លោកនាយករដ្ឋមន្ត្រី ហ៊ុន សែន បានអះអាងថា ចាប់ពីឆ្នាំ១៩៩៨ មកដល់ឆ្នាំ ២០២២ អត្រាប្រជាជនកម្ពុជាបានកើនឡើងពី១១,៤លាននាក់មកដល់១៦,៨លាននាក់។ ក្នុងរយៈពេល២៤ឆ្នាំមកនេះ អត្រាប្រជាជនកម្ពុជាបានកើនឡើង៥,៤លាននាក់ ដែលជាអត្រាកំណើនកើនឡើងយឺត។
ពីម្សិលមិញលោកនាយករដ្ឋមន្ត្រី ហ៊ុន សែន បានផ្ញើសារលិខិតសម្រាប់ទិវាប្រជាជនពិភពលោកលើកទី៣៤ ដែលប្រារព្ធធ្វើក្រោមប្រធានបទ «ការបញ្ចេញអនុភាពនៃសមភាពយេនឌ័រ៖ ការជ្រោងឡើងនូវសំឡេងស្ត្រីនិងក្មេងស្រីដើម្បីបង្ហាញពីលទ្ធភាពគ្មានដែនកំណត់នៃពិភពលោកយើង»។
ក្នុងសារលិខិតកម្រាស់៥ទំព័រ ដែលមានហត្ថលេខារបស់លោកនាយករដ្ឋមន្ត្រី ហ៊ុន សែន បានឱ្យដឹងថា ការកើនឡើងប្រជាជនកម្ពុជារយៈពេលជាងពីរទស្សវត្សរ៍មកនេះ គឺបណ្តាលមកពីការធ្លាក់ចុះនៃអត្រាមរណភាព ការកើនឡើងនៃអាយុសង្ឃឹមរស់ និងសន្ទុះកំណើន។
លោក ហ៊ុន សែន បញ្ជាក់ក្នុងសារលិខិតថា អត្រាមរណភាពមាតាបានធ្លាក់ចុះពី៨១០នាក់ក្នុង ១០០ ០០០កំណើតរស់នៅឆ្នាំ២០០៨ មកត្រឹម១៧០នាក់ក្នុង១០០ ០០០កំណើតរស់នៅឆ្នាំ២០១៤ និងនៅត្រឹម១៥៤នាក់ក្នុង១០០ ០០០កំណើតរស់នៅឆ្នាំ២០២១-២០២២។
ចំពោះអត្រាមរណភាពកុមារអាយុក្រោម៥ឆ្នាំបានថយចុះពី១២៤នាក់ក្នុង ១ ០០០កំណើតរស់នៅឆ្នាំ២០០០ មកត្រឹម៥៥នាក់ក្នុង ១ ០០០កំណើតរស់នៅឆ្នាំ២០១០ និងមកត្រឹម១៦នាក់ក្នុង ១ ០០០កំណើតរស់នៅឆ្នាំ២០២១-២០២២។
ចំណែកអាយុសង្ឃឹមរស់របស់ប្រជាជនកម្ពុជាបានកើនឡើងជាលំដាប់ គឺកើនពី៥៤ឆ្នាំសម្រាប់បុរសនិង៥៨ឆ្នាំសម្រាប់ស្ត្រីនៅឆ្នាំ១៩៩៨ ដល់៦១ឆ្នាំសម្រាប់បុរសនិង៦៤ឆ្នាំសម្រាប់ស្ត្រីនៅឆ្នាំ២០០៨ ហើយបន្តកើនដល់៧៤,៣ឆ្នាំសម្រាប់បុរសនិង៧៦,៨ឆ្នាំសម្រាប់ស្ត្រីនៅឆ្នាំ២០១៩។
លោកនាយករដ្ឋមន្ត្រី ហ៊ុន សែន បានមានប្រសាសន៍ថា៖ «នេះជាជោគជ័យដ៏ធំធេងដែលកើតចេញពីការខិតខំប្រឹងប្រែងរួមគ្នា ទាំងរាជរដ្ឋាភិបាល ទាំងដៃគូអភិវឌ្ឍ រួមទាំងវិស័យឯកជននិងសង្គមស៊ីវិលក្នុងការកែលម្អនិងការអភិវឌ្ឍវិស័យសុខភាពសាធារណៈ»។
លោកបានបន្តថា៖ «កម្ពុជាកំពុងស្ថិតក្នុង
បរិបទប្រជាសាស្ត្រមួយល្អប្រសើរសម្រាប់ការអភិវឌ្ឍសង្គម សេដ្ឋកិច្ចជាតិបានលឿនជាងមុន ដោយសារមានប្រជាជនក្នុងវ័យធ្វើការច្រើន និងប្រជាជនវ័យក្នុងបន្ទុកតិច។ ចំនួនប្រជាជនវ័យ
