ប្រទេសកម្ពុជាកំពុងជួបប្រទះនូវបរិបទប្រជាសាស្រ្តអំណោយផល ហើយគួរតែចាប់យកឱកាសដើម្បីដាក់មូលដ្ឋានគ្រឹះកាន់តែស៊ីជម្រៅសម្រាប់កំណើន រួមទាំងការវិនិយោគបន្ថែមទៀតដើម្បីលើកកម្ពស់សក្តានុពលរបស់កុមារី និងស្ត្រី។

នាយករដ្ឋមន្ត្រីកម្ពុជា បានគូសបញ្ជាក់ពីសារសំខាន់នៅក្នុងលិខិតចំហររបស់សម្តេចដែលចេញនៅថ្ងៃទី ១១ ខែកក្កដា ដើម្បីប្រារព្ធទិវាប្រជាជនពិភពលោកលើកទី៣៤ ក្រោមមូលបទ “ការបញ្ចេញអនុភាពនៃសមភាពយេនឌ័រ៖ ការលើកកម្ពស់សម្លេងស្ត្រី និងកុមារី ដើម្បីបង្ហាញពីលទ្ធភាពគ្មានព្រំដែននៃពិភពលោករបស់យើង”។

លោកនាយករដ្ឋមន្ត្រី ហ៊ុន សែន បានសរសេរក្នុងលិខិតនោះថា តាមលក្ខណៈប្រជាសាស្រ្ត ប្រទេសកម្ពុជាមានប្រជាជនធ្វើការច្រើនដែលមានអាយុពី ១៥-៦០ឆ្នាំ ប្រមាណ ៦៥% នៃចំនួនប្រជាជនសរុប ដែលអាចអនុញ្ញាតឱ្យមានការអភិវឌ្ឍន៍សេដ្ឋកិច្ចសង្គមកាន់តែលឿន។

ដើម្បីចាប់យកឱកាសនេះ វាចាំបាច់សម្រាប់កម្ពុជាក្នុងការរៀបចំគោលនយោបាយគាំទ្រទាន់ពេលវេលានៅគ្រប់វិស័យ ជាពិសេសការអប់រំ និងបណ្តុះបណ្តាលវិជ្ជាជីវៈ ការបង្កើតការងារ និងផលិតភាពឱ្យបានឆាប់រហ័ស។

លោកបានបន្ថែមថា ការបង្កើនការវិនិយោគលើវិស័យសុខាភិបាល បច្ចេកវិទ្យាឌីជីថល សមភាពយេនឌ័រ និងកម្មវិធីសន្សំមានគោលបំណងអភិវឌ្ឍជំនាញនៃកម្លាំងការងារ ដែលអាចពន្លឿនការអភិវឌ្ឍន៍របស់ប្រទេស។

ជារួម កម្ពុជាបានវាយតម្លៃខ្ពស់ចំពោះស្ត្រីជាធនធានដ៏សំខាន់សម្រាប់កំណើនប្រកបដោយចីរភាព ហើយរាជរដ្ឋាភិបាលបានយកចិត្តទុកដាក់យ៉ាងខ្លាំងក្នុងការលើកកម្ពស់ស្ត្រីលើផ្នែកសេដ្ឋកិច្ច នយោបាយ និងសង្គម។

ទោះជាយ៉ាងណាក៏ដោយ ស្ត្រីកម្ពុជានៅតែប្រឈមមុខនឹងបញ្ហាមួយចំនួន ដូចជាអត្រាមរណភាពមាតាខ្ពស់ បើធៀបនឹងប្រទេសដទៃទៀតក្នុងតំបន់។ លទ្ធភាពទទួលបានសេវាថែទាំសុខភាព និងសេវាសុខភាពបន្តពូជរបស់ពួកគេនៅមានកម្រិត ការងារមានប្រាក់ចំណូលទាប ហើយជារឿយៗមានការអប់រំ និងជំនាញបច្ចេកទេសទាប។

រាជរដ្ឋាភិបាលកម្ពុជាកំពុងពិនិត្យយ៉ាងយកចិត្តទុកដាក់លើរបៀបដោះស្រាយបញ្ហាទាំងនេះ ដែលជាផ្នែកមួយនៃការខិតខំប្រឹងប្រែងរបស់ខ្លួន ដើម្បីបង្កើនប្រសិទ្ធភាពឱកាសនៃបរិបទប្រជាសាស្រ្តអំណោយផលរបស់កម្ពុជា៕ AKP