លោក ហង់ជួន ណារ៉ុន រដ្ឋមន្ត្រីក្រសួងអប់រំ យុវជន និងកីឡា និងជាប្រធានកាយរឹទ្ធិជាតិកម្ពុជា បានដំបូន្មានដល់ប្រតិភូកាយរឹទ្ធិជាតិកម្ពុជា មុនចេញដំណើរទៅបំពេញបេសកកម្មបោះជំរំកាយរឹទ្ធិពិភពលោកលើកទី២៥ នៅកូរ៉េខាងត្បូង ដោយនិយាយថា ត្រូវលើកតម្កើងនិងរក្សាសេចក្តីថ្លៃសថ្នូររបស់ជាតិនៅលើឆាកអន្តរជាតិ។
ការណែនាំនេះធ្វើឡើងក្នុងជំនួបជាមួយនឹងប្រតិភូកាយរឹទ្ធិជាតិកម្ពុជាចំនួន៤៧នាក់កាលពីថ្ងៃអាទិត្រ ខណៈពួកគេត្រូវទៅចូលរួមការបោះជំរំកាយរឹទ្ធិពិភពលោកលើកទី២៥ នៅប្រទេសកូរ៉េខាងត្បូង ចាប់ពីថ្ងៃទី១ ដល់ថ្ងៃទី១២ ខែសីហា ដើម្បីធ្វើការផ្លាស់ប្តូរបទពិសោធគ្នាទៅវិញទៅមកជាមួយនឹងកាយរឹទ្ធិពិភពលោក។
នៅក្នុងជំនួបនោះលោក ហង់ជួន ណារ៉ុន
បានណែនាំពួកគេថា ប្រតិភូកាយរឹទ្ធិជាតិកម្ពុជាទាំងអស់ដែលត្រូវចូលរួមទៅការបោះជំរំកាយរឹទ្ធិពិភពលោក គឺត្រូវលើកតម្កើងនិងរក្សាគុណតម្លៃ សេចក្តីថ្លៃថ្នូររបស់ជាតិ។
លោកប្រាប់ពួកគេថា៖ «គ្រប់សកម្មភាពនានាក្នុងជំរំ គឺត្រូវរៀនសូត្រជំនាញ បំណិនថ្មីៗ និងធ្វើខ្លួនក្លាយទៅជាទូតសុច្ឆទៈក្នុងការផ្សព្វផ្សាយវប្បធម៌កម្ពុជាទៅកាន់ឆាកអន្តរជាតិតាមរយៈការប្រាស្រ័យទាក់ទងល្អក្នុងស្មារតីមិត្តភាព និងសន្តិភាពជាមួយសមាជិកជំរំមកពីប្រទេសផ្សេងទៀត»។
បន្ទាប់ពីចូលជួបគួរសមជាលោករដ្ឋមន្ត្រីក្រសួងអប់រំ ប្រតិភូកាយរឹទ្ធិជាតិកម្ពុជាទាំង៤៧នាក់បានឡើងយន្តហោះធ្វើដំណើរទៅកាន់ប្រទេសកូរ៉េខាងត្បូង ដើម្បីចូលរួមបោះជំរំកាយរឹទ្ធិពិភពលោកលើកទី២៥នេះ។
ការបោះជំរំកាយរឹទ្ធិពិភពលោក ជាព្រឹត្តិការណ៍អន្តរជាតិដ៏ធំមួយដែលមានសារៈសំខាន់ចំពោះយុវជនក្នុងការ បង្កើនចំណងទំនាក់ទំនងមិត្តភាព សហប្រតិបត្តិការជាមួយប្រទេសជុំវិញពិភពលោកក្នុងន័យពង្រឹងនិងថែរក្សាការពារសន្តិភាព។
លោកស្រី គឹម សេដ្ឋានី អនុប្រធានកាយរឹទិ្ធជាតិកម្ពុជា បានបញ្ជាក់ថា ប្រតិភូកាយរឹទ្ធិជាតិកម្ពុជាទាំង៤៧នាក់នោះ មកពីរាជធានីភ្នំពេញ១៩នាក់ ខេត្តកំពង់ចាម១៨នាក់ ខេត្តកណ្តាលប្រាំបីនាក់ ខេត្តកំពង់ធំមួយនាក់ និងខេត្តព្រៃវែងមួយនាក់។
លោកស្រីបន្តថា គណកម្មការរៀបចំការបោះជំរំពិភលោកលើកទី២៥ មានសមាជិកចូលរួមប្រមាណជិត ៤៥០ ០០០នាក់ មកពី១៧០ប្រទេស។ កម្មវិធីនេះមានអ្នកស្មគ្រចិត្តចូលរួមសម្របសម្រួលប្រមាណជាង ២ ០០០នាក់ មកពីប្រទេសកូរ៉េជាម្ចាស់ផ្ទះ និងបណ្តាប្រទេសផ្សេងៗ និងមានការយកចិត្តទុកដាក់ខ្ពស់ពីរដ្ឋាភិបាលកូរ៉ ទាំងផ្នែកសន្តិសុខ សុវត្ថិភាព សុខាភិបាល និងការធ្វើសកម្មភាពផ្សេងៗ។
លោកស្រីនិយាយថា៖ «ការបោះជំរំកាយរឹទ្ធិពិភពលោកត្រូវបានរៀបចំរៀងរាល់៥ឆ្នាំម្ដង ខណៈកម្ពុជាបានបញ្ជូនប្រតិភូកាយរឹទ្ធិជាតិកម្ពុជាចូលរួមបោះជំរំកាយរឹទ្ធិពិភពលោកបានចំនួន៥លើករួមមកហើយ គឺចាប់ឆ្នាំ១៩៩៩ដល់ឆ្នាំ២០១៩។ គិតទាំងឆ្នាំ២០២៣នេះផង គឺជាលើកទី៦ ដែលប្រតិភូកាយរឹទ្ធិកម្ពុជាចូលរួមបោះជំរំកាយរឹទ្ធិពិភពលោក»។
លោកស្រីបន្ថែមថា ការបោះជំរំកាយរឹទ្ធិពិភពលោក គឺការប្រមូលផ្ដុំកុមារនិងយុវជន ជាសមាជិកនៃចលនាកាយរឹទ្ធិជាតិដ៏ច្រើនកុះករមកពីគ្រប់ទិសទី ដើម្បីធ្វើសកម្មភាពរួមគ្នា និងមានគោលបំណងរួមចំណែកការអភិវឌ្ឍកុមារនិងយុវជនឱ្យមានសក្ដានុពលភាពពេញលេញខាង ផ្លូវកាយ ផ្លូវបញ្ញា ផ្លូវសង្គម ផ្លូវចិត្ត និងផ្លូវអារម្មណ៍ ដើម្បីឱ្យក្លាយទៅជាពលរដ្ឋមានការទទួលខុសត្រូវ និងទៅជាសមាជិកក្នុងសហគមន៍ ៕