ចាប់ពីខែឧសភា ឆ្នាំ២០២៣ រហូតដល់បច្ចុប្បន្ន មន្ទីរពេទ្យគន្ធបុប្ឆា មានតម្រូវការឈាមកើនឡើងខ្ពស់ចាប់ពីចន្លោះ៨០ប្លោក ដល់៩០ប្លោក ក្នុងមួយថ្ងៃដើម្បីជួយសង្គ្រោះកុមារពីជំងឺគ្រុនឈាម និងការវះកាត់ទូទៅ។
វេជ្ជបណ្ឌិត តឹត លីវណ្ណារ៉ា អនុប្រធានមន្ទីរពេទ្យគន្ធបុប្ផាភ្នំពេញ បានឱ្យដឹងថា ចាប់ពីខែឧសភា រហូតដល់បច្ចុប្បន្ន មន្ទីរពេទ្យគន្ធបុប្ឆា គឺមានតម្រូវការឈាមកើនឡើងខ្លាំង ដែលជាមធ្យមត្រូវការប្រើឈាមអស់៩០ប្លោក ក្នុងមួយថ្ងៃ។
វេជ្ជបណ្ឌិតបញ្ជាក់ថា ការកើនឡើងខ្ពស់ក្នុងរយៈពេលចុងក្រោយនេះ គឺដោយសារមានការកើនឡើងច្រើននូវជំងឺគ្រុនឈាមធ្ងន់ៗ ដែលករណីខ្លះត្រូវការបញ្ចូលឈាម និងប្លាស្មារពី១០ ទៅ១៥ប្លោក។
វេជ្ជបណ្ឌិតបន្ថែមថា៖ «ក្រៅពីតម្រូវការឈាមសម្រាប់សង្គ្រោះព្យាបាលជំងឺគ្រុនឈាម ក៏មានករណីជាច្រើនទៀតដូចជា ការវះកាត់ទូទៅ វះកាត់បេះដូង ជំងឺមហារីកឈាម សម្រាលកូនដោយវះកាត់ និងស្រ្តីឆ្លងទន្លេមានបញ្ហាធ្លាក់ឈាមធ្ងន់ធ្ងរ ព្រមទាំងករណីគ្រោះថ្នាក់ចរាចរណ៍ធ្ងន់ធ្ងរៗ ជាដើម»។
វេជ្ជបណ្ឌិតបន្តថា ដោយសារតម្រូវការឈាមកើនឡើងខ្លាំង ដើម្បីប្រើប្រាស់ជួយសង្គ្រោះអាយុជីវិតកុមារ និងស្រ្តីមានផ្ទៃពោះ មន្ទីរពេទ្យត្រូវការឈាមជាមធ្យមចន្លោះពី ៨០ ទៅ ៩០ប្លោក ក្នុងមួយថ្ងៃ ប៉ុន្តែបច្ចុប្បន្ន ចំនួនអ្នកបរិច្ចាគឈាមមានការថយចុះ។
វេជ្ជបណ្ឌិត តឹត លីវណ្ណារ៉ា និយាយថា ចំនួនអ្នកបរិច្ចាគឈាមមានការថយចុះបែបនេះ បានធ្វើឱ្យស្តុកឈាមក្នុងមន្ទីពេទ្យគន្ធបុប្ផា ក៏មានការថយចុះគួរឱ្យកត់សម្គាល់ផងដែរ។
អនុប្រធានមន្ទីរពេទ្យគន្ធបុប្ផាភ្នំពេញ បានអំពាវនាវដល់ប្រជាពលរដ្ឋទូទាំងប្រទេស ជាពិសេសយុវជន ចូលរួមបរិច្ចាគឈាមដល់មន្ទីរពេទ្យគន្ធបុប្ផា ដើម្បីមន្ទីរពេទ្យមានស្តុកឈាមគ្រប់គ្រាន់សម្រាប់ជួយសង្គ្រោះអ្នកជំងឺនៅកម្ពុជា។
វេជ្ជបណ្ឌិត រស់ សីលវ៉ា នាយកប្រតិបត្តិមូលនិធិគន្ធបុប្ផាកម្ពុជា បានលើកឡើងថា រាល់ការលើកកម្ពស់សុខុមាលភាពកុមារ គឺមានសារៈសំខាន់ក្នុងការកសាងធនធានមនុស្សនៅកម្ពុជា ដើម្បីជាទំពាំងស្នងឫស្សីសម្រាប់ប្រទេសជាតិទាំងបច្ចុប្បន្ន និងអនាគត។
