ឯកឧត្តមបណ្ឌិត ហ៊ុន ម៉ាណែត នាយករដ្ឋមន្ត្រីនៃប្រទេសកម្ពុជាបានមានប្រសាសន៍កាលពីថ្ងៃអង្គារថា រដ្ឋាភិបាលបានបម្រុងថវិការចំនួន ១០០ លានដុល្លារសម្រាប់ជំរុញវិស័យកសិកម្ម។
ឯកឧត្តមបណ្ឌិតបានថ្លែងក្នុងសុន្ទរកថាក្នុងឱកាសជួបសំណេះសំណាលជាមួយកម្មកររោងចក្រកាត់ដេរប្រមាណ ១៨,០០០ នាក់ក្នុងរាជធានីភ្នំពេញថា “យើងបានរៀបចំថវិកាចំនួន ១០០ លានដុល្លារដើម្បីជួយលើផលិតផលកសិកម្មដូចជា ស្រូវ អង្ករ និងបន្លែ”។
ឯកឧត្តមបណ្ឌិតបានបន្តថា តម្លៃកសិផលមានការប្រែប្រួលទៅតាមតម្រូវការក្នុងទីផ្សារអន្តរជាតិ ទោះជាយ៉ាងណាថវិកាទាំងនេះនឹងជួយរក្សាស្ថិរភាពតម្លៃកសិផលសម្រាប់កសិករ។
ទន្ទឹមនឹងនេះ ថវិកានេះក៏នឹងត្រូវបានប្រើប្រាស់សម្រាប់កែលម្អប្រព័ន្ធធារាសាស្ត្រ និងសម្រាប់បណ្តុះបណ្តាលអ្នកជំនាញកសិកម្មផងដែរ។
ឯកឧត្តមបណ្ឌិតបានបន្តទៀតថា រដ្ឋាភិបាលកម្ពុជាមានគម្រោងដាក់ពង្រាយមន្ត្រីកសិកម្មទៅកាន់គ្រប់ឃុំទាំងអស់ទូទាំងប្រទេស ដើម្បីធ្វើការដោយផ្ទាល់ជាមួយកសិករ។
វិស័យកសិកម្មគឺជាសសរស្តម្ភមួយក្នុងចំណោមសសរស្តម្ភទាំងបួនដែលជួយដល់សេដ្ឋកិច្ចកម្ពុជា។
កម្ពុជាបាននាំចេញកសិផលចំនួន ៤,៥១ លានតោនទៅកាន់ ៦៨ ប្រទេស និងតំបន់ក្នុងរយៈពេល ៧ ខែដំបូងនៃឆ្នាំ ២០២៣ ដោយទទួលបានប្រាក់ចំណូលសរុបជិត ២,៦៣ ពាន់លានដុល្លារអាមេរិក នេះបើយោងតាមរបាយការណ៍របស់ក្រសួងកសិកម្ម រុក្ខាប្រមាញ់ និងនេសាទ។
របាយការណ៍បានបន្តថា ការនាំចេញកសិផលសំខាន់ៗរួមមាន អង្ករ កៅស៊ូ ដំឡូងមី ស្វាយ ចេកស្រស់ ម្រេច គ្រាប់ស្វាយចន្ទី មៀនប៉ៃលិន ពោត និងប្រេងដូងជាដើម។ Xinhua