រដ្ឋបាលខេត្តមណ្ឌលគិរី កំពុងពិចារណាលើការប្រែក្លាយភូមិពូតាង ឲ្យក្លាយជាតំបន់ទេសចរណ៍វប្បធម៌ និងធម្មជាតិគំរូ។ លោក ថោង សាវុន អភិបាលខេត្តមណ្ឌលគិរី បានបង្ហាញពីគោលបំណងនេះនៅពេលចុះចែកកូនឈើហូបផ្លែដល់ប្រជាពលរដ្ឋ១០០គ្រួសារនៅក្នុងភូមិ ស្ថិតក្នុងសង្កាត់រមនា ក្រុងសែនមនោរម្យ នៅថ្ងៃទី១៨ ខែសីហា។
ដើម្បីសម្រេចបាននូវចក្ខុវិស័យ លោកបានអំពាវនាវឱ្យមានការចូលរួម និងការរួមចំណែករបស់សហគមន៍ក្នុងការធានាសុវត្ថិភាព អនាម័យល្អ ផ្លូវងាយស្រួលចេញចូល និងហេដ្ឋារចនាសម្ព័ន្ធផ្សេងទៀត និងការផ្គត់ផ្គង់អាហារស្អាត ក៏ដូចជាបន្លែ និងផ្លែឈើធម្មជាតិ។
ភូមិពូតាង ជាលំនៅដ្ឋានរបស់ជនជាតិដើមភាគតិចភាគច្រើនរស់នៅ ដែលអ្នកទេសចរអាចទស្សនា និងរៀនពីរបៀបរស់នៅរបស់ពួកគេ ខណៈពេលដែលរីករាយនឹងទេសភាពដ៏ស្រស់ស្អាត និងសត្វព្រៃនៅទីនោះ រួមទាំងដំរីផងដែរ។
បើតាមលោក សុង ឃាង ប្រធានមន្ទីរកសិកម្ម រុក្ខាប្រមាញ់ និងនេសាទខេត្តមណ្ឌលគិរី បានឲ្យដឹងថា ការចែកកូនឈើហូបផ្លែ គឺជាផ្នែកមួយ នៃចក្ខុវិស័យរយៈពេលវែង ដែលបានលើកឡើង៕ លឹម ណារី – AKP