លោក ឈាង រ៉ា រដ្ឋមន្ត្រីក្រសួងសុខាភិបាល ក្នុងអាណត្តិទី៧ នៃរដ្ឋសភា ប្ដេជ្ញាកែលម្អក្រមសីលធម៌គ្រូពេទ្យនៅកម្ពុជាឱ្យកាន់តែមានភាពល្អប្រសើរ ដើម្បីផ្ដល់សេវាសុខាភិបាលសាធារណៈ និងឯកជន ប្រកបដោយគុណភាព និងទំនុកចិត្តពីប្រជាពលរដ្ឋ។
ក្នុងដំណើរចុះពិនិត្យស្ថានភាពមូលដ្ឋានសុខាភិបាល នៅតាមបណ្ដាខេត្ដជុំវិញបឹងទន្លេសាប កាលពីម្សិលមិញ លោក ឈាង រ៉ា បានឱ្យដឹងថា បច្ចុប្បន្ន វិស័យសុខាភិបាលកម្ពុជា មានភាពល្អប្រសើរច្រើន តែត្រូវការបំពេញបន្ថែមទៀតពាក់ព័ន្ធនឹងហេដ្ឋារចនាសម្ពន្ធ សម្រាប់គោលដៅមណ្ឌលសុខភាពទូទាំងប្រទេស។
លោកបញ្ជាក់ថា ចំពោះសីលធម៌គ្រូពេទ្យ ក៏មានភាពល្អប្រសើរច្រើនដែរ ប៉ុន្តែនាពេលបច្ចុប្បន្ននេះ ត្រូវធ្វើយ៉ាងណាជំរុញបន្ថែមឱ្យគ្រូពេទ្យមានសីលធម៌កាន់តែល្អ និយាយស្ដីជាមួយអ្នកជំងឺមានភាពបត់បែន ព្រមទាំងប្រកបដោយចិត្តសាស្ត្រ និងវិជ្ជាជីវៈក្នុងនាមជាគ្រូពេទ្យ។
លោកបន្ថែមថា បង្កើន ជំរុញ និងលើកទឹកចិត្តគ្រូពេទ្យ ឱ្យមានការទំនាក់ទំនងល្អជាមួយប្រជាពលរដ្ឋនៅតាមមូលដ្ឋាន ជាពិសេសអ្នកជំងឺដែលទទួលសេវាពិនិត្យ ព្យាបាល នៅតាមមូលដ្ឋានទូទាំងប្រទេស។
លោក ឈាង រ៉ា បន្តថា សម្រាប់អាណត្តិថ្មីនេះ ក្រសួងនឹងកែប្រែសេវាសាធារណៈឱ្យកាន់តែទំនើប និងមានលក្ខណៈល្អប្រសើរ ជាពិសេសនឹងធ្វើនិយ័តកម្មសេវាសុខាភិបាលឯកជន ព្រោះវិស័យឯកជន ជាដៃគូដ៏សំខាន់ជាមួយសេវាសាធារណៈ ដើម្បីបន្តអភិវឌ្ឍវិស័យសុខាភិបាលឱ្យកាន់តែមានភាពល្អប្រសើរ។
រដ្ឋមន្ត្រីបន្ថែមថា បច្ចុប្បន្ន ត្រូវការបំពេញបន្ថែមចំពោះហេដ្ឋារចនាសម្ពន្ធនៅតាមមណ្ឌលសុខភាព ក៏ដូចនៅក្នុងបណ្ដាមន្ទីរពេទ្យស្រុក ខេត្ត ក្រុង ខណ្ឌ ព្រមទាំងមន្ទីរពេទ្យជាតិមួយចំនួនផងដែរ។
លោកបន្តថា ក្រសួងប្រឹងប្រែងធ្វើយ៉ាងណាចុះណែនាំប្រជាពលរដ្ឋឱ្យយល់ដឹងពីសុខភាព និងការថែទាំសុខភាពមូលដ្ឋាន ជាពិសេសចូលរួមទប់ស្កាត់ជំងឺឆ្លងដែលកម្ពុជាកំពុងជួបបញ្ហាប្រឈមមួយចំនួននៅឡើយ។