វេជ្ជបណ្ឌិតបញ្ជាក់ថា៖ «បច្ចុប្បន្ន មន្ទីរពេទ្យក៏កំពុងសាងសង់អគារសម្ភពថ្មីមួយ ដែលមានគ្រែសម្រាកចំនួន ១២០គ្រែ នៅមន្ទីរពេទ្យជ័យវរ័្មនទី៧ ខេត្តសៀមរាប និងបានពង្រីកបន្ថែមលើការព្យាបាលជំងឺមហារីកផ្សេងៗលើកុមារ តាមវិធីព្យាបាលដោយថ្មាំគីមីផងដែរ»។
សាស្ដ្រាចារ្យ គី សន់ទី ប្រធានមន្ទីរពេទ្យគន្ធបុប្ផាភ្នំពេញ ធ្លាប់ឱ្យដឹងកាលពីថ្មីៗនេះថា ក្នុងរយៈពេល៥ខែ ឆ្នាំ២០២៣ មន្ទីរពេទ្យគន្ធបុប្ផា មានកុមារឈឺចំនួន ៣២០,៩២១នាក់ ត្រូវបានពិនិត្យព្យាបាល នៅក្នុងផ្នែកពិគ្រោះជំងឺក្រៅ គឺបានកើន ៥២ភាគរយ បើធៀបកាលពីឆ្នាំ២០២២។
វេជ្ជបណ្ឌិតបន្ថែថា ចំពោះកុមារមានជំងឺធ្ងន់មានចំនួន ៧៤,៩៧៥នាក់ ត្រូវបានដាក់ឱ្យសម្រាកព្យាបាលនៅក្នុងមន្ទីរពេទ្យ គឺបានកើន ១០៨ភាគរយ ច្រើនជាងកាលពីឆ្នាំ២០២២។
វេជ្ជបណ្ឌិតបន្តថា យ៉ាងហោចមានកុមារចំនួន ៣៧៥នាក់ មានជំងឺគ្រុនឈាមធ្ងន់ធ្ងរ និងកុមារចំនួន ១០,៣៩១នាក់ ត្រូវបានក្រុមគ្រូពេទ្យទទួលវះកាត់ផ្នែកទូទៅ។ វេជ្ជបណ្ឌិតថ្លែងថា ចំពោះការវះកាត់បេះដូង និងភ្ជិតប្រហោងបេះដូងតាមសរសៃឈាម ទាំងនៅគន្ធបុប្ផាខេត្តសៀមរាប និងភ្នំពេញ គឺមានចំនួន ៣៦៧នាក់។
ចំពោះផ្នែកសម្ភពនៃមន្ទីរពេទ្យជ័យវរ្ម័នទី៧ (គន្ធបុប្ផាទី៣) ស្រ្តីមានផ្ទៃពោះចំនួន ៤២,០៩៥ករណី បានមកពិនិត្យតាមដានផ្ទៃពោះ និងព្យាបាល នៅក្នុងផ្នែកពិគ្រោះជំងឺក្រៅនៃមន្ទីរសម្ភព និងសម្រាលកូនបានចំនួន ៨,៣១៩នាក់ គឺកើន ៣៥ភាគរយ បើធៀបនឹងឆ្នាំ២០២២។
ករណីអត្រាមរណភាពកុមារក្នុងមន្ទីរពេទ្យ គឺមានត្រឹមតែ ០.៤ភាគរយប៉ុណ្ណោះ។ សម្រាប់ការចំណាយថវិកាក្នុងរយៈពេល៥ខែ នៃឆមាសទី១ ក្នុងឆ្នាំ២០២៣ គឺសរុបមានចំនួន ១៤,៣៤៨,៨៥៩ដុល្លារ។
វេជ្ជបណ្ឌិត លាង ឫទ្ធា ប្រធានកម្មវិធីជាតិប្រយុទ្ធជំងឺគ្រុនឈាម បានឱ្យដឹងថា ប្រជាពលរដ្ឋនៅទូទាំងប្រទេសកើតជំងឺគ្រុនឈាមនៅកម្ពុជាមានជាង ៩០០០ករណី ក្នុងនោះមាន ២២ករណី បានស្លាប់ ក្នុងរយៈពេលជាង៦ខែ ដើមឆ្នាំ២០២៣។
វេជ្ជបណ្ឌិតបន្ថែមថា តួលេខអ្នកជំងឺខាងលើនេះ កើនឡើងជាង ៥០០០ករណី បើធៀបរយៈពេលដូចគ្នាកាលពីឆ្នាំ២០២២ មានត្រឹមតែជាង ៤០០០ករណីប៉ុណ្ណោះ ដោយក្នុងនោះមាន ១០ករណីបានស្លាប់។
វេជ្ជបណ្ឌិត លាង ឬទ្ធា ថ្លែងថា ប្រជាពលរដ្ឋដែលកើតជំងឺគ្រុនឈាមច្រើនជាង គឺនៅរាជធានីភ្នំពេញ ខេត្តកណ្ដាល ត្បូងឃ្មុំ សៀមរាប និងខេត្តបន្ទាយមានជ័យ៕