កាលពីពេលថ្មីៗនេះ កម្ពុជា និងចិនបានចុះហត្ថលេខាលើពិធីសារស្តីពីតម្រូវការរភូតគាមអនាម័យក្នុងការនាំចេញដូងស្រស់ពីកម្ពុជាទៅកាន់ប្រទេសចិន។
ពិធីសារនេះត្រូវបានចុះហត្ថលេខាកាលពីថ្ងៃទី១៥ ខែកញ្ញា រវាងក្រសួងកសិកម្ម រុក្ខាប្រមាញ់ និងនេសាទ (MAFF) និងអគ្គរដ្ឋបាលគយនៃប្រទេសចិន។
លោកស្រី អ៊ឹម រចនា អនុរដ្ឋលេខាធិការ និងជាអ្នកនាំពាក្យក្រសួងកសិកម្ម នៅថ្ងៃទី២០ ខែកញ្ញា បានឲ្យដឹងថា អគ្គនាយកដ្ឋានកសិកម្មរបស់ក្រសួងបានចាប់ផ្តើមជូនដំណឹងដល់ម្ចាស់ចំការដូង សហគមន៍កសិករដាំដូងក្រអូប និងម្ចាស់ចំការដូងស្រស់ និង រោងចក្រវេចខ្ចប់ដែលមានបំណងផលិត និងកែច្នៃដូងស្រស់សម្រាប់ទីផ្សារប្រទេសចិនត្រូវអនុវត្តការចុះបញ្ជីចំការ និងរោងចក្ររបស់ពួកគេ។
លោកស្រីបានបន្ថែមថា “ក្រសួងនឹងធ្វើការជាមួយកសិករដើម្បីធានាថាពួកគេដាំដូងតាមស្តង់ដារអនាម័យ និងភូតគាមអនាម័យដែលកំណត់ដោយអគ្គរដ្ឋបាលគយរបស់ប្រទេសចិន”។
អ្នកនាំពាក្យរូបនេះបានគូសបញ្ជាក់ថា បញ្ជីឈ្មោះចម្ការដូងស្រស់ និងរោងចក្រកែច្នៃ និងវេចខ្ចប់នឹងត្រូវបញ្ជូនទៅភាគីចិននៅដើមខែធ្នូ ឆ្នាំ២០២៣ ដើម្បីពិនិត្យ និងវាយតម្លៃ មុនពេលឈានដល់ការនាំចេញជាផ្លូវការ។
បច្ចុប្បន្នកម្ពុជាមានចម្ការដូងចំនួន ១៧ ០០០ ហិកតា ក្នុងនោះ ១៤ ០០០ ហិកតាត្រៀមប្រមូលផល ដោយផ្តល់ទិន្នផល ២៤៨ ០០០ តោនក្នុងឆ្នាំ ២០២២។៕ ជា វណ្ណៈ – AKP