១៥-៦០ឆ្នាំនឹងកើនដល់៦៥ភាគរយនៃប្រជាជនសរុប និងផលធៀបវ័យក្នុងបន្ទុកសរុបនឹងថយចុះដល់ចំនួន៥៤នាក់ក្នុងចំណោមប្រជាជនវ័យ១៥-៦០ឆ្នាំ១០០នាក់នៅឆ្នាំ២០៤០»។
ទោះជាយ៉ាងណា កម្ពុជានៅមានបញ្ហាប្រឈមមួយចំនួន ដូចជាអត្រាមរណភាពមាតានៅតែមានកម្រិតខ្ពស់ប្រៀបធៀបជាមួយនឹងបណ្តាប្រទេសក្នុងតំបន់ សេវាសុខភាពនិងសុខភាពបន្តពូជរបស់ស្ត្រីមិនទាន់គ្របដណ្តប់ជាសកល កម្លាំងពលកម្មជាស្ត្រីមានច្រើន ក៏ប៉ុន្តែស្ត្រីជាច្រើនធ្វើការងារគ្មានប្រាក់កម្រៃឬការងារមានប្រាក់ចំណូលទាប។
លោកស្រី ហង្ស លីណា អគ្គនាយិការវិទ្យាស្ថានជាតិស្ថិតិនៃក្រសួងផែនការ និងជាប្រតិភូរាជរដ្ឋាភិបាលទទួលបន្ទុកស្ថិតិ បានលើកឡើងថា អត្រាប្រជាជនកម្ពុជាកើនឡើងយឺតដោយសារតែខាងក្រសួងសុខាភិបាលបានធ្វើកម្មវិធីពន្យារកំណើតសម្រាប់ស្ត្រី ដែលបានធ្វើឱ្យកំណើតកើនឡើងយឺត។
លោកស្រីបន្តថា ទោះបីជាកម្ពុជាមានកម្មវិធីពន្យារកំណើតក៏ពិតមែន ប៉ុន្តែខាងក្រសួងផែនការបានណែនាំឱ្យត្រួតពិនិត្យអំពីសេដ្ឋកិច្ចគ្រួសាររបស់ប្រជាជនផងដែរ។ ប្រសិនបើសេដ្ឋកិច្ចគ្រួសារប្រជាជនរីកចម្រើន ដែលអាចទប់ទល់នឹងជីវភាពនិងអាចចិញ្ចឹមកូនប្រកបដោយគុណភាព ប្រជាជនចង់បានយកកូនប៉ុន្មានអាស្រ័យលើកប្រជាជនខ្លួនឯង ប៉ុន្តែប្រសិនបើសេដ្ឋកិច្ចក្នុងគ្រួសាររបស់ពួកគេមានការលំបាករហូតដល់មិនអាចចិញ្ចឹមកូនមានគុណភាពបានទេ ក៏មិនអាចជំរុញឱ្យពួកគេយកកូនច្រើនបាននោះដែរ។
លោកស្រី ហង្ស លីណា បានមានប្រសាសន៍ថា៖ «យើងមិនមានផែនការកំណត់គ្រួសារយកកូនតិចឬច្រើនទេ ប៉ុន្តែយើងគ្រាន់តែជាអ្នកប្រមូលព័ត៌មាន ហើយផ្ដល់ព័ត៌មាននោះទៅខាងក្រសួងសុខាភិបាល ក៏ដូចជាអគ្គលេខាធិការប្រជាជន ដើម្បីពួកគាត់រៀបចំគោលនយោបាយសមសម្របនឹងកំណើតសេដ្ឋកិច្ចជាតិ។ ប្រសិនបើអត្រាកំណើនប្រជាជនកើន តែសេដ្ឋកិច្ចជាតិមិនកើន នោះមិនមានតុល្យភាពគ្នាដែរ»។
តាមគោលនយោបាយជាតិប្រជាជនឆ្នាំ២០១៦ ដល់ឆ្នាំ២០៣០ របស់រដ្ឋាភិបាល គឺបានទទួលស្គាល់និងគាំទ្រចំពោះសិទ្ធិរបស់គូស្វាមីភរិយា និងបុគ្គលទាំងអស់មានសិទ្ធិជាមូលដ្ឋានក្នុងការសម្រេចចិត្តដោយសេរី និងដោយទទួលខុសត្រូវលើចំនួនកូននិងការពន្យាកំណើត ហើយបង្កលទ្ធភាពឱ្យស្ត្រីនិងក្មេងស្ត្រីទទួលបាននូវព័ត៌មានអប់រំ សេវា និងមធ្យោបាយ ដើម្បីធ្វើការសម្រេចចិត្តនេះ៕
Related Posts
- January 10, 2023
- January 20, 2023
- December 19, 2022
- January 3, 2023
