ឯកអគ្គរាជទូតជប៉ុនប្រចាំនៅកម្ពុជា លោក អ៊ូ អុិណុ អាត់ស៊ូសុី បានប្រកាសពីគម្រោងជំនួយអភិវឌ្ឍន៍ជាផ្លូវការ (ODA) របស់ជប៉ុនសម្រាប់ការអភិវឌ្ឍឌីជីថលភាវូនីយកម្ម ដែលជាសសរស្ដម្ភទី៥នៅក្នុងយុទ្ធសាស្ត្របញ្ចកោណរបស់រដ្ឋាភិបាលថ្មីដឹកនាំដោយលោកនាយករដ្ឋមន្ត្រី ហ៊ុន ម៉ាណែត។
នេះជាការបន្ថែមការគាំទ្រថ្មីមួយទៀតរបស់ជប៉ុន ដែលលោក អ៊ូអុិណុ អាត់ស៊ូសុី ឯកអគ្គរាជទូតជប៉ុនប្រចាំកម្ពុជា បានបញ្ជាក់នៅក្នុងកិច្ចពិភាក្សាតុមូលស្តីពី «ទំនាក់ទំនងកម្ពុជា-ជប៉ុន» ពីម្សិលមិញ នៅភ្នំពេញ។
លោក អ៊ូអុិណុ អាត់ស៊ូសុី ឯកអគ្គរាជទូតជប៉ុនប្រចាំនៅកម្ពុជា បាននិយាយថា ទាក់ទងនឹងគម្រោងជំនួយអភិវឌ្ឍន៍ជាផ្លូវការរបស់ជប៉ុន គឺជប៉ុនបានផ្ដល់កិច្ចគាំទ្រជាច្រើន ដូចជាការអភិវឌ្ឍហេដ្ឋារចនាសម្ព័ន្ធ វិស័យអប់រំ សុខាភិបាល ការអភិរក្សឧទ្យាជាតិប្រវត្តិសាស្ត្ររបស់កម្ពុជាជាដើម។ និយាយជារួម ជប៉ុននៅតែបន្តការគាំទ្រទាំងវិស័យសេដ្ឋកិច្ចនិងសង្គមសម្រាប់ការអភិវឌ្ឍកម្ពុជា។
លោកបន្តថា សម្រាប់បច្ចុប្បន្ននេះ ជប៉ុនផ្ដោតយកការយក ចិត្តទុកដាក់ជាពិសេសលើយុទ្ធសាស្ត្រថ្មីរបស់រដ្ឋាភិបាលកម្ពុជា ដែលបានប្រកាសដោយលោកនាយករដ្ឋមន្ត្រី ហ៊ុន ម៉ាណែត នៅក្នុងសម័យប្រជុំគណៈរដ្ឋមន្ត្រីលើកទីដំបូង។
លោកបន្ថែមថា ឌីជីថលភាវូនីយកម្ម រដ្ឋាភិបាលឌីជីថល សេដ្ឋកិច្ចឌីជីថល សង្គមឌីជីថល ជាសសរស្ដម្ភស្នូលមួយនៅក្នុងយុទ្ធសាស្ត្របញ្ចកោណ ដែលត្រូវបានដាក់បញ្ចូលក្នុងក្របខណ្ឌចាំបាច់ប្រតិបត្តិការរបស់ជប៉ុន។
លោកនិយាយថា៖ «ខ្ញុំអាចនិយាយបានថាជាការគាំទ្រជំនួយអភិវឌ្ឍន៍ជាផ្លូវការ ODA របស់ជប៉ុននិងកម្ពុជា ដែលផ្ដោតសំខាន់លើឌីជីថលភាវូនីយកម្ម គឺធ្វើយ៉ាងណាធ្វើឱ្យកម្ពុជាអាចបង្កើតនូវរដ្ឋាភិបាលឌីជីថល ឬក៏បង្កើននូវបណ្ដេញទូរគមនាគមន៍ដោយជំរុញពី
៤G ទៅ៥G។ ចំណែកជំនួយលើវិស័យផ្សេងៗ គឺពុំមានផ្លាស់ប្ដូរជំនួយទេ»។
លោកបន្ថែមថា៖ «មិនតែប៉ុណ្ណោះ យើងពិនិត្យបានមើលលើកិច្ចសហប្រតិបត្តិការដោយផ្អែកលើភាពជាក់ស្ដែងរបស់រាជរដ្ឋាភិបាលកម្ពុជា។ នៅប្រទេសជប៉ុន គឺថាយើងទើបតែបង្កើតធម្មនុញ្ញកិច្ចសហប្រតិបត្តិការរបស់ជប៉ុន ដែលជាឯកសារស្នូលមួយក្នុងការកំណត់គោលនយោបាយនៃការផ្ដល់ឱ្យរបស់ជប៉ុនកាលពីខែមិថុនាកន្លងមកនេះ»។
