នាយកដ្ឋានប្រយុទ្ធនឹងជំងឺឆ្លង (CDC) បានអះអាងថា ពួកគេកំពុងទប់ស្កាត់ការរីករាលដាលជំងឺហ្ស៊ីកាក្នុងសហគមន៍ បន្ទាប់ពីរកឃើញករណីថ្មីមួយលើក្មេងស្រីអាយុ៧ឆ្នាំម្នាក់ រស់នៅភូមិពពេជ ឃុំចុងដូង ស្រុកបារាយណ៍ ខេត្តកំពង់ធំ។
ក្រសួងសុខាភិបាលបានចេញសេចក្ដីប្រកាសព័ត៌មានពីម្សិលមិញថា ខ្លួនបាន
រកឃើញកុមារីអាយុ៧ឆ្នាំម្នាក់ឆ្លងជំងឺ
ហ្ស៊ីកា ដែលរស់នៅភូមិពពេជ ឃុំចុងដូង ស្រុកបារាយណ៍ ខេត្តកំពង់ធំ។
ក្រសួងសុខាភិបាលបានបញ្ជាក់ថា កុមារីនោះបានចូលសម្រាកនៅមន្ទីរពេទ្យបង្អែកបារាយណ៍-សន្ទុក នៅផ្នែកសង្គ្រោះបន្ទាន់កុមារ កាលពីថ្ងៃទី១៨ ខែកញ្ញា ដោយរោគសញ្ញាក្ដៅខ្លួនខ្លាំង ក្អួត និងរាក ហើយពេលគ្រូពេទ្យធ្វើតេស្ដគ្រុនឈាម តែទទួលលទ្ធផលអវិជ្ជមាន។ នៅថ្ងៃទី២០ ខែកញ្ញា
ឆ្នាំ២០២៣ ក្រុមគ្រូពេទ្យបានយកវត្ថុវិភាគផ្ញើរទៅវិទ្យាស្ថានប៉ាស្ទ័រ ប៉ុន្តែលទ្ធផលបញ្ជាក់វិជ្ជមានហ្ស៊ីកា។ បច្ចុប្បន្នក្មេងស្រីនោះមានភាពធូរស្រាយពីជំងឺហើយ។
ក្រសួងបាននិយាយថា វីរុសហ្ស៊ីកាឆ្លង
មកមនុស្សតាមរយៈមូសខ្លាដែលមានផ្ទុកវីរុស
ហ្ស៊ីកាខាំ។ ប្រភេទមូសខ្លានេះគឺដូចគ្នានឹងមូសខ្លាដែលផ្ទុកវីរុសជំងឺគ្រុនឈាមនិងគ្រុន
ឈីក។ ជំងឺហ្ស៊ីកាអាចឆ្លងតាមការរួមភេទជាមួយអ្នកផ្ទុកវីរុសហ្ស៊ីកា ពីព្រោះវីរុសនេះមាននៅក្នុងទឹកកាម ឈាម ទឹកនោម ទឹកភ្លោះ ទឹកមាត់ ព្រមទាំងសារធាតុរាវរាងកាយក្នុងខួរក្បាលនិងខួរឆ្អឹងខ្នង។ វីរុសហ្ស៊ីកាឆ្លងពីម្ដាយទៅកូនក្នុងកំលុងមានផ្ទៃពោះនិងនៅពេលសម្រាល។
ជាធម្មតា វីរុស
ហ្ស៊ីកាបណ្តាលឱ្យមានជំងឺហ្ស៊ីកាស្រាលមិនធ្ងន់ធ្ងរទេ ដែលចេញរោគសញ្ញាពីពីរទៅបីថ្ងៃ បន្ទាប់ពីមនុស្សម្នាក់ត្រូវខាំដោយមូសខ្លាដែលផ្ទុក
វីរុសហ្ស៊ីកា។ រោគសញ្ញាទូទៅ មានដូចជាគ្រុនក្ដៅស្ទិញៗ និងកន្ទួលក្រហមលើស្បែក អ្នកខ្លះទៀតអាចនឹងមានភ្នែកឡើងក្រហម ឈឺសាច់ដុំ ឈឺសន្លាក់ និងអស់កម្លាំងជាដើម។
រោគសញ្ញាទាំងនេះ ជាធម្មតាអាចជាសះស្បើយក្នុងរយៈពេលពីពីរទៅប្រាំពីរថ្ងៃ ហើយអត្រាស្លាប់មានកម្រិតតិចតួចណាស់។
គេបានប៉ាន់ប្រមាណថា ៨០ភាគរយនៃមនុស្សដែលបានឆ្លងវីរុសនេះមិនបានបង្ហាញរោគសញ្ញាអ្វីទេ។ មានករណីតិចតួច បំផុតដែលអាចវិវត្តទៅជាទន់ដៃទន់ជើង ហើយបើកើតមានលើស្ត្រីមានផ្ទៃពោះ គឺអាចទារកស្លាប់ក្នុងផ្ទៃ ឬក្បាលទារកអាចតូចជាងធម្មតា។
