ក្រសួងបរិស្ថាន និងអង្គការមូលនិធិអាស៊ី ជំរុញកិច្ចសហប្រតិបត្តិការលើការគ្រប់គ្រងសំណល់រឹង និងយន្តការសហគមន៍ស្អាតនៅកម្ពុជា ដើម្បីពង្រឹងប្រសិទ្ធភាពគ្រប់គ្រងសំរាម សំណល់រឹង និងធានាបរិស្ថានស្អាត មានអនាម័យល្អ និងផាសុខភាព។
កិច្ចសហប្រតិបត្តិការវិស័យខាងលើនេះ ធ្វើឡើងក្នុងជំនួបរវាងលោក អ៊ាង សុផល្លែត រដ្ឋមន្ត្រីក្រសួងបរិស្ថាន និងលោកស្រី មេលោនេយ លីដប៊ក Meloney Lindberg តំណាងប្រចាំប្រទេសសមាជិកនៃអង្គការមូលនិធិអាស៊ី នៅទីស្តីការក្រសួងកាលពីថ្ងៃសុក្រ។
លោកស្រី មេលោនេយ លីដប៊ក បានថ្លែងថា ចំពោះសំណល់រឹង បានក្លាយជាក្តីបារម្ភសម្រាប់បណ្ដាប្រទេសនៅលើពិភពលោក និងជាការងារដែលត្រូវកែច្នៃ ព្រមទាំងគ្រប់គ្រងឱ្យមានប្រសិទ្ធភាពទាំងនៅទីប្រជុំជន និងទីក្រុង។
លោកស្រីបន្ថែមថា តាមរយៈកិច្ចសហប្រតិបត្តិការរវាងអង្គការមូលនិធិអាស៊ី និងក្រសួងបរិស្ថាន កម្ពុជាបានអនុវត្តគម្រោងការសិក្សាស្រាវជ្រាវអំពីការគ្រប់គ្រងសំរាម និងសំណល់រឹងនៅតាមទីប្រជុំជន សម្រាប់កែលម្អបរិស្ថានឱ្យកាន់តែប្រសើរ។
លោកស្រីបន្តថា ចំពោះការសិក្សា និងស្រាវជ្រាវអំពីការគ្រប់គ្រងសំរាម និងសំណល់រឹង ធ្វើឡើងសម្រាប់បង្កើតវិធីសាស្ត្រស្រាវជ្រាវ ដើម្បីចងក្រង ប្រមូល និងវិភាគលើទិន្នន័យ លិខិតបទដ្ឋានគតិយុត្តសំខាន់ៗ ដែលពាក់ព័ន្ធនឹងការគ្រប់គ្រងសំរាម សំណល់រឹងទីប្រជុំជន ឈានទៅពង្រឹងប្រសិទ្ធភាពគ្រប់គ្រងសំរាម និងសំណល់រឹង។
លោក អ៊ាង សុផល្លែត បញ្ជាក់ថា ជាយុទ្ធសាស្រ្តចម្បងក្នុងដំណាក់កាលទី១ ក្រសួងបរិស្ថាន បានដាក់ចេញយុទ្ធនាការកាត់បន្ថយការប្រើប្រាស់ប្លាស្ទិក ក្រោមប្រធានបទ «ថ្ងៃនេះ ខ្ញុំមិនប្រើប្រាស់ថង់ប្លាស្ទិកទេ»។
ការអនុវត្តគោលការណ៍ស្អាត ផ្តើមចេញពីសាលារៀន នាំឱ្យផ្ទះស្អាត សហគមន៍ស្អាតអាចទាក់ទាញទេសចរណ៍ឱ្យមកទស្សនា ជាពិសេសរៀបចំឱ្យមានធុងសំរាមសម្រាប់ទុកដាក់សំរាម ក៏ជាអាទិភាពសំខាន់សម្រាប់គ្រប់គ្រងសំណល់រឹងផងដែរ។
លោកបន្ថែមថា៖ «ក្រសួង នឹងរៀបចំឱ្យមានម៉ាស៊ីនផលិតទឹកស្អាត ផ្តល់តាមសហគមន៍ និងសាលារៀនសម្រាប់ប្រើប្រាស់ ដើម្បីកាត់បន្ថយការប្រើដបប្លាស្ទិក ពីព្រោះថាប្រសិនជាយើងផ្តល់ដបទឹកបរិស្ថានជូនបានចំនួនតិចតួច តែបើមានទឹកស្អាតគាត់អាចយកដបទៅច្រកទឹកយកមកប្រើប្រាស់បាន»។
រដ្ឋមន្ត្រីបញ្ជាក់ថា ការប្រែប្រួលឥរិយាបទ ឬទម្លាប់របស់សហគមន៍ ក៏ជាយុទ្ធសាស្រ្តជោគជ័យមួយដែលមិនអាច
មើលរំលងបានក្នុងការគ្រប់គ្រងសំណល់រឹង ប៉ុន្តែដើម្បីឱ្យ
