រាជរដ្ឋាភិបាលថ្មីរបស់កម្ពុជានឹងរក្សាជំហរមិនកែប្រែរបស់ប្រទេសក្នុងការគាំទ្រគោលនយោបាយចិនតែមួយ និងការមិនជ្រៀតជ្រែកចូលកិច្ចការផ្ទៃក្នុងរបស់ប្រទេសចិន។
ជំហរនេះត្រូវបានគូសបញ្ជាក់ដោយ ឯកឧត្តមបណ្ឌិត ហ៊ុន ម៉ាណែត ក្នុងជំនួបជាមួយលោក Wang Yi សមាជិកការិយាល័យនយោបាយ និងជាប្រធានការិយាល័យគណៈកម្មការកិច្ចការបរទេស នៃគណៈកម្មាធិការមជ្ឈិមបក្សកុម្មុយនីស្តចិន និងជារដ្ឋមន្រ្តីការបរទេសនៃសាធារណរដ្ឋប្រជាមានិតចិន នៅវិមានសន្តិភាព រាជធានីភ្នំពេញ កាលពីម្សិលមិញ។
ទន្ទឹមនឹងនេះ ឯកឧត្តមបណ្ឌិត ហ៊ុន ម៉ាណែត បានទទួលយកការអញ្ជើញចូលរួមក្នុងពិធីរំលឹកខួបលើកទី១០ នៃគំនិតផ្តួចផ្តើមខ្សែក្រវាត់ និងផ្លូវនៅទីក្រុងប៉េកាំង នាពាក់កណ្តាលខែតុលាឆ្នាំនេះ។
ចំណែកលោក Wang Yi ក៏បានបញ្ជាក់ជាថ្មីពីការប្តេជ្ញាចិត្តរបស់ប្រទេសចិនក្នុងការបន្តកិច្ចសហប្រតិបត្តិការប្រកបដោយប្រសិទ្ធភាព និងជិតស្និទ្ធជាមួយកម្ពុជា និងត្រៀមខ្លួនក្នុងការទទួលស្វាគមន៍ដំណើរទស្សនកិច្ចផ្លូវការ និងវត្តមានរបស់ឯកឧត្តមបណ្ឌិត ហ៊ុន ម៉ាណែត ក្នុងពិព័រណ៍ចិន-អាស៊ានលើកទី២០ ឆ្នាំ២០២៣ ដែលនឹងប្រារព្ធធ្វើនៅទីក្រុងណាននីង ប្រទេសចិន នៅពាក់កណ្តាលខែកញ្ញា។
មេដឹកនាំទាំងពីរបានសន្យាជំរុញកិច្ចសហប្រតិបត្តិការរវាងកម្ពុជា និងចិនបន្ថែមទៀត ដោយរក្សាបាននូវសមិទ្ធផលនាពេលកន្លងមក ក៏ដូចជាការពង្រីកទិសដៅនៃកិច្ចសហប្រតិបត្តិការលើវិស័យថ្មីៗ ដូចជាអគ្គិសនី ជាពិសេសវារីអគ្គិសនី ហេដ្ឋារចនាសម្ព័ន្ធ កសិកម្ម ពាណិជ្ជកម្ម។ល។
មេដឹកនាំទាំងពីរក៏បានឯកភាពបន្តកិច្ចសហប្រតិបត្តិការរបស់ប្រទេសទាំងពីរ និងគាំទ្រគ្នាទៅវិញទៅមកក្នុងក្របខ័ណ្ឌតំបន់ និងអន្តរជាតិ។ AKP-C.Nika