លោក ហ៊ុន សែន ប្រធានគណបក្សប្រជាជនកម្ពុជា និងជាប្រធានឧត្តមប្រឹក្សាផ្ទាល់ព្រះមហាក្សត្រ បានប្រកាសគាំទ្ររាល់ការកែទម្រង់របស់មន្ត្រីបន្តវេននៅតាមក្រសួង និងស្ថាប័ន តែមិនគាំទ្ររាល់ការដកមន្ត្រីចាស់ដែលខំធ្វើការចោលឡើយ។
លោក ហ៊ុន សែន ប្រកាសជាសាធារណៈនៅលើបណ្ដាញសង្គមកាលពីម្សិលមិញ ថា កាលពីដើមអាណត្តិទី៦ លោកធ្លាប់រម្លឹកដល់មន្ត្រីបន្តវេនឱ្យរក្សាចាស់ បង្កើតថ្មី ដើម្បីរក្សាគុណតម្លៃសម្រាប់មន្ត្រីដែលប្រឹងប្រែងធ្វើការកាលពីកន្លងទៅ។
លោកបន្ថែមថា រាល់ការកែទម្រង់ គឺលោកមិនជំទាស់នោះទេ ប៉ុន្តែមិនគាំទ្ររាល់ការរៀបចំណាមួយ ដែលខ្វះការឱ្យតម្លៃដល់មន្ត្រីដែលប្រឹងប្រែងធ្វើការតាំងពីដើម រហូតដល់បច្ចុប្បន្ន។
លោក ហ៊ុន សែន បញ្ជាក់ថា៖ «[…] ដើម្បីជាការរម្លឹកដល់មន្ត្រីបន្តវេនតាមស្ថាប័នសូមមានការប្រុងប្រយ័ត្នលើភាពអគុណធម៌សម្រាប់ការរៀបចំមន្ត្រីក្នុងអាណត្តិថ្មីបន្ថែមលើ
បណ្តាំរបស់ខ្ញុំ កាលពីល្ងាចថ្ងៃ១០ ខែសីហា ២០២៣ ពេលជួបជុំមុនពេលគណរដ្ឋមន្ត្រីថ្មីត្រូវបានរៀបចំ»។
លោកបន្ថែមថា៖ «ខ្ញុំគាំទ្រការកែទម្រង់ តែមិនគាំទ្រការរៀបចំណាដែលខ្វះការឱ្យតម្លៃសម្រាប់មនុស្សដែលខំធ្វើការក្នុងរយៈពេលកន្លងមក ហើយត្រូវបានដកចេញដោយគ្មានមូលហេតុដែរ»។
ក្នុងវីដេអូឃ្លីបប្រមាណជាង៦នាទី លោក ហ៊ុន សែន លើកឡើងថា បើធ្វើនយោបាយគ្រាន់តែដោះដូរមនុស្ស ហើយហៅថាកែទម្រង់ នោះគណបក្សមួយនឹងស្លាប់ ហើយមេដឹកនាំបក្សនោះក៏នឹងស្លាប់ដោយឯកោបំផុតដែរ។
លោកបន្តថា ជោគជ័យរបស់លោកចាប់ផ្ដើមពីមនុស្សត្រឹមតែ៥នាក់ ប៉ុន្តែរហូតដល់បច្ចុប្បន្នមានមនុស្សរាប់លាន់នាក់នៅជាមួយលោក ក៏ដូចនៅក្នុងគណបក្សប្រជាជនកម្ពុជា តាមរយៈរក្សាចាស់ បង្កើតថ្មី។
ប្រធានគណបក្សខាងលើបន្ថែមថា បើទទួលបានជោគជ័យហើយនាំគ្នាបោះបង់មន្ត្រីដែលខំប្រឹងប្រយុទ្ធ ដើម្បីយកឈ្នះ តើ ហ៊ុន សែន អយុត្តិធម៌ដែរទេ? ការប្រកួតត្រូវបានយកឈ្នះ តែទីបំផុតត្រូវបានទាត់មន្ត្រីតស៊ូចោល។
