ធនាគារជាតិនៃកម្ពុជា (NBC) បាននិយាយថា ប្រទេសកម្ពុជាបានកត់ត្រាការកើនឡើងយ៉ាងខ្លាំងនៃការទូទាត់តាមទូរស័ព្ទ ខណៈដែលមនុស្សកាន់តែច្រើនបានផ្លាស់ប្តូរពីជម្រើសប្រតិបត្តិការជាសាច់ប្រាក់ទៅជាការទូទាត់ឌីជីថល។

របាយការណ៍បានឱ្យដឹងថា ចំនួនគណនីកាបូបអេឡិចត្រូនិចដែលបានចុះឈ្មោះបានកើនឡើងដល់ ២០,២លានគិតត្រឹមខែមិថុនាឆ្នាំនេះ។

ចំនួនប្រតិបត្តិការសរុបបានកើនឡើងដល់ ៣៣៣,៧ លាននៅក្នុងឆមាសទីមួយនៃឆ្នាំនេះពី ២១១,២ លានក្នុងរយៈពេលដូចគ្នាក្នុងឆ្នាំ២០២២ ជាមួយនឹងចំនួនទឹកប្រាក់សរុបចំនួន ៥៨,២ ពាន់លានដុល្លារអាមេរិក ដែលកើនឡើង ៩៨,៣ ភាគរយពីមួយឆ្នាំទៅមួយឆ្នាំ។

លោក ជា ចាន់តូ ទេសាភិបាលធនាគារជាតិនៃកម្ពុជា ដែលនឹងចប់អាណត្តិ​ បានមានប្រសាសន៍ថា ប្រព័ន្ធទូទាត់របស់កម្ពុជាត្រូវបានធ្វើទំនើបកម្មដោយការបញ្ចូលនូវបច្ចេកវិជ្ជាថ្មីៗជាច្រើនក្នុងគោលបំណងបង្កើនប្រសិទ្ធភាពនៃការទូទាត់ និងសុវត្ថិភាព ដើម្បីជួយសម្រួលដល់ការផ្លាស់ប្តូរទំនិញ និងសេវាកម្មកាន់តែងាយស្រួល និងឆាប់រហ័ស កែលម្អបរិយាកាសហិរញ្ញវត្ថុ និងគាំទ្រដល់ការរួមបញ្ចូលប្រព័ន្ធទូទាត់ទៅក្នុងតំបន់។

លោកបានមានប្រសាសន៍ថា “ការទូទាត់អន្តរធនាគារនៅកម្ពុជាកាន់តែមានភាពងាយស្រួល ដើម្បីឆ្លើយតបទៅនឹងការផ្លាស់ប្តូរឥរិយាបថរបស់ក្រុមហ៊ុន សហគ្រាស និងអ្នកប្រើប្រាស់ ដែលពឹងផ្អែកកាន់តែខ្លាំងឡើងលើការទិញទំនិញតាមអ៊ីនធឺណិត និងការទូទាត់តាមអេឡិចត្រូនិកក្នុងយុគសម័យបច្ចេកវិទ្យាឌីជីថល”។

របាយការណ៍របស់ ធនាគារជាតិនៃកម្ពុជា បានបញ្ជាក់ថា ស្ថាប័នសេវាទូទាត់ប្រាក់ (PSI) ចំនួន៣៥ ត្រូវបានផ្តល់អាជ្ញាប័ណ្ណ ហើយគ្រឹះស្ថានធនាគារ និងហិរញ្ញវត្ថុ (BFI) ចំនួនពីរត្រូវបានអនុញ្ញាតឱ្យដំណើរការអាជីវកម្មទូទាត់៕ ជា វណ្ណៈ – AKP