“សៀវភៅស្តីពីការវិនិយោគនៅកម្ពុជា” ត្រូវបានដាក់ឱ្យប្រើប្រាស់សម្រាប់អ្នកវិនិយោគបរទេសដែលកំពុងស្វែងរកឱកាសនៅក្នុងទីផ្សារកម្ពុជា ដោយផ្តោតជាពិសេសលើច្បាប់ស្តីពីការវិនិយោគឆ្នាំ២០២១។
ពិធីប្រកាសឱ្យប្រើប្រាស់សៀវភៅត្រូវបានធ្វើឡើងកាលពីថ្ងៃចន្ទនេះ ក្រោមអធិបតីភាពរបស់លោក សុខ ចិន្តាសោភា រដ្ឋមន្ត្រីប្រតិភូអមនាយករដ្ឋមន្ត្រី និងជាអគ្គលេខាធិការក្រុមប្រឹក្សាអភិវឌ្ឍន៍កម្ពុជា និងលោក Nicholas Moore បេសកជនពិសេសទទួលបន្ទុកកិច្ចការអាស៊ីអាគ្នេយ៍នៃរដ្ឋាភិបាលអូស្រ្តាលី។
សៀវភៅនេះមានបញ្ជូលនូវបទពិសោធន៍របស់អ្នកវិនិយោគ ព្រមទាំងខ្លឹមសារដែលចែករំលែកដោយតំណាងរដ្ឋាភិបាល និងវិស័យឯកជនកម្ពុជា។
ស្ថានទូតអូស្ត្រាលីបាននិយាយនៅក្នុងសេចក្តីប្រកាសព័ត៌មានមួយដែលចេញផ្សាយកាលពីថ្ងៃអង្គារថា “សៀវភៅនេះគឺជាលទ្ធផលនៃកិច្ចសហការយ៉ាងជិតស្និទ្ធរវាងប្រទេសអូស្ត្រាលី និងកម្ពុជា ហើយមានគោលបំណងជំរុញឱកាសវិនិយោគនៅកម្ពុជា ដោយពន្យល់ពីច្បាប់ និងដំណើរការសំខាន់ៗនៃការវិនិយោគ”។
ស្ថានទូតបានគូសបញ្ជាក់ថា សៀវភៅនេះគឺមគ្គុទេសន៍ជាក់ស្តែងសម្រាប់អ្នកវិនិយោគអូស្ត្រាលី និងបរទេសផ្សេងទៀតដែលកំពុងស្វែងរកឱកាសនៅក្នុងទីផ្សារកម្ពុជា ដោយផ្តោតជាពិសេសលើច្បាប់ស្តីពីការវិនិយោគឆ្នាំ២០២១។
លោក Nicholas Moore កំពុងស្ថិតនៅក្នុងទីក្រុងភ្នំពេញ ដែលជាផ្នែកមួយនៃកិច្ចប្រជុំក្នុងតំបន់របស់លោក ដើម្បីជួយណែនាំដល់ការអភិវឌ្ឍន៍យុទ្ធសាស្ត្រសេដ្ឋកិច្ចអាស៊ីអាគ្នេយ៍របស់រដ្ឋាភិបាលអូស្ត្រាលីដល់ឆ្នាំ ២០៤០៕ AKP-Chea Vannak