ក្រសួងធនធានទឹក និងឧតុនិយម បានចេញសេចក្តីជូនដំណឹងដល់សាធារណជនអំពីគ្រោះធម្មជាតិដែលអាចកើតមាន ជាពិសេសខ្យល់បក់បោកខ្លាំង និងរលកខ្ពស់ៗនៅតាមតំបន់មាត់សមុទ្រ ចន្លោះពីថ្ងៃទី១៩-២៥ ខែកក្កដា ឆ្នាំ២០២៣។
ក្រសួងធនធានទឹក និងឧតុនិយម បានក្រើនរំលឹកនៅក្នុងសេចក្តីជូនដំណឹងរបស់ខ្លួន ស្តីពីការព្យាករណ៍អាកាសធាតុថ្មី នៅព្រឹកនេះ ដោយបន្ថែមថា ក្នុងអំឡុងពេលនោះ មានភ្លៀងធ្លាក់ពីតិចទៅច្រើន អមដោយផ្គរ រន្ទះ និងខ្យល់កន្ត្រាក់ នៅទូទាំងប្រទេស ។
សេចក្តីជូនដំណឹងបានគូសបញ្ជាក់ថា សម្រាប់តំបន់ទំនាបភាគកណ្តាល នឹងមានសីតុណ្ហភាពចន្លោះពី២៣ ទៅ៣២អង្សាសេ តំបន់ខ្ពង់រាបមានចាប់ពី២២ដល់៣១អង្សាសេ និងតំបន់មាត់សមុទ្រមានពី២៤ទៅ៣៤អង្សាសេ។
កាលពីពេលថ្មីៗនេះ រដ្ឋបាលខេត្តព្រះសីហនុ ណែនាំឲ្យផ្អាកការដឹកជញ្ជូនភ្ញៀវទេសចរណ៍ទៅលេងកោះ និងសកម្មភាពនេសាទ ដោយសារអាកាសធាតុមិនល្អ ចាប់ពីថ្ងៃទី១៥ ដល់ថ្ងៃទី២០ ខែកក្កដា។
នៅថ្ងៃច័ន្ទនេះ រដ្ឋបាលខេត្តបានបញ្ជូនសាឡាងចំនួន ៦ ទៅយកភ្ញៀវទេសចរជាតិ និងអន្តរជាតិចំនួន ៧០៨ នាក់ ក្នុងនោះស្រី ៣៤៧ នាក់ និងកុមារ ១៥ នាក់ ដែលជាប់គាំងនៅលើកោះរ៉ុង និងកោះរ៉ុងសន្លឹម ដោយសារភ្លៀង ខ្យល់ព្យុះ និងរលកខ្លាំង៕ ផល សុផានិត – AKP