កាលពីម្សិលមិញ លោកនាយករដ្ឋមន្ត្រី ហ៊ុន សែន ដែលជាប្រធានគណបក្សប្រជាជនកម្ពុជាបានមានប្រសាសន៍ ថា សន្លឹកឆ្នោតរបស់ប្រជាពលរដ្ឋដែលបានបោះជូនគណបក្សប្រជាជនកម្ពុជាក្នុងការបោះឆ្នោតសកលនាពេលថ្មីៗនេះបានបង្ហាញយ៉ាងច្បាស់នូវចំណុចចំនួន៣។
លោកបានលើកឡើងដូច្នេះនៅក្នុងសេចក្តីថ្លែងការណ៍ពិសេសមួយ ដែលបានចាក់ផ្សាយតាមទូរទស្សន៍ជាតិកម្ពុជា ថា ទី១ ពួកគេទុកចិត្តលើគណបក្សប្រជាជនកម្ពុជា ទី២ ពួកគេជឿជាក់លើ ហ៊ុន សែន និងទី៣ ពួកគេជឿជាក់លើ ហ៊ុន ម៉ាណែត ដែលជាអ្នកស្នងតំណែងនាយករដ្ឋមន្ត្រី។
លោកបានគូសបញ្ជាក់ថា៖ «នេះជាសារយ៉ាងច្បាស់ពីប្រជាពលរដ្ឋដែលគណបក្សប្រឆាំងត្រូវតែយល់ […]
លោកបានបន្តថា អ្នកសង្កេតការណ៍បោះឆ្នោតជាតិ និងអន្តរជាតិ គឺជាសាក្សីរស់នៃដំណើរការប្រជាធិបតេយ្យនៅកម្ពុជា។ វាមិនមែនអាស្រ័យលើប្រទេសមួយ ឬពីរដែលបានមើលស្រាលការបោះឆ្នោតនៅកម្ពុជានោះទេ។
លោកបានសង្កត់ធ្ងន់ទៀតថា “[…] នៅឆ្នាំ២០១៨ អ្នកក៏បានច្រានចោលលទ្ធផលនៃការបោះឆ្នោតដែរ ប៉ុន្តែអ្នកនៅតែធ្វើការជាមួយខ្ញុំដោយជៀសមិនរួច រួមទាំងការចូលរួមនៅក្នុងកិច្ចប្រជុំកំពូលអាស៊ាននៅភ្នំពេញ […] ពីព្រោះទំនាក់ទំនងរវាងរដ្ឋគឺបែបនេះ” ។
លោកបានបញ្ជាក់ជាថ្មីថា ក្រុមជ្រុលនិយមត្រូវតែលុបបំបាត់ចេញពីប្រទេសកម្ពុជា ហើយក្រុមណាដែលមានបំណងចូលរួមជាមួយក្រុមជ្រុលនិយមមិនគួរត្រូវបានលើកលែងទោសឡើយ។ វិធានការផ្លូវច្បាប់នឹងត្រូវបានប្រើដើម្បីកម្ចាត់ក្រុមជ្រុលនិយមទាំងនោះ។ C. Nika – AKP