លោកបន្ថែមទៀតថា៖ «យើងកំពុងតែរៀបចំឱ្យមានកិច្ចសន្ទនារវាងកម្ពុជានិងជប៉ុនដោយផ្អែកលើយុទ្ធសាស្ត្របញ្ចកោណរបស់រដ្ឋាភិបាលកម្ពុជា។ បន្ទាប់មកទៀត យើងអាចនឹងផ្ដល់ប្ដូរនូវធម្មនុញ្ញនៃការផ្ដល់ជំនួយអភិវឌ្ឍន៍របស់ជប៉ុនស្របទៅតាមនោះដែរ។ ការរៀបចំនេះដើម្បីឱ្យប្រាកដថាទម្រង់នៃកិច្ចសហប្រតិបត្តិការថ្មីនោះ គឺនឹងត្រូវអនុវត្តស្របទៅតាមយុទ្ធសាស្ត្របញ្ចកោណ ក៏ដូចជាតម្រូវការរបស់ប្រជាពលរដ្ឋកម្ពុជានាពេលនេះផងដែរ»។
អ្នកនាំពាក្យរដ្ឋាភិបាល លោក ប៉ែន ប៉ូណា បានលើកឡើងថា ជាទូទៅនៅគ្រប់ទីកន្លែងលើពិភពលោកបានផ្ដល់តម្លៃលើយុទ្ធសាស្ត្របញ្ចកោណរបស់កម្ពុជា។ ជាក់ស្ដែងលោកអគ្គលេខាធិការអង្គការសហប្រជាជាតិ អង់តូនីញ៉ូ ហ្គូតែរ៉េស បានកោតសរសើរនៅក្នុងជំនួបជាមួយលោកនាយករដ្ឋមន្ត្រី ហ៊ុន ម៉ាណែត ដោយបានលើកឡើងថា យុទ្ធសាស្ត្របញ្ចកោណរដ្ឋាភិបាលបន្ស៊ីជាមួយគោលដៅអភិវឌ្ឍដោយចិរភាពរបស់អង្គការសហប្រជាជាតិ។
លោកបន្តថា រដ្ឋមន្ត្រីក្រសួងការបរទេសអូស្ត្រាលីក៏បានកោតសរសើរ និងសង្ឃឹមថាកិច្ចសហប្រតិបត្តិការអូស្ត្រាលីនឹងមានយូរអង្វែងដោយឈរលើគោលនតយោបាយអភិវឌ្ឍសង្គមសេដ្ឋកិច្ចនៃយុទ្ធសាស្ត្របញ្ចកោណរបស់កម្ពុជា។ ចំណែកប្រទេសចិនក៏ដូចគ្នាដែរ ជាពិសេសយុទ្ធសាស្ត្របញ្ចកោណរបស់កម្ពុជាមានស្របគ្នានឹងគោលនយោបាយខ្សែក្រវ៉ាត់ផ្លូវ។
លោកបន្ថែមថា ឥឡូវជប៉ុនប្រកាសគាំទ្រលើចំណុចនេះដែរ ដែលបញ្ជាក់ពីយុទ្ធសាស្ត្របញ្ចកោណ គឺជាគោលនយោបាយអភិវឌ្ឍសង្គមសេដ្ឋកិច្ចប្រកបដោយចិរភាពនិងភាពធន់ ហើយនិងបរិយាបន្ន។ វាមានន័យថា យុទ្ធសាស្ត្របញ្ចកោណរបស់កម្ពុជាស្របគ្នានឹងទិសដៅរបស់សហគមន៍អន្តរជាតិគ្រប់ប្រទេសទាំងអស់។
លោកបាននិយាយថា៖ «ដូច្នេះមិនចម្លែកទេ ដែលប្រទេសជប៉ុនប្រកាសគាំទ្រជួយអភិវឌ្ឍមុំទី៥ គឺអភិវឌ្ឍបច្ចេកវិទ្យាឌីជីថលនៃយុទ្ធសាស្ត្របញ្ចកោណរបស់កម្ពុជា»។
លោកបញ្ជាក់ថា៖ «ជាទូទៅយុទ្ធសាស្ត្របញ្ចកោណដែលដាក់ចេញដោយសម្ដេចនាយករដ្ឋមន្ត្រី គឺមានគ្រប់ជ្រុងជ្រោយទាំងអស់ ដើម្បីធ្វើឱ្យសង្គមសេដ្ឋកិច្ច ព្រោះគោលដៅដ៏ធំបំផុត គឺធ្វើឱ្យកម្ពុជាក្លាយជាប្រទេសមានប្រាក់ចំណូលមធ្យមកម្រិតខ្ពស់នៅឆ្នាំ២០៣០ និងមានប្រាក់ចំណូលខ្ពស់នៅឆ្នាំ២០៥០។ ដូច្នេះរដ្ឋាភិបាលរីករាយសហការជាមួយនឹងដៃគូអភិវឌ្ឍគ្រប់ប្រទេសទាំងអស់ដែលចាប់អារម្មណ៍ ដើម្បីអភិវឌ្ឍនិងទាញយកផលប្រយោជន៍ទៅវិញទៅមក ដើម្បីឱ្យគោលដៅរបស់អង្គការសហប្រជាជាតិអភិវឌ្ឍដោយចិរភាព ក៏ដូចជាយុទ្ធសាស្ត្របញ្ចកោណ
របស់កម្ពុជាឆាប់បានដល់គោលដៅ»៕