របាយការណ៍របស់ក្រុមប្រឹក្សាអភិវឌ្ឍន៍កម្ពុជាបានឱ្យដឹងកាលពីថ្ងៃអង្គារថា ប្រទេសកម្ពុជាបានទាក់ទាញគម្រោងវិនិយោគទ្រព្យសកម្មថេរចំនួន១១៣ ដែលមានតម្លៃ ១,១ពាន់លានដុល្លារនៅក្នុងឆមាសទីមួយនៃឆ្នាំ២០២៣ ដោយបង្កើតការងារថ្មីចំនួន ១២២,០០០កន្លែង។

របាយការណ៍នេះបានបង្ហាញថា “ក្នុងអំឡុងខែមករា ដល់ខែមិថុនា ឆ្នាំនេះ ប្រទេសចិនគឺជាអ្នកវិនិយោគបរទេសកំពូលក្នុងប្រទេសកម្ពុជា ដែលស្មើនឹងជិត ២ភាគ៣ នៃការវិនិយោគសរុបក្នុងប្រទេស” ដោយបានបន្ថែមថា ព្រះរាជាណាចក្រកម្ពុជាបានអនុម័តគម្រោងវិនិយោគដែលត្រូវបានអនុម័ត មានតម្លៃជិត៧២៣លានដុល្លារ ពីប្រទេសចិនក្នុងអំឡុងពេលនោះ។

របាយការណ៍ក៏បានបន្ថែមថា វិនិយោគិនបរទេសផ្សេងទៀត មានដូចជាប្រទេសវៀតណាម សីស្ហែល (Seychelles) ថៃ កូរ៉េខាងត្បូង សាម័រ (Samoa) សហរដ្ឋអាមេរិក សិង្ហបុរី និងស៊ុយអែត។

របាយ​ការណ៍​បាន​បន្ត​ថា គម្រោង​វិនិយោគ​ទាំង​នោះគឺ​ផ្តោត​លើ​ឧស្សាហកម្មកាមន្តសាល កសិកម្ម កសិឧស្សាហកម្ម ទេសចរណ៍ និង​ហេដ្ឋារចនាសម្ព័ន្ធ។

អនុរដ្ឋលេខាធិការក្រសួងពាណិជ្ជកម្ម លោក ប៉ែន សុវិជាតិ មានប្រសាសន៍ថា កិច្ចព្រមព្រៀងភាពជាដៃគូសេដ្ឋកិច្ចគ្រប់ជ្រុងជ្រោយក្នុងតំបន់ (RCEP) កិច្ចព្រមព្រៀងពាណិជ្ជកម្មសេរីកម្ពុជា-ចិន (CCFTA) និងច្បាប់វិនិយោគអំណោយផលរបស់កម្ពុជា គឺជាកត្តាគន្លឹះក្នុងការទាក់ទាញអ្នកវិនិយោគបរទេសកាន់តែច្រើនមកកាន់ព្រះរាជាណាចក្រកម្ពុជា។

លោកបានប្រាប់សារព័ត៌មានស៊ីនហួថា “ទាំងកិច្ចព្រមព្រៀង RCEP និងកិច្ចព្រមព្រៀង CCFTA គឺជាមេដែកដើម្បីទាក់ទាញអ្នកវិនិយោគបរទេសមកកម្ពុជា។ «ការវិនិយោគផ្ទាល់ពីបរទេស ជាពិសេសពីប្រទេសចិន មានសារៈសំខាន់ណាស់ក្នុងការជួយជំរុញកំណើនសេដ្ឋកិច្ច និងពាណិជ្ជកម្មរបស់កម្ពុជាក្នុងយុគសម័យក្រោយជំងឺរាតត្បាតកូវីដ-១៩»៕ Xinhua