ក្រសួងបានណែនាំថា ក្នុងករណីរោគសញ្ញាកាន់តែធ្ងន់ធ្ងរ សូមស្វែងរកការពិគ្រោះជំងឺជាមួយគ្រូពេទ្យនៅតាមមណ្ឌលសុខភាពឬមន្ទីរពេទ្យ។ រោគវិនិច្ឆ័យ គឺធ្វើតាមរយៈមន្ទីរពិសោធន៍នៅក្នុងប្រទេសកម្ពុជា រួមមានមន្ទីរពិសោធន៍នៅវិទ្យាស្ថាន
សុខភាពសាធារណៈ និងវិទ្យាស្ថានប៉ាស្ទ័រកម្ពុជា ដែលទើបអាចធ្វើតេស្តរកវីរុសហ្ស៊ីកាបាន។ បច្ចុប្បន្នមិនមានវ៉ាក់សាំងដែលអាចប្រើសម្រាប់បង្ការជំងឺនេះនៅឡើយទេ។
នាយកដ្ឋានប្រយុទ្ធនឹងជំងឺឆ្លងលើទំព័រហ្វេសប៊ុកផ្លូវការពីថ្ងៃសៅរ៍ថា មន្រ្តីក្រុមឆ្លើយតបបន្ទាន់គ្រប់ជាន់ថ្នាក់និងមន្ត្រីជំនាញមកពីនាយកដ្ឋានប្រយុទ្ធនឹងជំងឺឆ្លង (CDC) កំពុងចុះទប់ស្កាត់ការរីករាលដាលនិងអង្គេត
ស្រាវជ្រាវរកប្រភពចម្លង ដើម្បីទប់ស្កាត់ការឆ្លងរីករាលដាលក្នុងសហគមន៍ឱ្យមានប្រសិទ្ធភាពខ្ពស់។
លោក លី សូវ៉ាន់ ប្រធាននាយកដ្ឋានប្រយុទ្ធនឹងជំងឺឆ្លង បានបញ្ជាក់ពីម្សិលមិញថា៖ «មកដល់ពេលនេះមិនមានរកឃើញករណីថ្មីទៀតទេ»។
នាយកដ្ឋានប្រយុទ្ធនឹងជំងឺឆ្លង បានសង្កត់ធ្ងន់ថា៖ «ការឆ្លងមេរោគហ្ស៊ីកាកំលុងពេលមានផ្ទៃពោះអាចបណ្តាលឱ្យទារកកើតមកមានក្បាលតូច (microcephaly) និងភាពមិនប្រក្រតីពីកំណើតផ្សេងទៀត ក៏ដូចជាការកើតមិនគ្រប់ខែ និងការរលូតកូន»។
ក្រសួងសុខាភិបាល និងនាយកដ្ឋានប្រយុទ្ធនឹងជំងឺឆ្លង បានអំពាវនាវដល់ប្រជាជន ជាពិសេសកុមារតូច និងស្រ្តីមានផ្ទៃពោះថា ការបង្ការដែលល្អបំផុតពីជំងឺហ្ស៊ីកា គឺត្រូវអនុវត្តដូចនឹងការបង្ការជំងឺគ្រុនឈាមនិងគ្រុនឈីក ដោយការការពារខ្លួនកុំមូសខ្លាខាំ ស្ត្រីដែលមានផ្ទៃពោះ ឬមានផែនការនឹងមានផ្ទៃពោះ និងដៃគូរួមភេទរបស់គាត់រឹតតែត្រូវមានការប្រុងប្រយ័ត្នបន្ថែមទៀត ដើម្បីការពារខ្លួនពីមូសខ្លាដែលមានផ្ទុក
វីរុសហ្ស៊ីកាខាំ និងការចម្លងតាមការរួមភេទ។
ក្រសួងសុខាភិបាលឆ្លងផ្ដល់លេខ១១៥ ដើម្បីទាក់ទងសួរព័ត៌មានបន្ថែមអំពីជំងឺ
ហ្ស៊ីកា ឬទាក់ទងលោកវេជ្ជបណ្ឌិត លាង ឬទ្ធី ដែលជាមន្ត្រីជំនាញ តាមរយៈលេខទូរសព្ទ ០១២ ៧១៥ ៦៦៦ ឬអុីម៉ែល rithealeang@gmail.com។
របាយការណ៍ក្រសួងសុខាភិបាល បានឱ្យដឹងថា វីរុសហ្ស៊ីកាបានចាប់ផ្តើមមានវត្តមាននៅប្រទេសកម្ពុជាតាំងពីឆ្នាំ២០០៧មកម៉្លេះ។ កម្ពុជាធ្លាប់រកឃើញជំងឺហ្ស៊ីកា៧ករណីមកហើយ ចាប់តាំងពីឆ្នាំ២០០៧ ដល់ឆ្នាំ២០១០ ប៉ុន្តែសុទ្ធតែជាសះស្បើយវិញទាំងអស់៕
Related Posts
- December 19, 2022
- January 10, 2023
- January 20, 2023
- September 5, 2023
