ក្រសួងបរិស្ថានបានប្រកាសដាក់ឱ្យប្រើប្រាស់បណ្ណាល័យអេឡិចត្រូនិច (eLibrary) ដើម្បីចែកចាយចំណេះដឹងនិងព័ត៌មាន ដែលទាក់ទងនឹងបរិស្ថាននិងធនធានធម្មជាតិ ការធ្វើទំនើបកម្មស្ថាប័ន និងការផ្សព្វផ្សាយសក្តានុពលតំបន់ការពារធម្មជាតិដល់សិស្ស និស្សិត សាធារណជន វិស័យឯកជន និងអ្នកស្រាវជ្រាវ។
ពិធីប្រកាសដាក់ប្រើប្រាស់បណ្ណាល័យនេះប្រារព្ធធ្វើឡើកាលពីថ្ងៃសុក្រ ក្រោមអធិបតីភាពរបស់លោក សាយ សំអាល់ រដ្ឋមន្ត្រីក្រសួងបរិស្ថាន រួមជាមួយនឹងភាគីពាក់ព័ន្ធទាំងវិស័យឯកជន និងដៃគូអភិវឌ្ឍន៍ជាតិ-អន្តរជាតិ នៅក្រសួងបរិស្ថាន។
លោក សាយ សំអាល់ បានសម្ដែងភាពរីករាយនិងថ្លែងអំណរគុណចំពោះក្រុមការងារដែលបានអនុវត្តជោគជ័យនូវបណ្ណាល័យអេឡិចត្រូនិចនេះឡើង។ វាជាមជ្ឍមណ្ឌលប្រមូលព័ត៌មានយ៉ាងសំខាន់មួយរបស់ក្រសួងបរិស្ថាន។
លោកបាននិយាយថា៖ «បណ្ណាល័យអេឡិចត្រូនិចនេះមិនត្រឹមតែជាបណ្ណាល័យប៉ុណ្ណោះទេ ប៉ុន្តែវាជាឧបករណ៍ដែលនឹងប្រែក្លាយសង្គម និងប្រជាជនកម្ពុជាទៅជាសង្គមសកល ប្រជាជនសាកល ដែលពោរពេញដោយបំណិនជីវិត ប្រកបដោយភាពច្នៃប្រឌិត»។
លោក កែន សេរីរដ្ឋា អគ្គនាយកនៃអគ្គនាយកដ្ឋានចំណេះដឹងនិងព័ត៌មានបរិស្ថាន បានបញ្ជាក់ថា គម្រោងបណ្ណាល័យអេឡិចត្រូនិចរបស់ក្រសួងបរិស្ថានបង្កើតឡើងតបតាមគំនិតផ្តួចផ្តើម និងអនុសាសន៍ណែនាំរបស់ថ្នាក់ដឹកនាំក្រសួងបរិស្ថានស្របនឹងគោលនយោបាយរបស់រាជរដ្ឋាភិបាល។
លោកបានបន្តទៀតថា បណ្ណាល័យអេឡិចត្រូនិចនេះនឹងក្លាយជាថ្នាលឌីជីថលដែលចូលរួមចំណែកយ៉ាងសកម្មក្នុងការចែករំលែកសម្រាប់ចែករំលែកចំណេះដឹង ព័ត៌មានបរិស្ថាននិងធនធានធម្មជាតិ ការធ្វើទំនើបកម្មស្ថាប័ន ក៏ដូចជាការផ្សព្វផ្សាយសក្តានុពលតំបន់ការពារធម្មជាតិសិស្ស និស្សិត សាធារណជន វិស័យឯកជន និងអ្នកស្រាវជ្រាវ ជាពិសេសជាបណ្តុំចងក្រងទិន្នន័យសម្រាប់ក្រសួងរយៈពេលវែង។
លោកនិយាយថា៖ «យើងរីករាយស្វាគមន៍នូវរាល់កិច្ចសហការពីគ្រប់ស្ថាប័ននិងដៃគូនានាក្នុងការចែករំលែកនូវគ្រប់ប្រភេទឯកសារ ទិន្នន័យនានាក្រោមទម្រង់ជារូបភាព ឯកសារសំណេរ សារសំឡេងឬវីដែអូ ដើម្បីចងក្រង រក្សាទុក និងជាការចែករំលែកចំណេះដឹងតាមរយៈបណ្ណាល័យអេឡិចត្រូនិចមួយនេះសម្រាប់ប្រើប្រាស់ជាផលប្រយោជន៍រួម»។
បើតាមក្រសួងបរិស្ថាន បណ្ណាល័យ
អេឡិចត្រូនិចនឹងក្លាយជាផ្នែកដ៏សំខាន់មួយនៃគេហទំព័ររបស់ក្រសួង ដែលបានប្រមូលផ្តុំគ្រប់ប្រព័ន្ធទិន្នន័យដែលកំពុងអនុវត្តស្ថិតក្នុងរចនាសម្ព័ន្ធចាត់តាំង។
រចនាសម្ព័ន្ធទាំងនោះមានដូចជា៖
១.ព័ត៌មានដែលទាក់ទងក្រសួង និងមន្ទីរបរិស្ថាន ចំណេះដឹងទូទៅអំពីបរិស្ថាននិងព្រឹត្តិការណ៍ឬយុទ្ធនាការបរិស្ថានផ្សេងៗ
២.ព័ត៌មានអំពីប្រព័ន្ធ CEMIS ដែលជាប្រព័ន្ធបច្ចេកវិទ្យាប្រមូល ៣.ព័ត៌មានថ្នាក់ជាតិលើការគ្រប់គ្រងបរិស្ថាន ៤.ព័ត៌មានអំពីប្រព័ន្ធ NRMIS ដែលជាប្រព័ន្ធបច្ចេកវិទ្យាព័ត៌មានគ្រប់គ្រងចំណូលមិនមែនសារពើពន្ធ ៥.ព័ត៌មានអំពីប្រព័ន្ធ SARMIS ដែលជាប្រព័ន្ធបច្ចេកវិទ្យាព័ត៌មានគ្រប់គ្រង ទ្រព្យសម្បត្តិរដ្ឋ ៦.ព័ត៌មានអំពីប្រព័ន្ធ FMIS ដែលជាប្រព័ន្ធបច្ចេកវិទ្យាព័ត៌មានគ្រប់គ្រងគ្រប់មុខសញ្ញាការចំណាយរបស់ក្រសួង-ស្ថាប័ន និង ៧.បណ្ណាល័យអេឡិចត្រូនិច៕