ប្រជាពលរដ្ឋផ្លាស់ប្តូរទម្លាប់អវិជ្ជមានទៅវិជ្ជមានបាន លុះត្រាណាតែមានដំណោះស្រាយផ្នែកជីវភាពជូនប្រជាពលរដ្ឋ។
ជាក់ស្តែងក្នុងជំហានទី១ ក្រសួងបានអប់រំឱ្យប្រជាសហគមន៍ ដែលធ្លាប់ចូលព្រៃកាប់ឈើ ងាកមកដាំដំណាំហូបផ្លែ ឬផ្តល់សេវាកម្មនាំភ្ញៀវទេសចរក្នុងតំបន់ការពារធម្មជាតិ ដើម្បីលើកស្ទួយជីវភាពប្រជាសហគមន៍។
លោក ហូ វណ្ឌី ទីប្រឹក្សាសមាគមទេសចរណ៍កម្ពុជា ធ្លាប់លើកឡើងថា បរិស្ថានស្អាត និងមានអនាម័យល្អ ផ្តើមចេញពីលំនៅឋានស្អាតជាមុនសិន ព្រោះស្ដែងចេញពីការយល់ដឹង និងរួមចំណែកអនុវត្តរបស់ប្រជាពលរដ្ឋនៅតាមមូលដ្ឋាន អាជ្ញាធរមូលដ្ឋាន និងភាគីពាក់ព័ន្ធ។
លោកបន្ថែមថា សកម្មភាព និងការចូលរួមរបស់ប្រជាពលរដ្ឋ គឺជាកត្តាសំខាន់បំផុត ដើម្បីជំរុញ និងលើកកម្ពស់បរិស្ថាន។ សោភ័ណភាពរបស់ទីក្រុង និងទីប្រជុំជន ដោយគិតចាប់ពីការបែងចែក និងទុកដាក់សំរាមប្រកបដោយភាពឆ្លាតវៃ។
លោកបញ្ជាក់ថា៖ «បើប្រជាពលរដ្ឋ មានកិច្ចសហការជាមួយអាជ្ញាធរ ដើម្បីចូលរួមថែរក្សាបរិស្ថាន និងសម្អាតភូមិដ្ឋាន ដែលពួកគាត់រស់នៅ ហើយនៅពេលលំនៅឋានរបស់ពួកគាត់ស្អាត មានអនាម័យល្អ បរិស្ថានល្អ និងមានសោភ័ណភាពស្រស់ស្អាត នោះឈ្មោះថា ទីក្រុងស្អាត ទីប្រជុំល្អ នឹងកើតមានឡើង»។
កាលពីថ្ងៃសុក្រ លោក អ៊ាង សុផល្លែត ក៏បានជួបភាក្សាការងារជាមួយលោក Joseph Scheuer អ្នកសម្របសម្រួលអង្គការសហប្រជាជាតិប្រចាំកម្ពុជា នៅទីស្ដីការក្រសួងផងដែរ។
លោក Joseph Scheuer បញ្ជាក់ថា អង្គការដែលជាសមាជិកនៅក្រោម UN ត្រៀមខ្លួនជានិច្ចជាមួយកម្ពុជា ដើម្បីសម្រេចបានជោគជ័យលើការអនុវត្តផែនការយុទ្ធសាស្រ្តបញ្ចកោណដំណាក់កាលទី១ ជាពិសេសកិច្ចការពារបរិស្ថាន ឆ្លើយតបទៅនឹងការប្រែប្រួលអាកាសធាតុ លើកកម្ពស់ជីវភាពប្រជាជន និងគ្រប់គ្រងសំណល់។
កាលពីថ្ងៃព្រហស្បត្តិ៍ លោក អ៊ាង សុផល្លែត ក៏បានជួបពិភាក្សាការងារជាមួយលោក Jacques Pellet ឯកអគ្គរដ្ឋទូតបារាំង នៅទីស្ដីការក្រសួង។
រដ្ឋមន្ត្រីក្រសួងបរិស្ថាន លើកឡើងថា ក្រសួងបានដាក់ចេញនូវយុទ្ធនាកាកាត់បន្ថយការប្រើប្រាស់ថង់ប្លាស្ទិកនៅតាមសាលារៀន ដែលកំពុងចូលរួមយ៉ាងសកម្មក្នុងយុទ្ធនាការនេះ ហើយនឹងបន្តទៅម្ចាស់អាជីកម្ម ឬក្រុមហ៊ុនឯកជន ជាជំហ៊ានៗបន្តទៀត។
លោកបន្តថា ជាលទ្ធផល ខេត្តមួយចំនួនបានប្តេជ្ញាចិត្តចំពោះការកាត់បន្ថយការប្រើប្រាស់ថង់ប្លាស្ទិក ក្នុងនោះមានអ្នកគាំទ្រពីសំណាក់លោកគ្រូ អ្នកគ្រូ និងសិស្សានុសិស្សជាង ១០ម៉ឺននាក់៕
Related Posts
- January 10, 2023
- January 20, 2023
- December 19, 2022
- September 5, 2023
