនឈាមច្រើនជាង គឺនៅរាជធានីភ្នំពេញ ខេត្តកណ្ដាល ត្បូងឃ្មុំ សៀមរាប និងខេត្តបន្ទាយមានជ័យ។
លោកបានជំរុញមន្ត្រីជំនាញពាក់ព័ន្ធនៃក្រសួងសុខាភិបាល ចុះណែនាំប្រជាពលរដ្ឋឱ្យប្រើប្រាស់ថ្នាំ អាបែត ដើម្បីការពារទឹកក្នុងពាង និងជុំវិញផ្ទះ ដើម្បីកុំឱ្យក្លាយជាជម្រកមូលខ្លា។
កាលពីថ្ងៃទី១៨សីហា នាយកដ្ឋានប្រយុទ្ធនឹងជំងឺឆ្លង បានផ្សព្វផ្សាយឱ្យដឹងថា សម្រាប់ឆ្នាំ២០២៣ មានករណីផ្ទុះជំងឺគ្រុនឈាមកើនឡើងច្រើនគួរឱ្យកត់សម្គាល់ បើប្រៀបធៀបទៅនឹងឆ្នាំមុន។ នាយកដ្ឋានអំពាវនាវឱ្យប្រជាពលរដ្ឋនៅទូទាំងប្រទេសចូលរួមទាំងអស់គ្នា ដើម្បីបង្ការ និងទប់ស្កាត់ជំងឺគ្រុនឈាម ដោយអនុវត្តទៅតាមវិធានការនានារបស់ក្រសួងសុខាភិបាល និងភាគីពាក់ព័ន្ធ។
ក្នុងករណីប្រជាពលរដ្ឋមានចម្ងល់ពាក់ព័ន្ធនឹងជំងឺគ្រុនឈាម ឬរាយការណ៍អំពីជំងឺគ្រុនឈាម អាចទាក់ទងទៅកាន់លេខ ១១៥ ដើម្បីទទួលបានការប្រឹក្សាយោបល់ពីមន្ត្រីជំនាញសុខាភិបាល៕