អភិបាលក្រុងមកពីបណ្តាប្រទេសសមាជិកអាស៊ានបានចុះហត្ថលេខាលើសេចក្តីប្រកាសរួមមួយ ដើម្បីជំរុញការអភិវឌ្ឍន៍ទីក្រុងប្រកបដោយនិរន្តរភាព បរិយាប័ន្ន និងធន់នៅក្នុងតំបន់។
ការចុះហត្ថលេខាលើសេចក្តីប្រកាសរួមនេះ បានធ្វើឡើងក្នុងកិច្ចប្រជុំអភិបាលក្រុងអាស៊ាន (MGMAC) និងវេទិកាអភិបាលក្រុងអាស៊ាន (AMF) ដែលធ្វើឡើងនៅទីក្រុងហ្សាកាតា ប្រទេសឥណ្ឌូនេស៊ី កាលពីថ្ងៃទី១ ដល់ថ្ងៃទី២ ខែសីហា។
ទីភ្នាក់ងារសារព័ត៌មានវៀតណាមបានរាយការណ៍ថា “ព្រឹត្តិការណ៍នេះមានអ្នកចូលរួមប្រមាណ៥០០នាក់ រួមទាំងអភិបាលក្រុង និងតំណាងមកពីរដ្ឋាភិបាលក្នុងតំបន់នៃបណ្តាប្រទេសអាស៊ាន”។
នៅក្នុងសុន្ទរកថាបញ្ចប់ អភិបាលស្តីទីនៃទីក្រុងហ្សាកាតា លោក Heru Budi Hartono បានសង្កត់ធ្ងន់ថា សេចក្តីប្រកាសរួមតំណាងឱ្យកិច្ចព្រមព្រៀងមួយដែលមានគោលបំណងពង្រឹងកិច្ចសហប្រតិបត្តិការក្នុងប្លុកដើម្បីបង្កើតការរស់នៅទីក្រុងប្រកបដោយនិរន្តរភាព ដើម្បីគាំទ្រដល់ការអភិវឌ្ឍន៍សហគមន៍អាស៊ាន។
គណៈប្រតិភូបានសម្តែងនូវជំនឿរបស់ពួកគេថា ការអភិវឌ្ឍន៍ទីក្រុងប្រកបដោយនិរន្តរភាពនឹងពង្រឹងគោលដៅរួមរបស់អាស៊ាន និងលើកកម្ពស់នូវជំហររបស់ខ្លួនបន្ថែមទៀត ជាមជ្ឈមណ្ឌលកំណើនសេដ្ឋកិច្ចក្នុងតំបន់។ Bernama