លើសពីនេះ ក្រសួងបន្តរៀបចំឱ្យបានរួចជាស្រេច ដើម្បីឆ្លើយតបទៅនឹងជំងឺឆ្លងជាសាកល ដែលមានដូចជា ជំងឺ
កូវីដ-១៩ ព្រមទាំងបង្កើនការទប់ស្កាត់ជំងឺមិនឆ្លងមានដូចជា ជំងឺមហារីក លើសឈាម ទឹកនោមផ្អែម ដែលជាជំងឺនាំផលប៉ះពាល់ដល់ប្រជាពលរដ្ឋជាច្រើន។
លោក ឈាង រ៉ា បញ្ជាក់ថា៖ «យើងប្រឹងប្រែងបន្ថែម ដើម្បីទប់ស្កាត់កាត់បន្ថយអត្រាមនុស្សឈឺស្លាប់ និងការប៉ះពាល់ដល់សុខភាពដោយសារអាកាសធាតុ ព្រមទាំងទប់ស្កាត់ការប្រើប្រាស់ផលិតផល និងចំណីអាហារ ដែលគ្មានការអនុញ្ញាតពីក្រសួងសុខាភិបាល ត្រឹមត្រូវ»។
លើកកម្ពស់សេវាសុខាភិបាលឱ្យបានទូលំទូលាយ ជាពិសេសនៅតាមមូលដ្ឋាន គឺជំរុញសេវាសុខាភិបាលឱ្យទៅកាន់តែកៀកប្រជាពលរដ្ឋ និងផ្ដល់សេវាថែទាំសុខភាពប្រជាពលរដ្ឋឱ្យកាន់តែមានភាពល្អប្រសើរ។
រដ្ឋមន្ត្រីថ្លែងថា បច្ចុប្បន្ន ពិភពលោកមានការអភិវឌ្ឍខ្លាំង ដូច្នេះ ត្រូវការចូលរួមជាមួយប្រព័ន្ធឌីជីថល ដើម្បីឱ្យវិស័យសុខាភិបាលកាន់តែជឿនលឿន ហើយជំរុញការអភិវឌ្ឍធនធានមនុស្ស តាមរយៈការបែងចែកអ្នកជំនាញទៅតាមមូលដ្ឋាន ដែលមានតម្រូវការគ្រូពេទ្យ និងគិលានុបដ្ឋាទូទាំងប្រទេស។
វេជ្ជបណ្ឌិត គួច ម៉េងលី ជំនាញសុខភាពសាធារណៈ ធ្លាប់លើកឡើងថា បច្ចុប្បន្ន វិស័យសុខាភិបាល មានភាពល្អប្រសើរជាង១០ឆ្នាំមុន ព្រោះកាលពី១០ឆ្នាំមុន វិស័យសុខាភិបាល នៅមានកម្រិត និងទន់ខ្សោយនៅឡើយ។
វេជ្ជបណ្ឌិតបន្ថែមថា បច្ចុប្បន្ន វិស័យសុខាភិបាលកម្ពុជា ចាប់ផ្ដើមមានភាពល្អប្រសើរ ទាំងសមត្ថភាព ចំណេះ ជំនាញ និងបទពិសោធរបស់ក្រុមគ្រូពេទ្យ ជាពិសេសហេដ្ឋារចនាសម្ពន្ធ សម្ភារៈ និងឧបករណ៍បម្រើឱ្យការពិនិត្យ និងព្យាបាលអ្នកជំងឺ នៅតាមមន្ទីរពេទ្យមួយចំនួន។
វេជ្ជបណ្ឌិតបញ្ជាក់ថា៖ «វិស័យសុខាភិបាល មានភាពល្អប្រសើរច្រើន ប៉ុន្តែសីលធម៌របស់គ្រូពេទ្យនៅតាមមន្ទីរពេទ្យមួយចំនួន នៅមានកម្រិត ដែលត្រូវកែលម្អឡើងវិញ ដើម្បីផ្ដល់សេវាសុខាភិបាលជូនប្រជាពលរដ្ឋនៅតាមមូលដ្ឋានឱ្យមានភាពទំនុកចិត្ត និងអាចទទួលយកបានដោយក្ដីរីករាយ»៕