លោកបន្តថា៖ «សម្រាប់អាណត្តិក្រោយទៀត តើត្រូវប្រើនរណា? តើនេះជាយុទ្ធសាស្ត្រឈ្នះលើសមរភូមិ ឬយុទ្ធសាស្ត្រឈ្នះសង្គ្រាម? ខ្ញុំមិនត្រូវការឈ្នះត្រឹមសមរភូមិទេ ខ្ញុំត្រូវការឈ្នះទាំងសង្គ្រាមជារៀងរហូតតាមរយៈរក្សាចាស់ បង្កើតថ្មី»។
លោក សុខ ឥសាន អ្នកនាំពាក្យគណបក្សប្រជាជនកម្ពុជា ប្រាប់កាសែតខ្មែរថាមស៍ កាលពីម្សិលមិញថា ចំពោះសំណេររបស់លោក ហ៊ុន សែន គឺផុសចេញពីទឹកចិត្តគិតគូរពីគុណសម្បត្តិរបស់មន្ត្រីដែលធ្លាប់មានស្នាដៃល្អ ដើម្បីបម្រើការងារជូនជាតិមាតុភូមិ និងប្រជាជនកម្ពុជាទាំងមូល។
លោកបន្ថែមថា សម្រាប់មន្ត្រីចាស់ដែលមានស្នាដៃល្អ គួរតែមន្ត្រីបន្តវេនមានគោលនយោបាយលើកទឹកចិត្ត ក៏ដូចជាការផ្ដល់នូវពានរង្វាន់ជូនមន្ត្រីដែលមានគុណសម្បត្តិទាំងនោះ។
លោក សុខ ឥសាន បញ្ជាក់ថា៖ «បើមានករណីដក ឬបញ្ឈប់មន្ត្រីពីការងារ ដោយគ្មានមូលហេតុច្បាស់លាស់ទេ គឺគួរឱ្យសោកស្ដាយណាស់ ព្រោះស្ដាយធនធានមនុស្សដែលធ្លាប់មានគុណសម្បត្តិ និងនាំផលប្រយោជន៍ជូនជាតិមាតុភូមិ»។
លោកថា ការលើកឡើងរបស់លោក ហ៊ុន សែន ឆ្លុះបញ្ចាំងពីទឹកចិត្តរបស់លោក ក្នុងនាមជាមេដឹកនាំមានបទពិសោធន៍យូរឆ្នាំ ហើយលោកក៏មានការសោកស្ដាយផងដែរ បើសិនមិនគិតគូរ ឬបោះបង់មន្ត្រីចាស់ទាំងនោះចោល។
លោកបញ្ជាក់ថា ចំពោះព័ត៌មានដែលលើកឡើងអំពីមន្ត្រីបន្តវេនក្រសួងមួយចំនួនដកមន្ត្រីចាស់ចោល ឬមានការផ្លាស់ប្ដូរនោះ លោកពុំទាន់ដឹងច្បាស់នៅឡើយ តែអាចសួរទៅអ្នកនាំពាក្យរដ្ឋាភិបាល ។
ជុំវិញបញ្ហានេះ អ្នកនាំពាក្យរដ្ឋាភិបាល លោក ប៉ែន បូណា
សុំមិនទាន់អត្ថាអធិប្បាយលម្អិតនៅឡើយ ព្រោះរង់ចាំពិនិត្យព័ត៌មានឱ្យបានជាក់លាក់ជាមុនសិន។
កាលពីថ្ងៃទី២២ ខែសីហា ឆ្នាំ២០២៣ ព្រះមហាក្សត្រ
នរោត្តម សីហមុនី ចេញព្រះរាជក្រឹត្យត្រាស់បង្គាប់តែងតាំងលោក ហ៊ុន ម៉ាណែត ជានាយករដ្ឋមន្ត្រី សម្រាប់នីតិកាលទី៧ នៃរដ្ឋសភា។
ក្នុងព្រះរាជក្រឹត្យ ក៏បានតែងតាំងមុខតំណែងមន្ត្រី ១០រូប ជា ឧបនាយករដ្ឋមន្ត្រី និងមន្ត្រី ២១រូប ជា ទេសរដ្ឋមន្ត្រី និងតែងតាំងមុខតំណែងរដ្ឋមន្ត្រីក្រសួង និងរដ្ឋមន្ត្រីទទួលបន្ទុកលេខាធិការដ្ឋាន សរុប៣០រូប៕