យោងតាមស្ថានទូតអូស្ត្រាលីនៅទីក្រុងភ្នំពេញបានអោយដឹងថា រដ្ឋាភិបាលអូស្ត្រាលីបានផ្តល់ជំនួយបច្ចេកទេសដល់ក្រសួងសាធារណការ និងដឹកជញ្ជូន ដើម្បីធ្វើបច្ចុប្បន្នភាពស្តង់ដារផ្លូវថ្នល់តាមរយៈកម្មវិធីភាពជាដៃគូសម្រាប់ហេដ្ឋារចនាសម្ព័ន្ធផ្លូវថ្នល់ (P4I)។
ប្រភពដដែលបានគូសបញ្ជាក់ថា នេះនឹងធ្វើអោយហេដ្ឋារចនាសម្ព័ន្ធផ្លូវថ្នល់កាន់តែមានគុណភាព ខ្ពស់ និងការអភិវឌ្ឍប្រកបដោយបរិយាប័ន្ន និងនិរន្តរភាព។
កាលពីពេលថ្មីៗនេះ ក្រសួងសាធារណការ និងដឹកជញ្ជូន បានបើកសិក្ខាសាលាពិគ្រោះយោបល់ ដើម្បីពិនិត្យ និងអនុម័តលើសេចក្តីព្រាងចុងក្រោយនៃបទដ្ឋានឌីហ្សាញកម្រាលផ្លូវ។
កម្ពុជា និងអូស្ត្រាលីកំពុងធ្វើការរួមគ្នាលើផ្នែកដឹកជញ្ជូន ទឹកកខ្វក់ ភាពជាអ្នកដឹកនាំស្ត្រី និងការអភិវឌ្ឍន៍ហេដ្ឋារចនាសម្ព័ន្ធផ្លូវថ្នល់។
យោងតាមប្រភពអនឡាញរបស់ខ្លួន កម្មវិធី P4I គឺជាគំនិតផ្តួចផ្តើមរបស់រដ្ឋាភិបាលអូស្ត្រាលី ដែលចាប់ដៃគូជាមួយបណ្តាប្រទេសនៅក្នុងតំបន់អាស៊ីអាគ្នេយ៍ ដើម្បីជំរុញកំណើនប្រកបដោយបរិយាប័ន្ន តាមរយៈហេដ្ឋារចនាសម្ព័ន្ធប្រកបដោយនិរន្តរភាព។ AKP-C.Nika